འཚོ་བའི་མཁོ་ཆས་རྡོག་ཁྲེས་ནང་དུ་བཅུག །
འཇམ་ལྡན་མལ་ཆས་གྲུ་བཞི་ལྷམ་མེར་བརྩེགས། །
སྨོན་ཚིག་རེ་བའི་དམིགས་པ་རྒྱང་ལ་གཏད། །
ཁོ་བོ་ཕྱོགས་ལ་ཐོན་པའི་སྔོན་འགྲོ་ཡིན། །
རྡོག་ཁྲེས་གྲུ་བཞི་ཕྲག་པར་བཀལ་བྱེད་ཅིང་། །
ཕྱི་མིག་ཟུར་ནས་འགྲོ་ཆས་ལེགས་གྲུབ་སྟེ། །
ཁང་ཆུང་གྲུ་བཞིར་སྒོ་དང་སྒོ་ལྕགས་བརྒྱབ། །
ཁོ་བོ་ལམ་དུ་ཞུགས་པའི་སྦྱོར་བ་ཡིན། །
ཕ་མ་རྒད་པོས་ལམ་ལྷོངས་སྨོན་ཚིག་འདེབས། །
ཉེ་འབྲེལ་སྤུན་ཟླས་སྐྱེལ་མའི་ཇ་ཆང་འདྲེན། །
གྲོགས་པོ་ཕུ་ནུས་དམ་ཚིག་ཁ་བཏགས་བསྒྲོན། །
ཁོ་བོ་ཕྱོགས་ལ་ཐོན་པའི་དངོས་གཞི་ཡིན། །
རླངས་འཁོར་དུང་སྒྲ་ལྷང་ལྷང་སྒྲོག་དང་ལྷན། །
ཁ་བཏགས་དཀར་པོའི་གསེབ་ནས་ལམ་དུ་ཞུགས། །
སྨོན་ཚིག་འཕྲེང་བ་འདྲེན་པའི་ང་དང་ཁྱེད། །
གོམ་སྟབས་སོ་སོར་བསྒྱུར་བའི་ལས་དེ་སྐྱོ། །
ལམ་ཟུར་ཀྱོག་མཚམས་རེ་ནས་ཕྱི་མིག་རེ། །
སྔར་སོང་བྱ་བའི་ལས་ལམ་ཡིད་ལ་འཁྲེང་། །
རླུང་རྟས་ལ་བཙས་གསོལ་དུས་མིད་པ་བརྣངས། །
ཁོ་བོ་ལམ་བུར་བགྲོད་པའི་ངང་ཚུལ་ཡིན། །
གཞུང་ལམ་ཀྱོག་མཚམས་རེ་ནས་བསམ་གཞིགས་རེ། །
གུག་ཆ་སྐོར་ཐེངས་རེ་ནས་དྲན་སེམས་རེ། །
ལ་ལུང་རྒྱང་སྐྱོད་ས་ནས་ཕྱིར་འདང་རེ། །
འདུ་འབྲལ་ཆོས་ཉིད་བཙན་པོ་ཡིད་ལ་གཟན། །
ལང་ཚོའི་འདབ་མ་ལོ་ཟླའི་ཕྲག་ལ་བཀལ། །
འདུན་པས་རེ་ཞགས་སྙིང་གི་ནང་དུ་བསྟིམས། །
ཐག་རིང་གཞན་ཡུལ་འགྲིམ་པའི་དགོས་པ་དེ། །
ཡིད་སེམས་སྙིང་ནས་བརྗེད་ཐབས་བྲལ་བར་གྱུར། །
སྐྱིད་པའི་རང་ཡུལ་བྱམས་པའི་ཕ་མ་སོགས། །
དྲན་ཡང་བོར་ནས་རྒྱང་ལ་འགྲོ་དགོས་པའི། །
འདུན་པའི་རེ་བ་ཡིད་ལ་བརྣགས་པའི་དོན། །
ལོ་མང་འབད་པའི་ཀློང་ནས་འབྲས་བུ་བཙལ། །
གཞན་ཡུལ་ཉི་གྲིབ་འདྲེས་པའི་ས་མཐའ་རུ། །
ལོ་དང་ཟླ་བ་གཉིས་ཀྱིས་རྒྱབ་ནས་དེད། །
ཞག་དང་དུས་ཚོད་གཉིས་ཀྱིས་མདུན་ནས་བསུས། །
ཁོ་བོའི་མི་ཚེ་དགོང་ཁའི་གྲིབ་སོ་འདྲ། །
ཞོགས་པའི་སྐྱ་མདའ་སྔ་མོའི་དཔེ་རུ་བཞག །
མཚན་མོའི་མུན་ནག་ཕྱི་མོའི་དོན་དུ་སླང་། །
ལྕོགས་ཚོད་ལས་ལ་བཀོལ་བའི་ལུས་ངག་སེམས། །
ད་ནི་རྒད་པོའི་སྣང་བས་བསུ་མ་སླེབས། །
མི་སྡོད་དུས་ཀྱིས་བཅོམས་པའི་ལང་ཚོའི་དཔལ། །
སྟོན་ཁའི་མེ་ཏོག་བ་མོས་བཅོམས་དང་མཚུངས། །
མི་རྟག་བདུད་ཀྱིས་ཟོས་པའི་སྔར་སོང་ལ། །
དྲན་པའི་ཀློང་ན་སྐྱོ་གདུང་སྤྲིན་ཕུང་འཁྲིགས། །
ད་ནི་རང་ཡུལ་དྲན་པའི་གདུང་བ་ཡིས། །
མི་ཚེའི་རིན་ཐང་སེམས་ཀྱི་བག་ལ་གཞའ། །
གོམ་གང་སྤོ་མཚམས་བཞག་སྟེ་རང་ཡུལ་ཕྱོགས། །
དྲན་པའི་མིག་ཟུང་ཨ་བལྟས་ཡང་བལྟས་ཤོར། །
ཕ་མ་རྒན་རྒོན་སྐུ་ཚེ་ཟིན་པའི་དུས། །
སྙན་པའི་གཏམ་དང་གུས་པའི་རྣམ་འགྱུར་དང་། །
ཟས་གོས་དོན་ཆུང་སྒྲུབ་པའི་བསམ་པ་ཡིས། །
རེ་བའི་གཏད་སོ་ཡོད་ཚད་ཁྱེད་ལ་ཕྱོགས། །
点赞
收藏
相关推荐
换一批
评论
