འདུ་ཁང་གློག་འོད་མཛེས་ལ། །
སྲས་མོ་རྣམ་པ་ལེགས་པ། །
ཆང་ཁང་འདི་ཡི་ནང་ནས། །
མཚན་མོ་བསྐྱལ་ན་འདོད་པ། །
ཆང་འདི་ནས་ཆང་ཁམ་པ། །
མངར་སྐྱུར་འདྲེས་མས་གྲུབ་ཡོད། །
བཟི་ཁ་བཙན་དང་མི་བཙན། །
རྣམ་ཤེས་ནམ་མཁར་བསྐྱལ་བྱུང་། །
ཆང་མ་མ་བཟང་བུ་མོ། །
རྒྱུ་རྔམས་མེ་ལས་ཚ་བ། །
ཆང་དེ་ནས་ཆང་ཁམས་པ། །
རྒྱུ་རྫས་ཕབ་ཀྱིས་བསྙལ་བ། །
ཆང་མའི་རྣམ་འགྱུར་ལེགས་པ། །
རྒྱུ་དང་ནོར་ལ་ཞེན་སོང་། །
བཟི་ནས་རྣམ་ཤེས་བོར་དུས། །
ཆང་མའི་རང་མདོག་མངོན་ཡོང་། །
གྲོགས་དང་སྤུན་ཟླའི་མཛའ་བརྩེ། །
བཟི་ལྡན་ཆང་གིས་བསླུས་ན། །
དམ་ཚིག་རྡོ་ཐོག་རི་མོ། །
དོན་མེད་གས་ཆག་ཤོར་འགྲོ། །
ཅོལ་ཆུང་དེང་རབས་གཞོན་ནུ། །
ཆང་ཁང་ནང་ལ་མ་ཕེབས། །
ལང་ཚོའི་རིན་ཐང་ཡལ་ན། །
དུས་ཚོད་ཕྱིར་བསྣུར་མི་བྱ། །
བཟི་ཆེན་ཆང་གི་བྲོ་བ། །
ཆང་ཁང་ནང་ནས་མྱང་ན། །
ཆང་ཁང་ནང་གི་སྲས་མོའི། །
བརྩེ་བའི་འཇའ་གཟུཌ་མངོན་ཡོང་། །
སྒོར་མོའི་ཆེད་དུ་བཞེངས་པའི། །
ཆང་ཁང་སྲས་མོའི་བརྩེ་སེམས། །
ཆང་ཁང་གྲུ་བཞི་འདི་ཡི། །
སྒོ་རའི་ཕྱི་ནང་ཙམ་རེད། །
ཆང་ལ་བདུད་རྩི་ཟེར་བ། །
ཆང་མས་གསོལ་བའི་མཚན་རེད། །
ཆང་མ་མཁའ་འགྲོ་ཟེར་བ། །
ཆང་འཐུང་རྒན་པོའི་ཚིག་རེད། །
ཉེས་ཆེན་ཆང་གིས་བཟི་ན། །
བརྩེ་ཆེན་དགའ་ལོ་བྲལ་འགྲོ། །
བསླུ་བྲིད་ཆང་མས་གནང་ན། །
ལང་ཚོའི་མེ་ཏོག་ཡལ་འགྲོ། །
ང་དང་ཆང་མའི་ཁ་ཆད། །
ཆང་ཁང་འདི་ལས་མེད་ཀྱང་། །
ང་གཉིས་འདི་རུ་འཛོམས་པ། །
ཆང་ལ་དགའ་བས་ལན་སོང་། །
ཆང་མའི་རྣམ་ཤེས་ཕྲ་མོ། །
ནོམ་ཆེན་རྒྱུ་ཡིས་བསླུས་སོང་། །
མི་ཚེའི་རིན་ཐང་ཟེར་བ། །
ཆང་ཁང་ཁ་ནས་ཡལ་སོང་། །
ཆང་མར་ཆགས་པའི་བརྩེ་སེམས། །
རང་ཉིད་བསླུ་བྲིད་ཙམ་རེད། །
སྒོར་མོའི་ཟམ་པ་མེད་ན། །
ཆང་མའི་ཟུར་མིག་མི་འཕེན། །
ཆང་མ་ཁྱོད་དང་ང་གཉིས། །
ལས་འཕྲོ་ཆང་གིས་བཅད་སོང་། །
ང་རང་ཆང་གིས་བཟི་དུས། །
ཁྱོད་ཀྱིས་བརྩེ་སེམས་ཡལ་སོང་། །
ཆང་མའི་ལང་ཚོའི་མེ་ཏོག །
ཆང་ཁང་ནང་ནས་འཛད་སོང་། །
སྒོར་དང་ནོར་གྱི་ཡོང་སྒོ། །
ཆང་ཁང་འདི་ནས་རྙེད་སོང་། །
ཆང་མ་ཆང་མ་ཟེར་བ། །
བསླུ་བྲིད་མཁས་པོ་མེད་ན། །
སྒོར་མོའི་འཚང་ཁ་རྒྱག་པའི། །
ཡོང་སྒོ་གང་ནས་རྙེད་པ། །
དང་པོ་ཆང་ཞིག་འཐུང་བས། །
མངར་དང་ཞིམ་པའི་སྦྲིད་པ། །
བར་དུ་ཆང་ཞིག་འཐུང་བས། །
སྐྱུར་དང་བསྐ་བས་བཟི་སོང་། །
དང་པོ་ཆང་མ་འཕྲད་པའི། །
འཛུམ་མདངས་མེ་ཏོག་བཞད་འདྲ། །
བར་ནས་ལན་གཅིག་འཕྲད་དུས། །
སེམས་གཏམ་རྫ་ཆུ་བཞུར་སོང་། །
དངུལ་ལོར་གྲངས་ཀ་རྫོགས་པ། །
ཆང་མའི་ཐུགས་ཀྱིས་མཁྱེན་ན། །
ཆང་གྲོགས་ང་དང་ཁྱོད་ཚོ། །
ཞེ་འདང་ཆང་ཕོར་ཙམ་རེད། །
ཆང་འཐུང་ང་དང་ཁྱོད་རང་། །
དམ་ཚིག་མདུད་པ་གྲོལ་སོང་། །
ད་ནི་ཆང་དང་ཆང་མ། །
སྣང་བའི་དཀྱིལ་ནས་ཡལ་སོང་། །
点赞
收藏
相关推荐
换一批
评论
