སྤྱི་ཟླ་༧པའི་ཚེས་༡༧ཉིན། རང་སྐྱོང་ལྗོངས་སྐྱེ་ཁམས་ཁོར་ཡུག་སྲུང་སྐྱོང་ལྟ་ཞིབ་ཚོགས་ཆུང་དང་པོའི་ཙུའུ་ཀྲང་། རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཀྲུའུ་རེན་གཞོན་པ་འཇམ་དཔལ་གྱིས་ལྷ་རྩེ་རྫོང་དུ་ལྟ་ཞིབ་བྱས་པ་རེད། གཞིས་ཀ་རྩེ་གྲོང་ཁྱེར་གྱི་གྲོང་སྤྱི་གཞོན་པ་འཕྲིན་ལས་རྣམ་རྒྱལ་གྱིས་ཕེབས་རོགས་ཞུས་ཡོད་པ་རེད།

ཙུའུ་ཀྲང་འཇམ་དཔལ་དང་བཅས་པས་སྔ་རྗེས་སུ་གྲ་བོ་ཤང་གི་བྱེ་ཚེར་སྐྱེ་ཁམས་ཉམས་གསོའི་རྣམ་གྲངས་ས་ཚིགས་དང་ལྷ་རྩེ་རྫོང་སྐྱེ་ཁམས་ཤེས་དཔལ་འཛུགས་སྐྱོང་སློབ་གསོའི་རྟེན་གཞི། ཏང་ཡོན་ལས་བྱེད་པའི་སྤྱི་ཕན་ནགས་ཚལ། བང་ལྕི་ནོར་ལུག་གསོ་ཚགས་ཞིང་འབྲོག་མང་ཚོགས་ཆེད་ལས་མཉམ་ལས་ཁང་། གཡུ་ཐོག་གྲོང་ཚོའི་བྱེ་ཚེར་འདེབས་འཛུགས་ཁུལ་སོགས་སུ་ལྟ་སྐུལ་མཛུབ་ཁྲིད་དང་ཞིབ་བཤེར་བྱས་ཏེ་འབྲེལ་ཡོད་ལས་དོན་གྱི་སྙན་ཞུ་ཉན་པ་དང་ལྷ་རྩེ་རྫོང་གི་སྐྱེ་ཁམས་སྲུང་སྐྱོང་ཉམས་གསོའི་བྱ་ཐབས་དོན་འཁྱོལ་བྱས་ཚུལ་ཤེས་རྟོགས་ཞིབ་ཕྲ་བྱས་པ་རེད།

འཇམ་དཔལ་གྱིས། ལྗང་མདོག་འཕེལ་རྒྱས་ནི་རང་བྱུང་ཁམས་དང་བསྟུན་པ་དང་མི་དང་རང་བྱུང་ཁམས་ཞི་མཐུན་མཉམ་གནས་ལ་སྐུལ་འདེད་གཏོང་བའི་འཕེལ་རྒྱས་ཤིག་ཡིན་ལ། སྤུས་ཚད་མཐོ་བའི་འཕེལ་རྒྱས་ཀྱི་རྨང་གཞི་ཞིག་ཀྱང་ཡིན། ལྷ་རྩེ་རྫོང་གིས་མ་དངུལ་གཏོང་ཤུགས་ཆེ་རུ་བཏང་སྟེ་གཙང་པོའི་སྟོད་དུ་ནགས་ཤིང་བཏབ་པ་དང་རྟེན་གཞིས་ཁོར་ཡུག་སྲུང་སྐྱོང་གི་འདུ་ཤེས་དྲིལ་བསྒྲགས་བྱས་པ། འདེབས་གསོ་ཟུང་འབྲེལ་བྱས་ནས་ཐོན་ལས་ཀྱི་ཕན་འབྲས་སྣུར་སྲིང་བྱས་པར་དགེ་མཚན་ལྡན་པའི་ཕན་འབྲས་ཐོན་ཡོད་པས། མུ་མཐུད་དྲིལ་བསྒྲགས་སྐུལ་ཁྲིད་ནུས་པ་འདོན་སྤེལ་ཡག་པོ་བྱས་ནས་རྫོང་ཁོངས་ཀྱི་ལྗང་མདོག་འཕེལ་རྒྱས་འཚོལ་ཞིབ་དང་ལག་ལེན་གཏིང་ཟབ་ཏུ་གཏོང་དགོས་པའི་གསལ་སྟོན་བྱས་ཡོད་པ་རེད།

