༢༠༢༣ལོར། ས་དགའ་རྫོང་གིས་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་མཛད་ཕྱོགས་སྲིད་ཇུས་གལ་ཆེན་དང་། རང་སྐྱོང་ལྗོངས་ཏང་ཨུད་དང་གྲོང་ཨུད་ཀྱི་ཐབས་ཇུས་བཀོད་སྒྲིག་ལག་བསྟར་དོན་འཁྱོལ་ནན་ཏན་བྱས་ཏེ་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་རྒྱུ་དེ་ལས་འགན་ཨང་དང་པོར་བརྩིས་ནས་གཙོ་གནད་ལ་དམིགས་པ་དང་ནུས་ཤུགས་ཡོད་རྒུས་འགག་སྒྲོལ་བྱས་ཡོད། རིམ་ཁག་འབྲེལ་ཡོད་སྡེ་ཚན་ཁག་གིས་རྣམ་གྲངས་ལ་དམ་འཛིན་བྱེད་པ་ནི་འཕེལ་རྒྱས་ལ་དམ་འཛིན་བྱེད་པ་ཞིག་དང་འཕེལ་རྒྱས་ལ་དམ་འཛིན་བྱེད་པར་ངེས་པར་དུ་རྣམ་གྲངས་ལ་དམ་འཛིན་བྱེད་དགོས་པའི་འདུ་ཤེས་བརྟན་པོ་བཙུགས་ནས་གཅིག་འགྱུར་འཆར་འགོད་དང་རྣམ་གྲངས་འཛུགས་སྐྲུན་ལ་སྐུལ་འདེད་མགྱོགས་སུ་བཏང་ཡོད། རྫོང་ཡོངས་སུ་རྨང་གཞིའི་འཛུགས་སྐྲུན་རྣམ་གྲངས་༡༢༧ལག་བསྟར་བྱས་པ་དེར་ཁྱོན་མ་དངུལ་སྒོར་དུང་ཕྱུར་༡༡.༢༨བཏང་ཡོད་ཅིང་། དེའི་ནང་གསར་དུ་བསྐྲུན་པའི་རྣམ་གྲངས་༨༢ཡོད་པར་ཁྱོན་མ་དངུལ་སྒོར་དུང་ཕྱུར་༧.༤༢བཏང་བ། རྒྱུན་མཐུད་འཛུགས་སྐྲུན་རྣམ་གྲངས་༤༥ཡོད་པར་ཁྱོན་མ་དངུལ་སྒོར་དུང་ཕྱུར་༣.༨༦བཏང་ཡོད། རྣམ་གྲངས་དེ་དག་བསྐྲུན་ཟིན་རྗེས་ས་དགའ་རྫོང་གི་དཔལ་འབྱོར་འཕེལ་རྒྱས་ལ་གསོན་ཤུགས་གསར་པ་བསྣན་རྒྱུ་རེད། 

ས་དགའ་རྫོང་འཕེལ་སྒྱུར་ཨུ་ལྷན་གྱི་ཀྲུའུ་རེན་གཞོན་པ་ཕུར་བུ་རྣམ་རྒྱལ་གྱིས། ༢༠༢༣ལོར་ས་དགའ་རྫོང་གིས་བརྟན་ཐོག་ཡར་འཕེལ་གྱི་ལས་ཀའི་རྩ་བའི་རྩ་དོན་མཐའ་འཁྱོངས་ཀྱིས་གོ་སྐབས་དམ་འཛིན་དང་འབད་འབུངས་ཡར་བརྩོན་བྱས་ནས་རྫོང་ཁོངས་ཀྱི་དཔལ་འབྱོར་སྤྱི་ཚོགས་སྤུས་ཚད་མཐོ་པོའི་ངང་འཕེལ་རྒྱས་འགྲོ་རྒྱུར་ནུས་ཤུགས་ཡོད་རྒུས་སྐུལ་འདེད་བཏང་ཡོད་ཅེས་བརྗོད། 

རྣམ་གྲངས་འཛུགས་སྐྲུན་དོ་དམ་ལ་ཤུགས་སྣོན་རྒྱག་ཆེད། ས་དགའ་རྫོང་གིས་འགོ་ཁྲིད་ཀྱིས་འགན་ལེན་བྱེད་པ་དང་ཆེད་ཚན་གྱིས་ཞབས་ཞུ་སྒྲུབ་པ། དུས་བཀག་ལྟར་བཀོད་གཏོང་བྱེད་པ། ནུས་ཤུགས་ཡོད་རྒུས་སྐུལ་འདེད་གཏོང་བ་བཅས་ཀྱི་རྩ་དོན་དང་། རྣམ་གྲངས་གཅིག་དང་འགོ་ཁྲིད་གཅིག ཇུས་གཞི་གཅིག  དམ་འཛིན་མཐའ་འཁྱོངས་གཅིག་བཅས་ཀྱི་བྱ་ཐབས་ལ་གཞིགས་ནས་ནུས་ཤུགས་ཡོད་རྒུས་སྐུལ་འདེད་བཏང་བས། འགོ་ཁྲིད་ཀྱིས་རྣམ་གྲངས་འགན་ལེན་བྱེད་རྒྱུ་ཁྱོན་ཡོངས་ལ་ཁྱབ་ཐུབ་པ་བྱུང་སྟེ་རྣམ་གྲངས་བདེ་བླག་ངང་སྤེལ་རྒྱུར་འགན་ལེན་ཐུབ་ཡོད། དུས་མཚུངས་སུ། མཉམ་འབྲེལ་ཞིབ་བཤེར་དང་མཉམ་འབྲེལ་ཆོག་མཆན་འགོད་པ། མཉམ་འབྲེལ་རྩིས་ལེན་བྱེད་པ་བཅས་ཀྱི་ལམ་སྲོལ་འཐུས་ཚང་ཐོག་བཙུགས་ནས་རྣམ་གྲངས་དོ་དམ་སྔར་བས་ཚད་ལྡན་དུ་བཏང་ཡོད།

༢༠༢༣ལོར། ས་དགའ་རྫོང་གིས་ཚོང་འགུགས་བྱ་ཐབས་ཟམ་མི་ཆད་པར་གསར་གཏོད་བྱས་ནས་ས་བབ་ཀྱི་ལེགས་ཆ་དང་ཐོན་ཁུངས་ཀྱི་སྤུས་ཚད་ལ་གཞིགས་ཏེ་ཁེ་ལས་ཀྱིས་མ་དངུལ་འཇོག་པའི་ནང་ཧུར་ཐག་ཞུགས་ཡོད། ལོ་ཧྲིལ་པོར་ཚོང་འགུགས་མ་འདྲེན་རྣམ་གྲངས་༤ལེགས་སྒྲུབ་བྱས་པ་དང་མ་དངུལ་བསྡོམས་འབོར་སྒོར་དུང་ཕྱུར་༢.༦བཏང་བས། ས་གནས་དེ་གའི་མང་ཚོགས་ཀྱི་ལས་ཞུགས་གནད་དོན་ཐག་གཅོད་ནུས་ལྡན་ཐུབ་པ་དང་ས་དགའ་རྫོང་གི་དཔལ་འབྱོར་འཕེལ་རྒྱས་ལ་སྐུལ་ཁྲིད་ནུས་ལྡན་ཐུབ་ཡོད། 

དཔལ་འབྱོར་བརྟན་པོའི་ངང་འཕེལ་རྒྱས་མགྱོགས་པོ་ཕྱིན་པ་དང་ཆབས་ཅིག་ས་དགའ་རྫོང་གིས་ད་དུང་དམངས་འཚོའི་བདེ་སྐྱིད་ཚོར་སེམས་གོང་མཐོར་གཏོང་རྒྱུར་སྣང་ཆེན་བྱས་པས། མི་རེའི་ཆ་སྙོམས་ཡོང་འབབ་ལོ་རེ་བཞིན་མང་དུ་ཕྱིན་པ་དང་མི་དམངས་མང་ཚོགས་ཀྱི་ཐོབ་སྣང་དང་སྐྱིད་སྣང་། བདེ་སྣང་བཅས་ཟམ་མི་ཆད་པར་ཆེ་རུ་ཕྱིན་ཡོད།

