རི་བོ་གངས་དཀར་ཏེ་སེ། །
རི་རྩེ་ཉི་འོད་བརྒྱན་པས། །
མིག་ཟུང་དེ་ལ་ཤོར་ནས། །
གངས་ཀྱི་མི་ཞིག་དྲན་པ། །
ཡར་ཀླུང་གཙང་པོ་ཡོམ་ཡོམ། །
རླབས་རྒྱུན་མཚོ་མོ་ཡོམ་ཡོམ། །
ཡུན་རིང་བསྐུར་བའི་འཕྲིན་དེ། །
ཡར་ཀླུང་གཞུང་ལ་ཨེ་འབྱོར། །
སེམས་པ་རི་ལ་བཀུག་ཚེ། །
རི་ཆེན་གངས་ཀྱི་བཟུང་བ། །
ཁྱེད་རང་སྤྲིན་ལ་སྤྲུལ་ཏེ། །
ང་ཡི་ཕྱོགས་སུ་འཁོར་ཤོག །
སྙན་ངག་བཞུར་སྒྲ་ཤག་ཤག །
ས་ཕྱོགས་གང་ལ་བཞུར་སོང་། །
སྐྱོ་བ་ཐུགས་སུ་ཡོད་ན། །
བཞུར་སྒྲ་དེར་ཕྱོགས་ཁྱེར་རོགས། །
འཕྱོངས་རྒྱས་ཟླ་བ་སྒྲོལ་མའི། །
འཛུམ་པའི་ཞལ་རས་བསམ་སྟེ། །
གཙང་ཆུ་སྔོན་མོའི་རླབས་རྒྱུན། །
འཕྱོངས་རྒྱས་ཡུལ་དུ་བབས་སོང་། །
རླུང་བུ་ཤུར་ཤུར་མ་ལྡང་། །
ལྗོན་པའི་ལོ་འདབ་འཐོར་འགྲོ། །
ལྗོན་པའི་ལོ་འདབ་སྙེ་མ། །
གང་སར་འཐོར་ན་མི་རུང་། །
དཔྱིད་ཀྱི་ཆར་བཞུད་ཟིམ་བུ། །
མི་སེམས་སྤང་དུ་སིམས་སོང་། །
འཕྱོངས་རྒྱས་སྒྲོལ་མའི་སྙིང་གཏམ། །
སེམས་ཀྱི་གཏིང་ལ་སིམས་སོང་། །
སྤྲིན་སྣེ་རླུང་གི་དེད་ནས། །
གླིང་བཞི་མཐའ་ལ་འཁྲིགས་ཀྱང་། །
ཡིད་ཀྱི་དམ་ཚིག་རི་མོ། །
རང་སོར་ནོར་བ་དཔེ་མེད། །
མི་ཚེའི་སྣང་བ་ཟེར་བ། །
མཚོ་ཆེན་རྒྱལ་མོ་ཡིན་འདུག །
ང་དང་ཆུང་འདྲིས་བྱམས་པ། །
མཚོ་དེའི་གསེར་ཉ་ཡིན་པ། །
མི་དེ་གངས་ལས་མ་སྐྱེས། །
གླིང་ཡུལ་སྟོད་ནས་འཁྲུངས་སོང་། །
མགུར་དེ་ཚངས་པས་མ་དྲངས། །
འཕྱོངས་རྒྱས་ཡུལ་ནས་བཞེངས་སོང་། །
རི་མཐའ་སྨུག་པས་བཟུང་ཡང་། །
སེམས་པ་སྐྱོ་སྐྱོ་མ་གནང་། །
སྨུག་པ་གནམ་ལ་འཁོར་རྗེས། །
ཐུག་འཕྲད་ཡོང་བ་ཞུས་ཆོག །
ཨ་སྔོན་གནམ་གྱི་དབྱིངས་སུ། །
སྤྲིན་དཀར་ལང་ངེ་ལོང་ངེ་། །
ལས་སྐལ་བོར་བའི་མི་དེ། །
དྲན་པའི་གསལ་འདེབས་བྱས་བྱུང་། །
ཆུ་དེའི་བཞུར་རྒྱུན་མ་བལྟས། །
གཙང་ཆུ་ཨེ་ཡིན་བལྟས་ཡོད། །
རི་དེའི་མཛེས་སྡུག་མ་བལྟས། །
བླ་རི་ཨེ་ཡིན་བལྟས་ཡོད། །
དྲན་སེམས་སྣང་བ་ཁྲ་ཁྲ། །
ཆུ་མོ་ཆུ་རིས་ཤིག་ཤིག །
དྲན་ན་ཡིད་ཐང་ཤོར་ས། །
མཚོ་མོ་སྤང་ལ་བཞད་སོང་། །
点赞
收藏
相关推荐
换一批
评论
