སྤྱི་ཟླ་༧པའི་ཚེས་༡༧ཉིན། གྲོང་ཨུད་ཀྱི་ཧྲུའུ་ཅི་གཞོན་པ། གྲོང་སྤྱི་ཝང་ཧྥང་ཧུང་གིས་གམ་པ་རྫོང་དུ་ཕེབས་ནས་རྣམ་གྲངས་འཛུགས་སྐྲུན་དང་གྲོང་གསེབ་དར་རྒྱས། སྐྱེ་ཁམས་ཁོར་ཡུག་སྲུང་སྐྱོང་། གཞི་རིམ་ཏང་འཛུགས་སྐྱོང་སོགས་ཀྱི་ལས་དོན་ལ་བརྟག་ཞིབ་གནང་བ་རེད།

ཝང་ཧྥང་ཧུང་གིས་སྔ་རྗེས་སུ་གམ་པ་རྫོང་གི་ཀྲའོ་ཝ་༥༠ཡི་དྲ་སྦྲེལ་འོད་དྲོད་དང་ཀྲའོ་ཝ་༤༤༨ཀྱི་འོད་ཤུགས་ནུས་མང་གསབ་རེས་གཞི་གཅིག་ཅན་གྱི་གློག་ཁང་གི་རྣམ་གྲངས་ལག་བསྟར་བྱ་ཡུལ་དང་གུར་མེ་ཤང་གནས་ཆེན་གྲོང་ཚོ། གྲང་རླུང་ཤང་ཐེ་བོང་གྲོང་ཚོ་ཨུ་ལྷན། རྫོང་འཕྲོད་བསྟེན་ཞབས་ཞུ་ལྟེ་གནས་ཀྱི་རྣམ་གྲངས་ལག་བསྟར་བྱ་ཡུལ། གམ་པ་གྲོང་རྡལ་དགོན་པ་གྲོང་ཚོའི་མང་ཚོགས་ཁྱིམ་ཚང་གི་ལུག་གསོ་ཚགས་ཆེད་ལས་མཉམ་ལས་ཁང་སོགས་སུ་ཕེབས་ནས་རྣམ་གྲངས་འཛུགས་སྐྲུན་གྱི་ས་གནས་ས་ཐོག་དང་གྲོང་ཚོ་ཨུ་ལྷན་གཉིས། མང་ཚོགས་ཀྱི་ཁྱིམ་ཚང་། ཐོན་ལས་རྟེན་གཞི་བཅས་སུ་རྣམ་གྲངས་འཛུགས་སྐྲུན་ལ་སྐུལ་འདེད་གཏོང་བའི་གནས་ཚུལ་ལ་གཟིགས་ཞིབ་གནང་བ་དང་སྦྲགས་ལྷག་བསྡད་པའི་དཀའ་གནད་མཐུན་སྦྱོར་ངང་ཐག་གཅོད་གནང་བ། གཞི་རིམ་ནུས་མེད་ཟབ་ཟོབ་ཀྱི་ཏང་རྩ་འཛུགས་བཅོས་སྒྲིག་དང་མཛེས་སྡུག་ལྡན་པའི་གནས་སྡོད་དང་འཚམ་པའི་གྲོང་ཚོ་གཏོད་པ། གམ་པའི་ལུག་གསོ་ཚགས་དང་དེ་བཞིན་མང་ཚོགས་ཀྱི་འབབ་འཕར་སོགས་ཀྱི་གནས་ཚུལ་མཁྱེན་རྟོགས་ཞིབ་ཕྲ་གནང་བ་མ་ཟད། རྫོང་སྲིད་གཞུང་དུ་བཞུགས་མོལ་ཚོགས་འདུ་འཚོགས་ནས་གམ་པ་རྫོང་གི་གཙོ་གནད་དཔལ་འབྱོར་ལས་དོན་ལ་བཀོད་སྒྲིག་ཀྱང་གནང་བ་རེད། ཁོང་གིས། གམ་པ་རྫོང་གིས་སྤུས་ཚད་མཐོ་བའི་འཕེལ་རྒྱས་ཀྱི་ལས་འགན་ལ་ཨང་དང་པོར་དམིགས་ཏེ་དཔལ་འབྱོར་འཁོར་རྒྱུག་གི་བཀོད་གཏོང་ལ་སྔར་བས་ཤུགས་སྣོན་རྒྱག་པ། དབྱེ་ཞིབ་ཞིབ་འཇུག་དང་རྒྱུན་གཏན་གྱི་ལས་དོན་སྒྲུབ་སྐུལ་ལ་ཤུགས་སྣོན་རྒྱག་པ། ཞིབ་ཕྲའི་བྱ་ཐབས་དོན་འཁྱོལ་བྱ་རྒྱུར་དམ་འཛིན་ནན་པོ་བྱེད་པ། རྣམ་གྲངས་འཛུགས་སྐྲུན་དང་ཐོན་ལས་འཕེལ་རྒྱས། དམངས་འཚོ་ལེགས་གཏོང་། བདེ་འཇགས་ཐོན་སྐྱེད་སོགས་གཙོ་གནད་ལས་དོན་ལ་ནུས་ཤུགས་ཡོད་རྒུས་སྐུལ་འདེད་གཏོང་བ་བཅས་བྱས་ཏེ་རྫོང་ཁོངས་ཀྱི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་ཧུར་ཐག་གཏོང་དགོས། རྣམ་གྲངས་ལ་དམ་འཛིན་བྱེད་པ་ནི་འཕེལ་རྒྱས་ལ་དམ་འཛིན་བྱེད་པ་ཞིག་ཡིན་པས། འཕེལ་རྒྱས་ལ་དམ་འཛིན་བྱེད་པར་ངེས་པར་དུ་རྣམ་གྲངས་ལ་དམ་འཛིན་བྱེད་པའི་འདུ་ཤེས་བརྟན་པོ་བཙུགས་ཏེ་དམིགས་ཚད་ལས་འགན་ལ་དམ་པོར་དམིགས་པ་དང་དུས་ཚོད་དང་ལྷུ་ཚིགས་ལ་དམ་པོར་དམིགས་པ། སྒྲུབ་སྐུལ་བཀོད་གཏོང་ལ་སྔར་བས་ཤུགས་སྣོན་རྒྱག་པ་བཅས་བྱས་ཏེ། བདེ་འཇགས་དང་སྤུས་ཚད་འགན་ལེན་བྱེད་པའི་སྔོན་འགྲོའི་ཆ་རྐྱེན་འོག  གཙོ་གནད་རྣམ་གྲངས་འཛུགས་སྐྲུན་བྱེད་མགྱོགས་སུ་གཏོང་རྒྱུར་ནུས་ཤུགས་ཡོད་རྒུས་སྐུལ་འདེད་གཏོང་དགོས་ཞེས་གསུངས་པ་རེད།

ཝང་ཧྥང་ཧུང་གིས་ཏང་འཛུགས་སྐྱོང་ལ་དམ་འཛིན་དང་གྲོང་གསེབ་དར་རྒྱས་ལ་སྐུལ་འདེད་གཏོང་རྒྱུ་ནི་གྲོང་གསེབ་དར་རྒྱས་ལ་ཕྱོགས་ཡོངས་ནས་སྐུལ་འདེད་གཏོང་བའི་ཆབ་སྲིད་ཀྱི་འགན་ལེན་ཞིག་ཡིན་པས།  