སྤྱི་ཟླ་༧པའི་ཚེས་༡༦ཉིན། སྡོད་ཁང་འཛུགས་སྐྲུན་ཁྱབ་ཁོངས་ཀྱི་བོད་སྐྱོར་ལས་དོན་གྱི་འབྲེལ་མཐུད་བཞུགས་མོལ་ཚོགས་འདུ་དང་གཞིས་ཀ་རྩེའི་སྡོད་ཁང་འཛུགས་སྐྲུན་ལ་རོགས་སྐྱོར་བྱེད་པའི་ཤེས་ལྡན་མི་སྣའི་འཇོན་ནུས་མཐོར་གཏོང་ལས་གྲྭའི་འགོ་ཚུགས་མཛད་སྒོ་དེ་གཞིས་ཀ་རྩེ་གྲོང་ཁྱེར་སྡོད་ཁང་འཛུགས་སྐྲུན་ཅུད་དུ་འཚོགས་པ་རེད།

ཧྲན་ཏུང་ཞིང་ཆེན་སྡོད་ཁང་འཛུཌ་སྐྲུན་ཐིང་ཏང་ཙུའུ་ཡི་ཧྲུའུ་ཅི་རེན་ཧའེ་ཐའོ་མཛད་སྒོར་ཞུགས་པ་མ་ཟད་གསུང་བཤད་ཀྱང་གནང་བ་རེད། གྲོང་ཨུད་ཀྱི་ཧྲུའུ་ཅི་གཞོན་པ། རྒྱུན་ལས་གྲོང་སྤྱི་གཞོན་པ་ཁྲེན་ཀེང་གིས་མཛད་སྒོ་གཙོ་སྐྱོང་གནང་བ་རེད།

གཞིས་ཀ་རྩེ་གྲོང་ཁྱེར་སྡོད་ཁང་འཛུགས་སྐྲུན་ཅུད་ཀྱི་འབྲེལ་ཡོད་འགོ་ཁྲིད་ཀྱི་ལས་ཀའི་གནས་ཚུལ་སྙན་ཞུ་གསན་རྗེས། ཕྱོགས་གཉིས་པོས་《ག་སྦྱར་རོགས་སྐྱོར་གྱི་མཉམ་ལས་གྲོས་མཐུན་》ལ་མིང་རྟགས་བཀོད་དེ་སྡོད་ཁང་འཛུགས་སྐྲུན་གྱི་ཤེས་ལྡན་མི་སྣ་མཐོར་གཏོང་འདུ་འགོད་དངོས་སུ་ལག་ལེན་བསྟར་འགོ་ཚུགས་པ་རེད། མཛད་སྒོའི་ཐོག་ཧྲན་ཏུང་ཞིང་ཆེན་སྡོད་ཁང་འཛུགས་སྐྲུན་ཐིང་གིས་རང་རེའི་གྲོང་ཁྱེར་ལ་《ཀྲུང་གོའི་སྲོལ་རྒྱུན་རིག་གནས་ཀློག་དེབ་》དང་ཇི་ལུའུ་གསར་བརྗེའི་སྡེ་ལས་ཀྱི་འབྲེལ་ཡོད་དཔྱད་གཞིའི་ཡིག་རིགས་ཞལ་འདེབས་ཕུལ་བ་རེད།

རེན་ཧའེ་ཐའོ་ཡིས་ཧྲན་ཏུང་ཞིང་ཆེན་སྡོད་ཁང་འཛུགས་སྐྲུན་ཐིང་གིས་དུས་རབས་གསར་པའི་ཏང་གི་བོད་སྐྱོང་མཛད་ཇུས་སློབ་སྦྱོང་དང་ལག་བསྟར་གཏིང་ཟབ་བྱས་ནས་གཞིས་ཀ་རྩེའི་དགོས་མཁོ་དང་ཧྲན་ཏུང་སྡོད་ཁང་འཛུགས་སྐྲུན་གྱི་ནུས་པ། བཅའ་སྡོད་བྱ་ཡུལ་མང་ཚོགས་ཀྱི་རེ་སྒུག་བཅས་ལ་གཞི་ཚུགས་ཏེ་ཐོན་ལས་དང་ལག་རྩལ། ག་སྦྱར་རོགས་སྐྱོར། མཉམ་ལས་བྱེད་པ་བཅས་ལས་དོན་སྤེལ་རེས་བྱེད་ཤུགས་མུ་མཐུད་ཆེ་རུ་བཏང་ནས་ལུའུ་བོད་མཉམ་ལས་བྱས་པ་ལས་སྡོད་ཁང་འཛུགས་སྐྲུན་ཁྱབ་ཁོངས་སུ་སླར་ཡང་གཡུར་ཟའི་གྲུབ་འབྲས་ཐོབ་པ་དང་རྣམ་པ་གསར་པ་གཏོད་རྒྱུར་རམ་འདེགས་བྱ་རྒྱུ་ཡིན་ཞེས་གསུང་པ་རེད།

