སྤྱི་ཟླ་༧པའི་ཚེས་༡༢ནས་ཚེས་༡༤ཉིན་བར། རང་སྐྱོང་ལྗོངས་སྐྱེ་ཁམས་ཁོར་ཡུག་སྲུང་སྐྱོང་ལྟ་ཞིབ་ཚོ་ཆུང་དང་པོའི་ཙུའུ་ཀྲང་གཞོན་པ། རང་སྐྱོང་ལྗོངས་དཔལ་འབྱོར་དང་ཆ་འཕྲིན་ཅན་ཐིང་གི་ཐིང་ཀྲང་གཞོན་པ་ལུའི་ཞུའེ་ཧྲེང་གིས་གཉའ་ལམ་རྫོང་དུ་ལྟ་ཞིབ་གནང་བ་རེད། གྲོང་ཁྱེར་དང་རྫོང་རིམ་པ་གཉིས་ཀྱི་འབྲེལ་ཡོད་འགན་འཁུར་བློ་མཐུན་གྱིས་ཕེབས་རོགས་ཞུས་པ་ཡོད་པ་རེད།

ཙུའུ་ཀྲང་གཞོན་པ་ལུའི་ཞུའེ་ཧྲེང་དང་བཅས་པས་སྔ་རྗེས་སུ་རྒྱ་ལུང་འཁྱགས་མཚོ་ཕྱོགས་བསྡུས་བཅོས་སྐྱོང་རྣམ་གྲངས་དང་རྫོང་གྲོང་འཚོ་བའི་བཙོག་ཆུ་གཙང་སེལ་བཟོ་གྲྭ། རྫོང་འཕྲོད་བསྟེན་ཞབས་ཞུ་ལྟེ་གནས། གཉའ་ལམ་རྫོང་ཀྲུང་ཧོ་ཉམས་གསོ་བཟོ་གྲྭ། རྫོང་གྲོང་དང་འགྲམ་གྲོང་རྡལ་མཉམ་འབྲེལ་འཚོ་བའི་གད་སྙིགས་སྦས་ས། འགྲམ་གྲོང་རྡལ་འཛུགས་སྐྲུན་རྣམ་གྲངས་ཀྱི་འཛུགས་སྐྲུན་གད་སྙིགས་ཐོན་ཁུངས་ཅན་བེད་སྤྱོད་བྱ་ཡུལ། སྨན་ཕུ་ཡུལ་སྐོར་མཛེས་ལྗོངས་ཁུལ་རྣམ་གྲངས། སྨན་ཕུ་ཤང་སྒོ་མཚོ་གྲོང་ཚོའི་རྒྱང་འཚོལ་ལྟ་ཞིབ་ཚད་ལེན་གྱི་གཙོ་གནད་གནད་དོན་གྱི་ཁུངས་སྣེ་དག་ཐེར་བྱ་ཡུལ་སོགས་སུ་ལྟ་སྐུལ་མཛུབ་ཁྲིད་དང་ཞིབ་བཤེར་བྱས་པ་རེད། རྫོང་ཨུད་དང་རྫོང་སྲིད་གཞུང་གི་འགོ་ཁྲིད་གཙོ་བོ་དང་གླེང་མོལ་བྱེད་པ་དང་དཔྱད་གཞིའི་ཡིག་རིགས་ལྟ་བ། ས་ཡུལ་དངོས་སུ་ཞིབ་བཤེར་བྱེད་པ་སོགས་ཀྱི་བྱ་ཐབས་བརྒྱུད། གཉའ་ལམ་རྫོང་གི་སྐྱེ་ཁམས་ཁོར་ཡུག་སྲུང་སྐྱོང་གི་ཏང་སྲིད་འགན་འཁྲི་གཅིག་མཚུངས་དང་ལས་གནས་གཅིག་ལ་འགན་འཁྲི་གཉིས་དོན་འཁྱོལ་བྱས་ཚུལ་ཁྱོན་ཡོངས་ནས་ཤེས་རྟོགས་བྱས་པ། སྐྱེ་ཁམས་ཉམས་གསོ་དང་སྦགས་བཙོག་འགོག་བཅོས། རྨང་གཞིའི་སྒྲིག་བཀོད་འཁོར་རྒྱུག་སོགས་གཙོ་གནད་ལས་དོན་དོན་འཁྱོལ་བྱས་ཚུལ་ཤེས་རྟོགས་བྱས་ནས་གཉའ་ལམ་རྫོང་གི་སྐྱེ་ཁམས་ཁོར་ཡུག་སྲུང་སྐྱོང་ལས་དོན་གྱི་ཕན་འབྲས་ལ་གདེང་འཇོག་བྱས་ཡོད་པ་རེད།

