སྤྱི་ཟླ་༧པའི་ཚེས་༡༦ཉིན་གྱི་སྔ་དྲོར། རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ། གྲོང་ཨུད་ཀྱི་ཧྲུའུ་ཅི་ཟླ་བ་ཚེ་རིང་གིས་སྔ་རྗེས་སུ་གཞིས་ཀ་རྩེ་ལས་རིགས་ལག་རྩལ་སློབ་གླིང་དང་གཞིས་ཀ་རྩེའི་ཕྱིར་གཏོང་དངོས་ཟོག་ཞིབ་བཤེར་ས་ཚིགས། ཧྭ་ཏན་བསམ་གྲུབ་རྩེ་ཆུས་ཆུ་མིག་ཀྲའོ་ཝ་༩༠ཡི་འོད་ཤུགས་གློག་གཏོང་རྣམ་གྲངས་འཛུགས་སྐྲུན་བྱ་ཡུལ་བཅས་སུ་ཕེབས་ནས་གཙོ་གནད་རྣམ་གྲངས་འཛུགས་སྐྲུན་ལས་དོན་ལ་བརྟག་ཞིབ་གནང་བ་རེད། ཁོང་གིས། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱ་རྒྱུ་མཐའ་འཁྱོངས་ཀྱིས་འཕེལ་རྒྱས་ཀྱི་འདུ་ཤེས་གསར་པ་ཆ་ཚང་ཞིང་གནད་ལ་འཁེལ་བ་དང་ཕྱོགས་ཡོངས་ནས་ལག་བསྟར་བྱས་ཏེ་གཞིས་ཀ་རྩེའི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་རྒྱུན་ཆད་མེད་པར་གྲུབ་འབྲས་གསར་པ་ཐོབ་རྒྱུར་སྐུལ་འདེད་ཧུར་ཐག་གཏོང་དགོས་ཞེས་ནན་གསུང་གནང་བ་རེད།

གཞིས་ཀ་རྩེ་ལས་རིགས་ལག་རྩལ་སློབ་གླིང་ནི་རང་རེའི་གྲོང་ཁྱེར་གྱི་མཐོ་སློབ་དང་པོ་དེ་ཡིན་པ་དང་། རྣམ་གྲངས་འཛུགས་སྐྲུན་བྱ་ཡུལ་དུ་ལས་དོན་ཁག་གོ་རིམ་ལྡན་པའི་ངང་སྤེལ་བཞིན་ཡོད། ཟླ་བ་ཚེ་རིང་གིས་སློབ་གླིང་གི་འཛུཌ་སྐྲུན་འཕེལ་རིམ་དང་སློབ་གཉེར་གཞི་ཁྱོན། ཆེད་ལས་བཀོད་སྒྲིག་སོགས་ཀྱི་གནས་ཚུལ་མཁྱེན་རྟོགས་ཞིབ་ཕྲ་གནང་བ་རེད། ཁོང་གིས། སྤུས་ཚད་མཐོ་ལ་ཕན་འབྲས་ཆེ་བའི་སྒོ་ནས་རྣམ་གྲངས་འཛུཌ་སྐྲུན་ལ་སྐུལ་འདེད་གཏོང་བ་དང་བདེ་འཇགས་ཐོན་སྐྱེད་ཀྱི་འགན་འཁྲི་དོན་འཁྱོལ་ནན་པོ་བྱས་ཏེ་ལས་གྲྭ་སྤུས་འབོར་གཉིས་ལྡན་གྱི་སྒོ་ནས་དུས་བཀག་ལྟར་ལེགས་གྲུབ་ཐུབ་རྒྱུར་འགན་ལེན་བྱེད་དགོས་པ། བོད་སྐྱོར་ཞིང་ཆེན་དང་གྲོང་ཁྱེར། ཁེ་ལས་བཅས་དང་སྦྲེལ་མཐུད་བྱ་རྒྱུར་ཤུགས་སྣོན་བརྒྱབ་སྟེ་ཐབས་མང་མཉམ་སྤྱོད་ཀྱིས་དགེ་རྒན་གྱི་སྟོབས་ཤུགས་ནུས་པ་འདོན་སྤེལ་བྱས་ནས་སློབ་གྲྭ་ཆུ་ཚད་ཡོད་པ་དང་ཁྱད་ཆོས་ལྡན་པ་ཞིག་ཏུ་གཉེར་རྒྱུར་རྨང་གཞི་ཡག་པོ་འདིང་དགོས་པ། ངེས་གནས་གནད་ལ་འཁེལ་བ་དང་ལེགས་ཆ་མངོན་གསལ་དོད་པ། ཁྲོམ་རའི་དགོས་མཁོ་དང་གནད་སྨིན་སྦྲེལ་མཐུད་བྱེད་པ། ཚན་རིག་དང་མཐུན་པའི་སྒོ་ནས་ཆེད་ལས་བཀོད་སྒྲིག་བྱེད་པ། ས་གནས་ཀྱི་འཕེལ་རྒྱས་ལ་ཞབས་འདེགས་དེ་བས་ལེགས་པ་ཞུ་བ་བཅས་བྱེད་དགོས་པའི་ནན་གསུང་གནང་བ་རེད།

ཟླ་བ་ཚེ་རིང་གིས་གཞིས་ཀ་རྩེ་ཕྱིར་གཏོང་དངོས་ཟོག་ཞིབ་བཤེར་བྱ་ཡུལ་དུ་ཕེབས་ནས་གཞིས་ཀ་རྩེ་རྒྱལ་སྤྱིའི་སྐམ་སའི་གྲུ་ཁའི་འཆར་འགོད་བཟོ་བ་དང་གསར་སྤེལ་འཛུགས་སྐྲུན། དེ་བཞིན་གཞིས་ཀ་རྩེའི་དཔལ་འབྱོར་གསར་སྤེལ་ཁུལ་གྱི་རྨང་གཞིའི་སྒྲིག་བཀོད་ལེ་ལག་ཚང་སྒྲིག  ཚོང་འགུགས་མ་འདྲེན་སོགས་ཀྱི་ལས་དོན་སྤེལ་ཚུལ་བཀའ་འདྲི་ཞིབ་ཕྲ་གནང་བ་རེད།  ཁོང་གིས། རྒྱལ་ཁབ་ཀྱི་ལས་དོན་ཁྱོན་ཡོངས་དང་རང་སྐྱོང་ལྗོངས་ཀྱི་ཕྱི་ཕྱོགས་སྒོ་དབྱེའི་ལས་དོན་ཁྱོན་ཡོངས་ལ་རང་རྟོགས་ངང་བརྩི་སྲུང་དང་ཞབས་འདེགས་ཞུས་ནས་ཨེ་ཤེ་ཡ་ལྷོ་མར་ཕྱོགས་པའི་སྒོ་དབྱེའི་ཁྲོད་ཀྱི་གཞིས་ཀ་རྩེའི་འགན་འཁྲི་དང་ངེས་གནས། ལས་འགན་བཅས་ཁོང་དུ་ཡང་དག་ཆུད་པ་བྱེད་པ། འདུ་ཤེས་གསར་བརྗེས་དང་དངོས་འཛིན་དངོས་སྒྲུབ་ཀྱིས་རྣམ་གྲངས་འཛུགས་སྐྲུན་གྱི་ལས་དོན་ལ་དམ་འཛིན་ཏན་ཏིག་བྱས་ཏེ་གཞིས་ཀ་རྩེ་རྒྱལ་སྤྱིའི་སྐམ་སའི་གྲུ་ཁའི་༢༠༢༤ལོའི་གཙོ་གནད་ལས་འགན་སྤུས་འབོར་གཉིས་ལྡན་གྱི་སྒོ་ནས་དུས་ཐོག་ཏུ་ལེགས་གྲུབ་ཐུབ་རྒྱུར་འགན་ལེན་བྱེད་དགོས་པའི་ནན་གསུང་གནང་བ་རེད།

ཧྭ་ཏན་བསམ་གྲུབ་རྩེ་ཆུས་ཆུ་མིག་ཀྲའོ་ཝ་༩༠ཡི་འོད་ཤུགས་གློག་གཏོང་རྣམ་གྲངས་འཛུགས་སྐྲུན་བྱ་ཡུལ་དུ། ཟླ་བ་ཚེ་རིང་གིས་རྣམ་གྲངས་འཛུགས་སྐྲུན་གྱི་འཕེལ་རིམ་དང་མང་ཚོགས་ལ་འབབ་འཕར་ཡོང་རྒྱུར་སྐུལ་ཁྲིད་བྱེད་པ་སོགས་ཀྱི་གནས་ཚུལ་མཁྱེན་རྟོགས་ཞིབ་ཕྲ་གནང་བ་མ་ཟད། གྲོང་ཁྱེར་ཡོངས་ཀྱི་ནུས་རྒྱུ་གཙང་མ་འཕེལ་རྒྱས་འགྲོ་ཚུལ་གྱི་སྙན་ཞུ་ནན་ཏན་ངང་གསན་པ་རེད། རིམ་ཁག་སྡེ་ཚན་ཁག་གིས་མཐུན་སྦྱོར་གཞོགས་འདེགས་ལ་སྔར་བས་ཤུགས་སྣོན་རྒྱག་པ་དང་དུས