ཁྲེན་ཀེང་གིས། ལོ་༣༠ཡི་རིང་། ཧྲན་ཏུང་ཞིང་ཆེན་སྡོད་ཁང་འཛུགས་སྐྲུན་ཐིང་གིས་ཞིང་ཆེན་ཡོངས་ཀྱི་སྡོད་ཁང་འཛུགས་སྐྲུན་ཁོངས་གཏོགས་ཀྱི་ནུས་ཤུགས་ཡོད་རྒུ་བཏོན་ནས་གཞིས་ཀ་རྩེའི་གྲོང་ཁྱེར་དང་གྲོང་གསེབ་ཀྱི་རྣམ་པར་གནམ་ས་བླ་འོག་ཏུ་འགྱུར་བ་ལྟ་བུའི་འགྱུར་ལྡོག་གཏོང་ཆེད། ཧྲན་ཏུང་སྡོད་ཁང་འཛུགས་སྐྲུན་གྱི་སྟོབས་ཤུགས་ལེགས་སྐྱེས་སུ་ཕུལ་ཡོད་ཅིང་། ལུའུ་བོད་སྡོད་ཁང་འཛུགས་སྐྲུན་ཁོངས་གཏོགས་ཀྱིས་ཕན་ཚུན་རོགས་སྐྱོར་དང་ཕན་ཚུན་དཔྱད་གཞིར་འཛིན་པ། ཇི་ལུའུ་དང་ས་མཐོའི་ལས་བྱེད་པ་དང་མང་ཚོགས་དབར་སྤེལ་རེས་དང་མཉམ་འདྲེས་བྱེད་པའི་འབྲེལ་ཟམ་བཙུགས་ཡོད་ཅེས་གསུངས།

ཤེས་རྟོགས་བྱུང་བར་གཞིགས་ན། ད་ཐེངས་ཀྱི་སྡོད་ཁང་འཛུགས་སྐྲུན་གྱི་ཤེས་ལྡན་མི་སྣའི་འཇོན་ནུས་མཐོར་གཏོང་ལས་གྲྭའི་འཆར་གཞིར་ལོ་གསུམ་རིང་གཅིག་སྡུད་གསོ་སྦྱོང་དང་གཅིག་གཏད་གཅིག་གི་ཆ་སྒྲིག་རོགས་སྐྱོར། སྒོ་འགྲམ་དུ་སློབ་ཁྲིད། རྒྱང་ཁྲིད་སློབ་ཁྲིད་སོགས་བྱ་ཐབས་སྣ་ཚོགས་བརྒྱུད། གཞིས་ཀ་རྩེ་གྲོང་ཁྱེར་གྱི་སྡོད་ཁང་འཛུགས་སྐྲུན་ཁྱབ་ཁོངས་སུ་ཆེད་ལས་ལག་རྩལ་ཤེས་ལྡན་མི་སྣ་སྔར་བས་མང་བ་གསོ་སྐྱོང་བྱ་རྒྱུ་ཡིན་ཞིང་། དུས་ཐེངས་དང་པོར་ཧྲན་ཏུང་ཞིང་ཆེན་གྱི་འབྲེལ་ཡོད་རིགས་གཅིག་མཁས་ཅན་གྱིས་ལྗང་མདོག་རིག་ནུས་འཛུགས་སྐྲུན་དང་ལས་གྲྭའི་སྤུས་ཚད་དང་བདེ་འཇགས་སོགས་ཀྱི་ཐད་ཆེད་དོན་སློབ་ཁྲིད་བྱས་པ་རེད།

དེའི་རིང་། རེན་ཧའེ་ཐའོ་དང་བཅས་པས་ད་དུང་པ་སྣམ་རྫོང་དགའ་སྡོང་གྲོང་རྡལ་ཨ་ཡ་གྲོང་ཚོར་ཕེབས་ནས་གྲོང་གསེབ་དར་རྒྱས་དཔེ་སྟོན་གྲོང་ཚོ་འཛུགས་སྐྲུན་བྱས་ཚུལ་ལ་བརྟག་ཞིབ་གནང་བ་རེད།   

 (པ་སངས་ཆུང་བདག་གིས་བསྒྱུར་)