སྤྱི་ཟླ་༧པའི་ཚེས་༡༥ཉིན་གྱི་ཕྱི་དྲོར། རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ། གྲོང་ཨུད་ཀྱི་ཧྲུའུ་ཅི་ཟླ་བ་ཚེ་རིང་གིས་གྲོང་ཁྱེར་སྤྱི་བདེ་ཅུད་དང་གྲོང་ཁྱེར་བརྟན་ལྷིང་སྲུང་སྐྱོང་བཀོད་འདོམས་པུའུ་རུ་ཕེབས་ནས་བརྟན་ལྷིང་སྲུང་སྐྱོང་ལས་དོན་ལ་བརྟག་ཞིབ་གནང་བ་མ་ཟད། གྲོང་ཁྱེར་ཡོངས་ཀྱི་བརྟན་ལྷིང་སྲུང་སྐྱོང་ལས་དོན་གྱི་བརྙན་ལམ་བཀོད་གཏོང་ཚོགས་འདུ་གཙོ་སྐྱོང་གནང་ནས་སྤྱི་ཡོངས་ཀྱི་རྒྱལ་ཁབ་བདེ་འཇགས་ལྟ་བ་བརྟན་པོ་འཛུགས་པ་དང་། གནས་ཚུལ་གསར་པར་ཞིབ་འཇུག་ཧུར་ཐག་བྱེད་པ། གནད་དོན་གསར་པར་རང་འགུལ་ངང་ཐག་གཅོད་བྱེད་པ། ལམ་སྲོལ་གསར་པ་ཟམ་མི་ཆད་པར་འཚོལ་ཞིབ་བྱེད་པ་བཅས་དོན་དངོས་དང་ཟུང་འབྲེལ་གྱིས་བརྟན་ལྷིང་སྲུང་སྐྱོང་ལས་དོན་དོན་འཁྱོལ་བྱ་རྒྱུར་དམ་འཛིན་ནན་པོ་བྱས་ཏེ་གྲོང་ཁྱེར་ཡོངས་ཀྱི་སྤྱི་ཚོགས་ཁྱོན་ཡོངས་རྒྱུན་མཐུད་ཞི་མཐུན་བརྟན་ལྷིང་ཡོང་རྒྱུར་འགན་ལེན་བྱེད་དགོས་པའི་ནན་གསུང་གནང་བ་རེད།

ཟླ་བ་ཚེ་རིང་གིས་གྲོང་ཁྱེར་སྤྱི་བདེ་ཅུད་ཁྲིམས་འཛིན་གྱོད་སྒྲུབ་དོ་དམ་ལྟེ་གནས་སུ་ཕེབས་ནས་ཁྲིམས་འཛིན་གྱོད་སྒྲུབ་དང་མཐུན་སྦྱོར་བཅོས་སྐྱོང་སོགས་ཀྱི་ལས་དོན་སྤེལ་ཚུལ་མཁྱེན་རྟོགས་གནང་བ་དང་། ཁྲིམས་འཛིན་ཚད་ལྡན་ཅན་འཛུགས་སྐྱོང་གཏིང་ཟབ་བྱེད་པར་ཐོབ་པའི་གྲུབ་འབྲས་ལ་ཁས་ལེན་གང་ལེགས་གནང་བ་མ་ཟད། ཆོས་ཉིད་ལ་ཕྱོགས་སྡོམ་བྱེད་མཁས་པ་དང་ཁྲིམས་འཛིན་ཚད་ལྡན་ཅན་འཛུགས་སྐྱོང་གི་ཉམས་མྱོང་དང་བྱ་ཐབས་ཁྱབ་གདལ་བཏང་ནས་ཆུ་ཚད་དེ་བས་མཐོ་བའི་དུས་བདེའི་གཞིས་ཀ་རྩེ་དང་ཁྲིམས་སྐྱོང་གི་གཞིས་ཀ་རྩེ་འཛུགས་སྐྱོང་ལ་སྐུལ་འདེད་གཏོང་དགོས་ཞེས་ནན་བཤད་ཀྱང་གནང་བ་རེད།