་བཀག་ལྟར་ཞིབ་འཇུག་ལ་སྐུལ་འདེད་གཏོང་བ། གནད་དོན་དུས་ཐོག་ཏུ་ཐག་གཅོད་བཅས་བྱས་ཏེ་རྣམ་གྲངས་སྔ་ཙམ་བསྐྲུན་ཟིན་ནས་བེད་སྤྱོད་ཐུབ་རྒྱུར་འགན་ལེན་བྱེད་དགོས་ཞེས་གསུངས་པ་རེད། ཁོང་གིས། ད་དུང་ཧྭ་ཏན་ཚོགས་པས་གཞུང་ཁོངས་ཁེ་ལས་ཀྱི་འགན་འཁྲི་མུ་མཐུད་འཁུར་རྒྱུ་རྒྱུན་འཁྱོངས་དང་གཞིས་ཀ་རྩེའི་ནུས་རྒྱུ་གཙང་མ་གསར་སྤེལ་ནང་ཧུར་ཐག་ཞུགས་ནས་ས་གནས་དེ་གའི་མང་ཚོགས་ལས་ཞུགས་གཞན་སྒྱུར་ཐུབ་རྒྱུར་སྐུལ་ཁྲིད་རྒྱ་ཁྱབ་བྱས་ཏེ་གཞིས་ཀ་རྩེའི་དཔལ་འབྱོར་སྤུས་ཚད་མཐོ་པོའི་ངང་འཕེལ་རྒྱས་འགྲོ་རྒྱུར་རམ་འདེགས་བྱ་རྒྱུའི་ཐུགས་རེ་ཡང་གནང་བ་རེད།

ཟླ་བ་ཚེ་རིང་གིས། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱ་རྒྱུ་མཐའ་འཁྱོངས་བྱས་ཏེ་སྤུས་ཚད་མཐོ་བའི་འཕེལ་རྒྱས་དང་ཆུ་ཚད་མཐོ་བའི་བདེ་འཇགས་ལ་སྔར་བས་སྤྱི་འདོམས་བྱེད་པ། སྤྱོད་ཚུལ་ལེགས་གཏོང་དང་དོན་འཁྱོལ་ལ་དམ་འཛིན་ནན་པོ་བྱས་ཏེ་གཞིས་ཀ་རྩེའི་དོན་དངོས་དང་འཚམ་པའི་སྤུས་ཚད་མཐོ་བའི་འཕེལ་རྒྱས་ཀྱི་ལམ་བུར་ཧུར་ཐག་བསྐྱོད་དགོས་པ། ས་མཐོའི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ཀྱི་ལས་འགན་གསར་པ་དང་བླང་བྱ་གསར་པར་དམིགས་པ་དང་། དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་ལ་ཚོད་འཛིན་བཟོ་བའི་མི་འབོར་དང་མི་སེམས། ཤེས་ལྡན་མི་སྣ་བཅས་ཀྱི་གནད་དོན་ཐག་གཅོད་བྱ་རྒྱུར་དམིགས་པ། ཀུན་སྤྱོད་ལ་བརྟེན་ནས་མི་སྣ་གསོ་སྐྱོང་བྱ་རྒྱུ་དེ་རྩ་བའི་ལས་འགན་དུ་བརྩི་བ། རང་རེའི་གྲོང་ཁྱེར་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་དགོས་མཁོར་གཞི་ཚུགས་པ། ལས་རིགས་སློབ་གསོ་སྤུས་ཚད་མཐོ་བའི་ངང་འཕེལ་རྒྱས་འགྲོ་རྒྱུར་སྐུལ་འདེད་ཏན་ཏིག་གཏོང་བ་བཅས་བྱས་ཏེ་དོན་ཆེན་བཞི་དང་འཛུགས་གཏོད་བཞིར་སྐུལ་འདེད་གཏོང་ཆེད་སྲ་ཞིང་བརྟན་པའི་ཤེས་ལྡན་མི་སྣའི་འདེགས་སྐྱོར་བྱེད་དགོས་པ། ལེགས་ཆ་འདོན་སྤེལ་གང་ལེགས་བྱས་ཏེ་གཞིས་ཀ་རྩེའི་ཕྱི་ཕྱོགས་ལ་སྒོ་མོ་འབྱེད་པའི་ཆུ་ཚད་མཐོ་རུ་ཧུར་ཐག་གཏོང་བ། ཐུན་མོང་མ་ཡིན་པའི་ས་བབ་དང་ས་ཁམས། སྤྱི་ཚོགས་ཀྱི་རིག་གནས་སྣང་ཚུལ་སྣ་ཚོགས་བཅས་ཀྱི་ལེགས་ཆར་གཞི་ཚུགས་ཏེ་གཞིས་ཀ་རྩེ་འཕེལ་རྒྱས་གཏོང་རྒྱུ་དེ་རྒྱལ་ཁབ་ཀྱི་རྒྱུད་གཅིག་ལམ་གཅིག་ནང་ཕན་ཚུན་འབྲེལ་མཐུད་དང་ཕྱི་ཕྱོགས་ལ་སྒོ་མོ་འབྱེད་པའི་སྤྱིའི་བཀོད་ཇུས་ནང་རང་རྟོགས་ངང་བཅུག་ནས་རྒྱལ་སྤྱིའི་སྐམ་སའི་གྲུ་ཁའི་ལེ་ལག་ཚང་སྒྲིག་གི་སྒྲིག་བཀོད་འཛུགས་སྐྲུན་བྱེད་མགྱོགས་སུ་གཏོང་རྒྱུ་དང་གཞིས་ཀ་རྩེའི་དཔལ་འབྱོར་གསར་སྤེལ་ཁུལ་གྱི་ཇུས་བཀོད་ལེགས་སུ་གཏོང་བ། ཐོན་ལས་མཉམ་འགུལ་འཕེལ་རྒྱས་ལ་སྐུལ་འདེད་ཤུགས་ཆེན་གཏོང་བ་བཅས་བྱས་ཏེ་ཆུ་ཚད་མཐོ་བའི་ཕྱི་ཕྱོགས་ལ་སྒོ་མོ་འབྱེད་པར་བརྟེན་ནས་སྤུས་ཚད་མཐོ་བའི་འཕེལ་རྒྱས་ལ་རམ་འདེགས་བྱེད་དགོས་པ། ཚོང་འགུགས་མ་འདྲེན་ལ་དམ་འཛིན་ཡག་པོ་དང་བྱ་ཐབས་གསར་གཏོད་བྱེད་པ། བོད་སྐྱོར་ཚོང་འགུགས་བྱེད་ཤུགས་ཆེ་རུ་གཏོང་བ་བཅས་བྱས་ཏེ་རང་འགུལ་ངང་རྣམ་གྲངས་སྤུས་ལེགས་གླིང་ཁུལ་དུ་བཅའ་སྡོད་དང་གླིང་ཁུལ་དུ་གཞིས་ཆགས་པར་བརྩོན་ལེན་བྱས་ཏེ་ཐོན་ལས་ཚོགས་སྤྱིའི་འཕེལ་རྒྱས་ལ་སྐུལ་འདེད་གཏོང་དགོས་པ། ནུས་ཁུངས་གཙང་མའི་ཐོན་ལས་འཕེལ་རྒྱས་ཤུགས་ཆེན་བཏང་སྟེ་ཆུ་ནུས་དང་འོད་ནུས། རླུང་ནུས། ཚ་ནུས་བཅས་ཕན་ཚུན་གསབ་རེས་དང་གློག་ཤུགས་འཁོར་སྐྱོད་བྱེད་སྟངས་གསར་པ་གཞི་གཅིག་ཏུ་འགྱུར་བའི་གསར་སྤེལ་མཐའ་འཁྱོངས། ཐོན་ཁུངས་ཀྱི་ཁྱད་ཆོས་གཞིར་བཟུང་སྟེ་ཐོན་ཁུངས་ཀྱི་མི་མངོན་པའི་ནུས་ཤུགས་སྔོག་འདོན་དང་ཚན་རིག་དང་མཐུན་པའི་སྒོ་ནས་བཀོད་སྒྲིག་བཅས་བྱས་ཏེ་ལྗང་མདོག་ཐཱན་ཉུང་གི་འཐབ་ཇུས་རང་བཞིན་ལྡན་པའི་གསར་དར་ཐོན་ལས་མ་ལག་འཛུགས་སྐྱོང་གང་མགྱོགས་བྱ་དགོས་པའི་ནན་གསུང་གནང་བ་རེད།

  ཝང་ཧྥང་ཧུང་དང་བེང་དབྱིད་ཧའོ། ལའེ་ཡུང་ཅན། པ་སངས། མུའུ་ཤིང་པིན་བཅས་བརྟག་ཞིབ་ལ་མཉམ་དུ་ཞུགས་ཡོད་པ་རེད།

 (ཚེ་དབྱངས་དང་བདེ་སྐྱིད་ཀྱིས་བསྒྱུར་)