གྲིབ་འོག་གི་ལྗོན་པ།

མིག་འོག་ནས་རང་མདངས་ཡལ་སོང་།

འཁྱག་རླུང་གིས་བསྡམས་པའི་ནམ་ཟླ།

ངས། ཁྱོད་ལ་ཅི་ཞིག་བརྗོད་འདོད་ཀྱང་།

མགྲིན་པ་བརྣངས་བའི་དུས་ཚོད་ཀྱི་ཐག་སྒྲ་དེས།

ང་གཉིས་རང་དབང་གི་སྒོ་འཕར་གཏན་སོང་།

ས་གཞིའི་རང་ཚུགས་ཤོར་རྗེས།

གྲང་ངར་གྱི་ལང་ཚོ་ཤེད་ཀྱིས་སྨིན་པས།

ཡུལ་འདིའི་ངོ་གདོང་རྩམ་སྐྱ་ཞིག་ལྟར་སྣུམ་བག་མི་འདུག

ནམ་མཁའ་གཉོམ་ཕྲིག

ཉི་འོད་ལ་བཙའ་ཆགས།

སྤྲིན་པ་གོ་རིམ་མེད་པར་རང་དགར་བཞུད།

ལོ་འདབ་ཀྱི་ཚེ་སྲོག་ཆད་སླ་བའི་དུས་ཚིགས་ཤིག

ཁ་བ་འཇིག་རྟེན་དུ་ཐོན་པ་ནས་བཟུང་།

མི་ཚོས་མེ་འོད་ཀྱི་མདུན་ནས་རང་ཉིད་ཅི་ཡང་མིན་པ་ཤེས།

ཐང་ཆད་པའི་མི་ཞིག་གཉིད་རན་པའི་དུས།

དཀར་ལ་གསལ་བའི་གློག་འོད་ངོགས་ནས།

འབུ་སྦྲང་འགས་འཚོ་བའི་ཆེད་རང་སྲོག་བློས་བཏང་བ་མཐོང་།

ཞོགས་པ་མལ་ལས་སད་དུས།

ཁོ་ཚོའི་སྙིང་སྟོབས་ལ་ཡིད་རངས་ཞུས་ཏེ།

སྙན་ངག་ཞིག་གིས་རྒྱང་ལ་མིག་སྐྱེལ་བྱས།