ཞིང་འབྲོག་མང་ཚོགས་ཚོའི་རྒྱལ་ཁབ་ཀྱི་སྤྱི་སྤྱོད་སྐད་ཡིག་གི་ཆུ་ཚད་མཐོ་རུ་གཏོང་བ་དང་། ཞིང་འབྲོག་མང་ཚོགས་ཁྲོད་རྒྱལ་ཁབ་ཀྱི་སྤྱི་སྤྱོད་སྐད་ཡིག་ཁྱབ་གདལ་གཏོང་རྒྱུར་སྐུལ་འདེད་བཏང་ནས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་ཆེད། ཉིན་ཤས་བསྟུད་མར། གཞིས་ཀ་རྩེ་གྲོང་ཁྱེར་གྱི་རྫོང་ཆུས་ཁག་གིས་དུས་རབས་གསར་པའི་ལྷག་བསམ་རྣམ་དག་གི་རྒྱལ་གཅེས་པ་ཞིག་བྱེད་དགོས་ཞེས་པའི་རྒྱལ་ཁབ་ཀྱི་སྤྱི་སྤྱོད་སྐད་ཡིག་གི་གཏམ་བཤད་འགྲན་བསྡུར་སྤེལ་བ་རེད།
ཁང་དམར་གྱི་འགྲན་བསྡུར་བྱ་ཡུལ་དུ། ཤང་གྲོང་རྡལ་ཁག་ནས་ཡོང་བའི་ཕུལ་བྱུང་བདམས་ཐོན་པ་༩ཡིས་ལུས་ལ་གཟབ་མཆོར་ལེགས་པར་སྤྲས་ནས་སྤྲོ་སེམས་ཆེན་པོས་ཁང་དམར་གྱི་དཔལ་འབྱོར་འཕེལ་རྒྱས་དང་རྨང་གཞིའི་སྒྲིག་བཀོད། གྲོང་ཁྱེར་དང་གྲོང་གསེབ་ཀྱི་རྣམ་པ། དམངས་འཚོའི་བདེ་སྐྱིད་སོགས་ཀྱི་ཐད་བྱུང་བའི་འགྱུར་ལྡོག་གལ་ཆེན་རབ་དང་རིམ་པ་བརྗོད་པ་མ་ཟད། ཚང་མས་ཟོལ་མེད་ཀྱི་བརྩེ་དུང་དང་བྱང་ཆ་ལྡན་པའི་སྐད་ཆའི་ཐོག་ནས་མེས་རྒྱལ་ལ་དགའ་ཞེན་དང་ཏང་ལ་ལྷག་བསམ་རྣམ་དག་བྱེད་ལུགས་མཚོན་པར་བྱས་ཡོད། འགྲན་བསྡུར་ཧྲིལ་པོར་མཐོ་རླབས་ཡང་ཡང་འཕྱུར་བ་དང་རྣམ་པ་འཁྲུག་ཆ་དོད་པ་མ་ཟད། བདམས་ཐོན་པ་ཚོའི་སྤྲོ་སེམས་རབ་ཏུ་འཁོལ་བའི་གཏམ་བཤད་ལ་གར་སྟེགས་གཤམ་གྱི་ལྟད་མོ་བའི་དགའ་བསུ་ཚད་མེད་ཐོབ་ཡོད་པ་རེད།
དིང་རིའི་བྱེད་སྒོ་སྤེལ་ཡུལ་དུ། བདམས་ཐོན་པ་ཚོས་རང་ཉིད་ཀྱི་ཉམས་མྱོང་དང་འཚོ་བའི་མྱོང་ཚོར་བརྗོད་དེ་དུས་རབས་གསར་པའི་ཞིང་འབྲོག་མང་ཚོགས་ཀྱི་ཧུར་བརྩོན་ཡར་སྐྱེད་ཀྱི་ཉམས་འགྱུར་གང་ལེགས་མངོན་པར་བྱས་ཡོད་པས། ས་ཡུལ་དངོས་སུ་ངོ་མཚར་ཆེ་བའི་རྣམ་པས་ཁེངས་ཡོད། ཚང་མས་རྒྱལ་ཁབ་ཀྱི་སྤྱི་སྤྱོད་སྐད་ཡིག་གི་ཕྱོགས་བསྡུས་ཆུ་ཚད་རྒྱུན་ཆད་མེད་པར་མཐོ་རུ་གཏོང་བ་དང་ཏང་ལ་དགའ་ཞེན་དང་རྒྱལ་ཁབ་ལ་དགའ་ཞེན། སྤྱི་ཚོགས་རིང་ལུགས་ལ་དགའ་ཞེན་བཅས་བྱེད་པའི་བརྩེ་སེམས་ཟབ་མོ་རྒྱུན་ཆད་མེད་པར་ཟབ་ཏུ་བཏང་སྟེ། དུས་རབས་གསར་པ་དང་རྒྱང་སྐྱོད་ཀྱི་ལམ་བུ་གསར་པའི་ཁྲོད་ཉམས་འགྱུར་མངོན་པ་དང་སྟོབས་ཤུགས་ལེགས་སྐྱེས་སུ་འབུལ་རྒྱུའི་རྣམ་འགྱུར་བསྟན་པ་རེད།
ད་ཐེངས་ཀྱི་གཏམ་བཤད་བྱེད་སྒོས། གྲོང་ཁྱེར་ཡོངས་ཀྱི་རྒྱ་ཆེའི་ཞིང་འབྲོག་མང་ཚོཌ་ཚོས་རྒྱལ་ཁབ་ཀྱི་སྤྱི་སྤྱོད་སྐད་ཡིག་སློབ་སྦྱོང་བྱེད་པའི་སྤྲོ་སེམས་སྔར་བས་འཕེལ་བ་དང་རྒྱལ་ཁབ་ཀྱི་སྤྱི་སྤྱོད་སྐད་ཡིག་སློབ་སྦྱོང་དང་བེད་སྤྱོད་བྱེད་པའི་རྣམ་པ་ཟབ་མོ་ཞིག་བཏོད་ཐུབ་པ་བྱུང་ཡོད་པ་རེད།
(ཚེ་དབྱངས་ཀྱིས་བསྒྱུར་)
点赞
收藏
相关推荐
换一批
评论