ཏང་འཛུགས་སྐྱོང་ལ་བརྟེན་ནས་གྲོང་གསེབ་དར་རྒྱས་དང་གཞི་རིམ་བཅོས་སྐྱོང་ལས་དོན་ལ་ཁྲིད་སྟོན་བྱ་རྒྱུ་མཐའ་འཁྱོངས་བྱས་ཏེ་གཞི་རིམ་ཏང་རྩ་འཛུགས་ཀྱི་དམག་འཐབ་མཁར་རྫོང་གི་ནུས་པ་འདོན་སྤེལ་གང་ལེགས་བྱེད་པ། གཞི་རིམ་ལས་བྱེད་པའི་དཔུང་ཁག་འཛུགས་སྐྱོང་ལ་མུ་མཐུད་ཤུགས་སྣོན་རྒྱག་པ། ལམ་ལུགས་དང་ལམ་སྲོལ་གསར་གཏོད་དང་འཐུས་སྒོ་ཚང་དུ་གཏོང་བ། མང་ཚོགས་ལ་ཞབས་འདེགས་ཞུ་བའི་ནུས་པ་དང་ཆུ་ཚད་མཐོ་རུ་གཏོང་བ་བཅས་བྱས་ཏེ་གཞི་རིམ་ཏང་རྩ་འཛུགས་དེ་མང་ཚོགས་ཕྱུག་འགྱུར་གྱི་ལམ་སྣེ་ཁྲིད་མཁན་ཞིག་ཏུ་འགྱུར་བ་བྱེད་དགོས། ལས་གྲྭ་ཁྲི་སྟོང་མང་པོའི་ཉམས་མྱོང་སློབ་སྦྱོང་དང་དཔྱད་གཞིར་འཛིན་ནས་གནས་སྡོད་དང་འཚམ་པ་དང་ལས་རིགས་དང་འཚམ་པ། མཛེས་སྡུག་ལྡན་པའི་གྲོང་གསེབ་འཛུགས་སྐྲུན་བཅས་ལ་གཅིག་འགྱུར་འཆར་འགོད་ཐོག་སྐུལ་འདེད་གཏོང་བ། གྲོང་གསེབ་བཅོས་སྐྱོང་མ་ལག་འཐུས་སྒོ་ཚང་དུ་གཏོང་བ་བཅས་བྱས་ཏེ་གྲོང་གསེབ་ཕྱོགས་ཡོངས་ནས་དར་རྒྱས་ཡོང་རྒྱུར་སྐུལ་འདེད་ཏན་ཏིག་གཏོང་དགོས་ཞེས་གསུངས་པ་རེད།

གུར་མེ་ཤང་གི་གླ་ཚེར་ནགས་གླིང་དུ་ནགས་ཚལ་སྐོར་ཞིབ་ལས་དོན་སྤེལ་སྐབས། ཝང་ཧྥང་ཧུང་གིས་སྐྱེ་ཁམས་ཤེས་དཔལ་འཛུགས་སྐྱོང་གི་ཆབ་སྲིད་ཀྱི་ལས་འགན་མཐའ་གཅིག་ཏུ་འཁུར་ནས་ནགས་དཔོན་ལམ་ལུགས་ཀྱི་འགན་འཁྲི་དོན་འཁྱོལ་ནན་པོ་བྱེད་པ་དང་རྒྱུན་སྲིང་ལྷོད་མེད་ངང་སྔོ་ལྗང་སྲུང་སྐྱོང་དང་ལྗང་མདོག་དར་སྤེལ་གཏོང་བ། རྒྱལ་ཁབ་ཀྱི་ས་ཆ་སྔོ་འགྱུར་གྱི་ཆུ་ཚད་ཟམ་མི་ཆད་པར་མཐོ་རུ་གཏོང་བ་བཅས་བྱས་ཏེ་སྐྱེ་ཁམས་ཁོར་ཡུག་གི་སྤུས་ཚད་རྒྱུན་མཐུད་ངང་ལེགས་སུ་འགྲོ་རྒྱུར་ནུས་ཤུགས་ཡོད་རྒུས་སྐུལ་འདེད་གཏོང་དགོས་ཞེས་གསུངས་པ་རེད། 

(ཚེ་དབྱངས་ཀྱིས་བསྒྱུར་)