འཇམ་དཔལ་གྱིས་ནན་བཤད་བྱས་དོན། སྐྱེ་ཁམས་སྲུང་སྐྱོང་ཉམས་གསོ་ནི་སྐྱེ་ཁམས་བདེ་འཇགས་སྲུང་སྐྱོང་བྱེད་པའི་བྱ་ཐབས་གལ་ཆེན་ཞིག་དང་སྐྱེ་ཁམས་མ་ལག་སྣ་མང་རང་བཞིན་དང་གཏན་འཇགས་རང་བཞིན། རྒྱུན་མཐུད་རང་བཞིན་བཅས་ཆེ་རུ་གཏོང་བའི་འགག་རྩའི་བྱ་ཐབས་ཤིག་རེད། རི་སྔོན་ཆུ་དྭངས་གསེར་དངུལ་རི་ལས་ལྷག  གངས་རི་འཁྱགས་ཀླུང་ཡིན་ཡང་གསེར་དངུལ་རི་ཞེས་པའི་འདུ་ཤེས་ལག་ལེན་བསྟར་ནས་སྐྱེ་ཁམས་སྲུང་སྐྱོང་དང་ཉམས་གསོ་མ་དངུལ་གཏོང་ཤུགས་རྒྱུན་མཐུད་ཆེ་རུ་གཏོང་དགོས། ཚན་རིག་དང་མཐུན་པའི་སྒོ་ནས་འགན་སྲུང་རང་བཞིན་གྱི་སྡོང་ཕྲུག་ར་བའི་རྟེན་གཞི་འཛུགས་སྐྲུན་བྱས་ཏེ་བྱེ་ཚེར་དང་གླ་ཚེར། སྦྱར་པ་སོགས་ས་གནས་དེ་གའི་འཚར་ལོངས་ཆ་རྐྱེན་དང་འཚམ་པའི་སྡོང་ཕྲུག་འདེབས་འཛུགས་དང་བདག་སྐྱོང་གི་ལས་དོན་ཡག་པོ་བསྒྲུབ་པ། འཕྲུལ་ཆས་ཀྱིས་བརྔ་བསྡུ་དང་བྱེ་སྐྱེས་རྩི་ཤིང་གི་ས་བོན་ཞིབ་མོ་བཟོས་ནས་གཟན་རྩྭའི་ནང་བཅུག་སྟེ་སྐྱེ་ཁམས་ཐོན་ཁུངས་ཀྱི་ལེགས་ཆ་སྲ་བརྟན་དང་རྒྱ་ཆེར་གཏོང་དགོས། སྐྱེ་ཁམས་ཁོར་ཡུག་སྲུང་སྐྱོང་གི་ལྟ་ཞིབ་ཚུར་ལན་གནད་དོན་དག་ཐེར་བྱ་རྒྱུར་ཤུགས་སྣོན་བརྒྱབ་སྟེ་སྒྲིག་ཁྲིམས་ནན་པོ་དང་བྱེད་ཐབས་དངོས་ཡོད། ཕན་འབྲས་མངོན་གསལ་བཅས་ཀྱི་ཐོག་ནས་རྒྱལ་ཁབ་ཀྱི་སྐྱེ་ཁམས་བདེ་འཇགས་སྲུང་ཡོལ་བརྟན་པོ་བསྐྲུན་དགོས། (ཚེ་རིང་སྒྲོལ་མས་བསྒྱུར་)