ལུའི་ཞུའེ་ཧྲེང་གིས་ནན་བཤད་བྱས་དོན། སྐྱེ་ཁམས་ཁོར་ཡུག་སྲུང་སྐྱོང་ལྟ་ཞིབ་དག་ཐེར་ལས་དོན་ལ་དམ་འཛིན་ཡག་པོ་བྱ་རྒྱུ་དེ་གཏན་འཁེལ་གཉིས་ལ་བརྩི་བཀུར་དང་སྲུང་སྐྱོང་གཉིས་མཐའ་གཅིག་ཏུ་བྱེད་པའི་ཞིབ་ཕྲའི་མཚོན་ཚུལ་ཞིག་ཏུ་བརྩིས་ནས་ངེས་པར་དུ་ཆབ་སྲིད་ཀྱི་ཚུགས་གནས་སྔར་བས་མཐོ་རུ་བཏང་སྟེ་ལས་འགན་སྒྲུབ་སེམས་དང་འགན་འཁྲིའི་འདུ་ཤེས། ཁ་ཚ་དགོས་གཏུག་གི་འདུ་ཤེས་བཅས་ཆེ་རུ་གཏོང་བ། ཚད་གཞི་མཐོ་བ་དང་བླང་བྱ་ནན་པ། སྤུས་ཚད་མཐོ་བ་བཅས་ཀྱི་སྒོ་ནས་སྐྱེ་ཁམས་ཁོར་ཡུག་སྲུང་སྐྱོང་ལྟ་ཞིབ་དག་ཐེར་ལས་དོན་ཁག་ལ་སྐུལ་འདེད་ཏན་ཏིག་བཏང་ནས་སྐྱེ་ཁམས་ཤེས་དཔལ་འཛུགས་སྐྱོང་དང་སྐྱེ་ཁམས་ཁོར་ཡུག་སྲུང་སྐྱོང་གི་ལས་དོན་ཁག་ལ་ཕན་འབྲས་དངོས་ཐོན་པ་བྱེད་དགོས། 

ལུའི་ཞུའེ་ཧྲེང་གིས། ཆབ་སྲིད་ཀྱི་ཚུགས་གནས་སྔར་བས་མཐོ་རུ་གཏོང་བ་དང་སྐྱེ་ཁམས་ཁོར་ཡུག་སྲུང་སྐྱོང་ལས་དོན་གྱི་གལ་ཆེའི་རང་བཞིན་ལ་ངོས་འཛིན་བྱེད་ཤུགས་ཆེ་རུ་གཏོང་བ། སྒྲིག་སྲོལ་སྒྲིག་ཁྲིམས་ལ་བརྟེན་ནས་འགན་འཁྲི་རྩད་གཅོད་བྱེད་ཤུགས་ཆེ་རུ་གཏོང་བ་བཅས་བྱེད་དགོས། ལས་ཀའི་སྒྲིག་ཁྲིམས་ནན་དུ་གཏོང་བ་དང་འགན་འཁྲི་འཁུར་ཤུགས་ཆེ་རུ་བཏང་ནས་ཁོར་ཡུག་སྲུང་སྐྱོང་ལས་དོན་བརྟན་ལ་ཡུན་རིང་སྤེལ་བར་སྐུལ་འདེད་གཏོང་དགོས། འགན་འཁྲི་རྩད་གཅོད་བྱས་པ་བརྒྱུད། འགོ་ཁྲིད་ལས་བྱེད་པའི་འགན་འཁྲི་དོན་འཁྱོལ་དང་ཁོར་ཡུག་སྲུང་སྐྱོང་གི་འདུ་ཤེས་ཟབ་ཏུ་བཏང་ནས་འགན་འཁྲི་ཧུར་ཐག་འཁུར་བ། འགན་འཁྲི་རྩད་གཅོད་ཀྱི་གཙོ་གནད་མངོན་གསལ་དོད་དུ་བཏང་ནས་ཏང་སྲིད་ལས་ཁུངས་དང་འགོ་ཁྲིད་ལས་བྱེད་པའི་འགན་འཁྲི་རྩད་གཅོད་བྱེད་ཤུགས་ཆེ་རུ་བཏང་སྟེ་ལས་ཀ་མི་སྒྲུབ་པ་དང་གང་བྱུང་སྒྲུབ་པ། སྒྲུབ་རྒྱུ་དལ་བ་སོགས་ཀྱི་གནད་དོན་རྩད་གཅོད་མཐར་ཕྱིན་བྱེད་དགོས། འབྱུང་འཕྲོད་འཕེལ་རྒྱས་ཀྱི་འདུ་ཤེས་ལག་ལེན་ཧུར་ཐག་བསྟར་ནས་སྐྱེ་ཁམས་ཁོར་ཡུག་སྲུང་སྐྱོང་སྔར་བས་མངོན་གསལ་དོད་པའི་གནས་བབ་ཐོག་བཞག་སྟེ་རྫོང་ཁོངས་ཀྱི་ཁོར་ཡུག་རྨང་གཞིའི་སྒྲིག་བཀོད་འཛུགས་སྐྲུན་དེ་དཔལ་འབྱོར་སྤྱི་ཚོགས་འཕེལ་རྒྱས་དང་འཚམ་པར་སྐུལ་འདེད་གཏོང་བ། ཚན་རིག་དང་མཐུན་པའི་འཆར་འགོད་དང་གོ་རིམ་ལྡན་པའི་འཆར་འགོད། ལུགས་མཐུན་གྱི་འཆར་འགོད་བཅས་མཐའ་འཁྱོངས་བྱས་ཏེ་ཁོར་ཡུག་རྨང་གཞིའི་སྒྲིག་བཀོད་དང་འཛུགས་སྐྲུན་གད་སྙིགས་ཐོན་ཁུངས་ཅན་བེད་སྤྱོད་སོགས་སྐྱེ་ཁམས་ཁོར་ཡུག་སྲུང་སྐྱོང་གི་གཙོ་གནད་ལས་དོན་གཅིག་གྱུར་སྐུལ་འདེད་གཏོང་དགོས། སྐྱེ་ཁམས་ཁོར་ཡུག་ཁྱབ་ཁོངས་ཀྱི་ཁྲིམས་བསྟར་ལྟ་སྐུལ་དོ་དམ་བྱེད་ཤུགས་ཆེ་རུ་གཏོང་བ་དང་ཁྲིམས་ལྟར་ཁོར་ཡུག་སྲུང་སྐྱོང་ནན་པོ་བྱེད་པ། ཁོར་ཡུག་ཁྲིམས་འགལ་བྱ་སྤྱོད་ལ་ཆད་པ་ནན་པོ་གཅོད་པ། ཁོར་ཡུག་ཁྲིམས་འགལ་བྱ་སྤྱོད་སྣ་ཚོགས་ལ་བཟོད་སྒོམ་གཏན་ནས་མི་བྱེད་པ་བཅས་བྱེད་དགོས། ཚན་པ་ལས་བརྒལ་བའི་མཉམ་འབྲེལ་ཁྲིམས་བསྟར་མཐུན་སྦྱོར་ལྟ་སྐུལ་དོ་དམ་གྱི་ལས་ཀའི་ལམ་སྲོལ་རྒྱུན་ཆད་མེད་པར་འཐུས་ཚང་དུ་གཏོང་བ་དང་སྐྱེ་ཁམས་ཁོར་ཡུག་དང་། རང་བྱུང་ཐོན་ཁུངས། ས་ཆུ་སྲུང་འཛིན་སོགས་ཀྱི་བརྟག་དཔྱད་ལྟ་ཞིབ་ཚད་ལེན་དང་སྔོན་ཚུད་ཉེན་བརྡ་གཏོང་བའི་ལམ་སྲོལ་འཐུས་ཚང་དུ་གཏོང་བ། སྐྱེ་ཁམས་སྲིད་འཛིན་ཁྲིམས་བསྟར་དང་ཉེས་དོན་ཁྲིམས་འཛིན་སྦྲེལ་མཐུད་ལམ་སྲོལ་ལེགས་སུ་གཏོང་བ་བཅས་བྱས་ནས་སྐྱེ་ཁམས་བདེ་འཇགས་ལ་གཏོར་བཤིག་གཏོང་བའི་བྱ་སྤྱོད་ལ་རྡུང་རྡེག་ཚ་ནན་གཏོང་བའི་རྣམ་འགྱུར་རྒྱུན་འཁྱོངས་བྱེད་དགོས་པའི་བླང་བྱ་བཏོན་ཡོད་པ་རེད། (ཚེ་རིང་རྒྱ་མཚོས་བསྒྱུར་)