ས་དགའ་རྫོང་སྐྱ་སྐྱ་གྲོང་རྡལ་རྒྱལ་གྲོང་ཚོའི་ཧྲུའུ་ཅི་ཨང་དང་པོ་རྟ་མགྲིན་ཟླ་བས་གསར་འགོད་པར། ༢༠༢༣ལོར་ས་དགའ་རྫོང་གི་དཔལ་འབྱོར་སྤྱི་ཚོགས་འཕེལ་རྒྱས་བརྟན་ཐོག་ཡར་འཕེལ་བྱུང་བ་དང་ལྷག་པར་དུ་ཞིང་འབྲོག་པ་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར་༡༥༧༡༢ཟིན་པ་དེ་དུས་མཚུངས་པ་ལས་བརྒྱ་ཆ་༡༢འཕར་ཡོད། གྲུབ་འབྲས་དེ་དག་ནི་མིག་མཐོང་ལག་ཟིན་ཐུབ་ཡོད། གོམ་སྟབས་རྗེས་མའི་ལས་དོན་ཁྲོད། རང་ཉིད་གྲོང་ཚོའི་ཧྲུའུ་ཅི་ཨང་དང་པོ་ཡིན་པའི་ངོས་ནས་འབད་འབུངས་ཡར་བརྩོན་གྱི་སྙིང་སྟོབས་དང་དོན་གཉེར་ལག་བསྟར་ཤུགས་ཆེན། ལས་དོན་ཏན་ཏིག་སྒྲུབ་པ་བཅས་ཀྱི་ངར་ཤུགས་ལ་བརྟེན་ནས་འདི་ལོའི་ས་དགའ་རྫོང་གི་དཔལ་འབྱོར་སྤྱི་ཚོགས་འཕེལ་རྒྱས་ནུས་ལྡན་དང་ལུགས་མཐུན་ངང་འཕེལ་རྒྱས་འགྲོ་རྒྱུར་འབད་བརྩོན་བྱ་རྒྱུ་ཡིན་ཞེས་བརྗོད། 

འབྱུང་འགྱུར་ལ་རྒྱང་ལྟ་བྱེད་སྐབས། ས་དགའ་རྫོང་གིས་གྲོང་ཨུད་དང་གྲོང་ཁྱེར་སྲིད་གཞུང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག   མཐུན་སྒྲིལ་རྡོག་རྩ་གཅིག་སྒྲིལ་དང་དམ་པ་དོན་གཉེར། དོན་ཐོག་ཏུ་འཁྱོལ་བ་བཅས་དུས་ཚོད་སྐར་ཆ་ཙམ་ཡང་བརྩོན་ལེན་བྱེད་པ། འབད་འབུངས་ཡར་བརྩོན་གྱི་འཐབ་རྩོད་ཉམས་འགྱུར་དང་གྲུབ་འབྲས་ལ་བརྟེན་ནས་རང་ཉིད་ཀྱིས་ལྷག་བསམ་རྣམ་དག་ངང་འགན་འཁྲི་འཁུར་ནས་ལས་དོན་ཁག་དོན་འཁྱོལ་ཞིབ་ཚགས་ཐུབ་པའི་འགན་ལེན་བྱས་ཏེ་ས་ཁོངས་ཀྱི་ལྟེ་བ་ཕལ་པའི་གྲོང་ཁྱེར་དང་ཨེ་ཤེ་ཡ་ལྷོ་མར་ཕྱོགས་པའི་སྒོ་དབྱེའི་ལྟེ་བའི་གྲོང་ཁྱེར་སྐྲུན་མགྱོགས་སུ་གཏོང་ཆེད། ས་དགས་འབུལ་འོས་པའི་ལེགས་སྐྱེས་ཕུལ་ནས་དུས་རབས་གསར་པའི་ས་དགའི་སྤུས་ཚད་མཐོ་བའི་འཕེལ་རྒྱས་ཀྱི་ལེའུ་གསར་པ་ཞིག་ཧུར་ཐག་བརྩམ་རྒྱུ་ཡིན།

ས་དགའ་རྫོང་འཕེལ་སྒྱུར་ཨུ་ལྷན་གྱི་ཀྲུའུ་རེན་གཞོན་པ་ཕུར་བུ་རྣམ་རྒྱལ་གྱིས། གོམ་སྟབས་རྗེས་མའི་ལས་དོན་ཁྲོད། མུ་མཐུད་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པས་མཛུབ་ཁྲིད་དུ་བྱ་རྒྱུ་མཐའ་འཁྱོངས་བྱེད་པ། འདི་ལོའི་ལས་དོན་རེ་རེ་བཞིན་དམ་འཛིན་ཞིབ་ཚགས་དང་དམ་འཛིན་ཏན་ཏིག་བྱས་ཏེ་ལོ་ཧྲིལ་པོའི་དམིགས་ཚད་ལེགས་སྒྲུབ་འགན་ལེན་བྱེད་པ། སྤུས་ཚད་མཐོ་བའི་འཕེལ་རྒྱས་ཀྱི་ཕན་འབྲས་དངོས་ལ་བརྟེན་ནས་རྫོང་ཡོངས་ཀྱི་དཔལ་འབྱོར་འཕེལ་རྒྱས་ཁྲོད་འགན་འཁྲི་དེ་བས་ཆེ་བ་འཁུར་ཐུབ་པ་བྱས་ཏེ་ལེགས་སྐྱེས་དེ་བས་ཆེ་བ་འབུལ་རྒྱུ་ཡིན་བརྗོད། 

 (པ་སངས་ཚེ་རིང་གིས་བསྒྱུར་)