གྲོང་ཁྱེར་བརྟན་ལྷིང་སྲུང་སྐྱོང་བཀོད་འདོམས་པུའུ་རུ། ཟླ་བ་ཚེ་རིང་གིས་གྲོང་ཁྱེར་ཡོངས་ཀྱི་བརྟན་ལྷིང་སྲུང་སྐྱོང་ལས་དོན་གྱི་བརྙན་ལམ་བཀོད་གཏོང་ཚོགས་འདུ་གཙོ་སྐྱོང་གནང་ནས་གྲོང་ཁྱེར་ཡོངས་ཀྱི་བརྟན་ལྷིང་སྲུང་སྐྱོང་ལས་དོན་གྱི་གནས་ཚུལ་སྙན་ཞུ་གསན་པ་དང་གྲོང་ཁྱེར་ཡོངས་ཀྱི་བརྟན་ལྷིང་སྲུང་སྐྱོང་གི་འཐབ་ས་དང་པོའི་ལས་བྱེད་ལས་བཟོ་ཚོས་དཀའ་སྤྱད་ལས་སྒྲུབ་གནང་བར་ཐུགས་རྗེ་ཆེ་ཞུས་པ་རེད།

ཟླ་བ་ཚེ་རིང་གིས་གྲོང་ཁྱེར་ཡོངས་ཀྱི་རིམ་ཁག་སྡེ་ཚན་ཁག་གིས་ཆབ་སྲིད་ཀྱི་ཚུགས་གནས་མཐོ་རུ་གཏོང་བ་དང་། གཏན་འཁེལ་གཉིས་ལ་བརྩི་སྲུང་ཞུ་བ་དང་སྲུང་སྐྱོང་གཉིས་མཐའ་གཅིག་ཏུ་ཐུབ་པ་བྱས་ཏེ་བོད་ཀྱི་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་ཕྱོགས་ཡོངས་ནས་ལག་བསྟར་དོན་འཁྱོལ་བྱེད་པ། བརྟན་ལྷིང་སྲུང་སྐྱོང་བྱ་རྒྱུ་དེ་ལས་འགན་ཨང་དང་པོར་བརྩི་བ་དང་སྤྱི་ཚོགས་བརྟན་ལྷིང་སྲུང་སྐྱོང་སྐོར་གྱི་ཏང་ཀྲུང་དབྱང་དང་ལྗོངས་ཏང་ཨུད་ཀྱི་ཐབས་ཇུས་བཀོད་སྒྲིག་དང་ལས་ཀའི་བླང་བྱ་ཁག་ལག་བསྟར་དོན་འཁྱོལ་གཏིང་ཟབ་བྱེད་པ། བརྟན་ལྷིང་སྲུང་སྐྱོང་གི་ལས་དོན་ཁག་ཡག་པོ་བསྒྲུབ་རྒྱུའི་འགན་འཁྲི་ཁུར་སེམས་དང་ལས་འགན་སྒྲུབ་སེམས་ཆེ་རུ་ཏན་ཏིག་གཏོང་བ། ཉེན་བརྡ་རྒྱུན་སྒྲོག་དང་རྒྱུན་དུ་དོགས་ཟོན་བྱ་རྒྱུ་མཐའ་འཁྱོངས་བྱེད་པ། མཐའ་ཚད་འཛིན་སེམས་དང་གནད་དོན་ཕྱོགས་སྟོན་དུ་འཛིན་རྒྱུ་མཐའ་འཁྱོངས་བྱེད་པ། ཡུན་རིང་གི་ཐབས་ཇུས་འདིང་བ་དང་རྩ་བ་བརྟན་གཏོང་གི་བྱ་ཐབས་སྤྱོད་པ་བཅས་བྱས་ཏེ་རྩ་འཛུགས་ཀྱི་འགོ་ཁྲིད་གནད་ལ་འཁེལ་བ་དང་སྟོབས་ཤུགས་བཀོད་སྒྲིག་གནད་ལ་འཁེལ་བ། ལས་དོན་ཁག་བགོས་ཞིབ་ཕྲ་གནད་ལ་འཁེལ་བ། བྱ་ཐབས་ལག་བསྟར་གནད་ལ་འཁེལ་བ། འགན་འཁྲི་དོན་འཁྱོལ་གནད་ལ་འཁེལ་བ། ལྟ་སྐུལ་མཛུབ་ཁྲིད་དང་ཞིབ་བཤེར་གནད་ལ་འཁེལ་བ་བཅས་བྱས་ཏེ་ཞི་མཐུན་བརྟན་ལྷིང་གི་སྤྱི་ཚོགས་ཁོར་ཡུག་ལ་ནུས་ཤུགས་ཡོད་རྒུས་སྲུང་སྐྱོང་བྱེད་དགོས་པ། གཞི་རིམ་བཅོས་སྐྱོང་མ་ལག་དང་བཅོས་སྐྱོང་ནུས་པ་དེང་རབས་ཅན་དུ་འགྱུར་བའི་ཆུ་ཚད་མུ་མཐུད་མཐོར་འདེགས་བཏང་ནས་སྤྱི་ཚོགས་ཀྱི་ངོས་ནས་སྔོན་འགོག་ཚོད་འཛིན་བྱེད་ཤུགས་ཆེ་རུ་གཏོང་བ། མཐའ་མཚམས་ཀྱི་འཐབ་ས་མདུན་མ་བརྟན་སྲུང་། ཁྲིམས་ལྟར་ཆོས་ལུགས་ཁྱབ་ཁོངས་ཀྱི་དོ་དམ་ལ་ཤུགས་སྣོན་རྒྱག་པ། གཙོ་གནད་མི་སྣ་དང་གཙོ་གནད་ལྷུ་ཚིགས་ལ་དམ་པོར་དམིགས་པ་བཅས་བྱས་ཏེ་བདེ་འཇགས་ཐོན་སྐྱེད་ལ་ནུས་ཤུགས་ཡོད་རྒུས་དམ་འཛིན་དང་བརྟན་ལྷིང་སྲུང་སྐྱོང་ལས་དོན་གྱི་རྨང་གཞི་ཁྱོན་ཡོངས་ནས་བརྟན་དུ་གཏོང་དགོས་པ། ལས་ཀའི་རང་འགུལ་གྱི་དབང་ཆ་ཁོང་དུ་བརྟན་པོ་ཆུད་པ་བྱས་ཏེ་དྲ་བའི་གླེང་ཕྱོགས་ལ་ལྟ་སྐུལ་དོ་དམ་བྱེད་ཤུགས་ཆེ་རུ་གཏོང་བ་དང་བདེ་འཇགས་བརྟན་ལྷིང་ལ་གནོད་པའི་ཉེན་ཁ་དང་མངོན་མེད་རྐྱེན་ངན་སྣ་ཚོགས་གྲལ་བཤེར་དང་སེལ་བ། ཡིག་བསྐུར་ངོ་བཅར་གྱི་གནད་དོན་ཁྱོན་ཡོངས་ནས་ཐག་གཅོད་བྱེད་པ། ཐོལ་བྱུང་དོན་རྐྱེན་ཐག་གཅོད་བྱ་རྒྱུའི་གྲ་སྒྲིག་ལས་དོན་ཕྱོགས་ཡོངས་ནས་ཡག་པོ་བྱེད་པ། དུས་རབས་གསར་པའི་ཧྥེང་ཆའོ་ཡི་ཉམས་མྱོང་དང་ཕུའུ་ཅང་གི་ཉམས་མྱོང་དོན་འཁྱོལ་བྱས་ཏེ་འགལ་བ་དང་རྩོད་གཞི་སྣ་ཚོགས་འབྱུང་རྩ་ནས་ཤེས་རྟོགས་དང་འབྱུང་རྩ་ནས་སེལ་བ། ས་གནས་དེ་གར་ཚོད་འཛིན་བྱེད་པ་བཅས་ལས་དོན་ཁག་ཏན་ཏིག་བསྒྲུབ་དགོས་པ། ཆབ་སྲིད་ཀྱི་འགན་འཁྲི་མཐའ་གཅིག་ཏུ་འཁུར་བ་དང་འགོ་ཁྲིད་ཀྱི་འགན་འཁྲི་ནན་དུ་གཏོང་བ། འགན་འཁུར་བློ་མཐུན་གཙོ་བོས་བརྟན་ལྷིང་སྲུང་སྐྱོང་གི་ལས་དོན་རྒྱུན་གཏན་ནས་དམ་འཛིན་ཏན་ཏིག་བྱེད་པའི་ཐོག་ནས་ས་སྲུང་གི་འགན་འཁྲི་ཡོད་པ་དང་ས་སྲུང་གི་འགན་འཁྲི་འཁུར་བ། ས་སྲུང་གི་འགན་འཁྲི་གཙང་སྒྲུབ་ཐུབ་པ་བཅས་བྱེད་དགོས་པ། རིམ་ཁག་སྡེ་ཚན་ཁག་གིས་ཁོངས་གཏོགས་ཁུལ་གྱི་འགན་འཁྲི་དང་སྡེ་ཚན་གྱི་འགན་འཁྲི་ལག་བསྟར་ནན་ཏན་བྱས་ཏེ་མིག་སྔར་སྤེལ་བཞིན་པའི་ཏང་གི་སྒྲིག་ཁྲིམས་སློབ་སྦྱོང་སློབ་གསོ་དང་ཟུང་འབྲེལ་གྱིས་བརྟན་ལྷིང་སྲུང་སྐྱོང་ལས་དོན་གྱི་སྒྲིག་ཁྲིམས་ནན་དུ་གཏོང་བ་དང་ལྟ་སྐུལ་ཞིབ་བཤེར་ལ་ཤུགས་སྣོན་བརྒྱབ་ནས་དམ་ནན་གྱི་སྒྲིག་ཁྲིམས་བརྟན་ལྷིང་སྲུང་སྐྱོང་ལས་དོན་གྱི་བརྒྱུད་རིམ་ཧྲིལ་པོ་དང་ཕྱོགས་ཁག་ཚང་མར་ཁྱབ་རྒྱུར་སྐུལ་འདེད་གཏོང་དགོས་པ། སྤྱོད་ཚུལ་དེ་བས་ལེགས་གཏོང་དང་དོན་འཁྱོལ་ལ་དམ་འཛིན་ནན་པོས་བརྟན་ལྷིང་སྲུང་སྐྱོང་ལས་དོན་ཁྲོད་ཀྱི་འགན་འཁྲི་ཏན་ཏིག་མི་འཁུར་དང་ཕྱི་ཚུལ་རིང་ལུགས་དང་དཔོན་ཉམས་རིང་ལུགས་བཅས་ཀྱི་གནད་དོན་ཐག་གཅོད་བྱ་རྒྱུར་ཤུགས་སྣོན་བརྒྱབ་སྟེ་བརྟན་ལྷིང་སྲུང་སྐྱོང་ལས་དོན་གྱི་བཀོད་སྒྲིག་བླང་བྱ་ལག་བསྟར་དོན་འཁྱོལ་ཏན་ཏིག་བྱས་ནས་གཞིས་ཀ་རྩེའི་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ཆེད་ལེགས་སྐྱེས་དེ་བས་ཆེ་བ་འབུལ་དགོས་པའི་ནན་གསུང་གནང་བ་རེད།

ཀེ་ཆིང་མིན་དང་ཝང་ཧྲུའུ་ཅུན། མུའུ་ཤིང་པིན། ཡེ་ཧའེ་ཐའོ། ཚེ་རིང་རྡོ་རྗེ། ལྗང་ཝན་བྱང་བཅས་འབྲེལ་ཡོད་བྱེད་སྒོར་ཞུགས་ཡོད་པ་རེད།

 (ཚེ་དབྱངས་དང་པ་སངས་ཆུང་བདག་གིས་བསྒྱུར་)