སྤྱི་ཟླ་༧པའི་ཚེས་༡༦ཉིན། གྲོང་ཨུད་སྐབས་གཉིས་པའི་རེས་སྐོར་བརྒྱད་པའི་སྐོར་དཔྱོད་དང་གྲོང་ཁྱེར་དང་རྫོང་གི་སྤྱི་འདོམས་སྐོར་དཔྱོད་ལས་དོན་གྱི་སྐུལ་སློང་བཀོད་སྒྲིག་ཚོགས་འདུ་འཚོགས་པ་རེད། རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ། གྲོང་ཨུད་ཀྱི་ཧྲུའུ་ཅི་ཟླ་བ་ཚེ་རིང་ཚོགས་འདུར་ཞུགས་པ་མ་ཟད་གསུང་བཤད་ཀྱང་གནང་བ་རེད། ཁོང་གིས། སྐོར་གཟིགས་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱེད་པ་དང་། སྐོར་གཟིགས་དང་སྐོར་དཔྱོད་ལས་དོན་སྐོར་གྱི་ཏང་ཀྲུང་དབྱང་གི་ཐབས་ཇུས་བཀོད་སྒྲིག་དང་རང་སྐྱོང་ལྗོངས་ཏང་ཨུད་ཀྱི་ལས་དོན་བླང་བྱ་ལག་བསྟར་དོན་འཁྱོལ་བྱས་ཏེ་རེས་སྐོར་གསར་པའི་སྐོར་དཔྱོད་ལས་དོན་ཡག་པོ་སྒྲུབ་ནས་སྤྱི་ཚོགས་རིང་ལུགས་དེང་རབས་ཅན་གྱི་གཞིས་ཀ་རྩེ་གསར་པ་འཛུགས་སྐྲུན་བྱ་ཆེད་སྲ་ཞིང་བརྟན་པའི་ཆབ་སྲིད་ཀྱི་འགན་ལེན་བྱེད་དགོས་པའི་ནན་གསུང་གནང་བ་རེད།

ཟླ་བ་ཚེ་རིང་གིས་གཙོ་གནད་མངོན་གསལ་དོད་པོ་དང་འགག་རྩར་དམ་འཛིན་གྱིས་སྐོར་དཔྱོད་ལྟ་སྐུལ་གྱི་ནུས་པ་འདོན་སྤེལ་བྱེད་དགོས་པ་དང་། དོན་ཆེན་བཞི་དོན་འཁྱོལ་དང་འཛུགས་གཏོད་བཞིར་སྐུལ་འདེད། ལྟེ་བའི་གྲོང་ཁྱེར་གཉིས་འཛུགས་སྐྲུན་སོགས་གཙོ་གནད་ལས་དོན་ལ་དམིགས་ནས་ལྟ་སྐུལ་བྱས་ཏེ་སྤུས་ཚད་མཐོ་བའི་ལྟ་སྐུལ་ལ་བརྟེན་ནས་ལས་དོན་དོན་ཐོག་ཏུ་འཁྱོལ་རྒྱུ་དང་ཕན་འབྲས་ཐོན་རྒྱུར་སྐུལ་འདེད་གཏོང་དགོས་པ། མང་ཚོགས་ཀྱི་ལངས་ཕྱོགས་སུ་བརྟན་པོར་ལངས་ཏེ་མང་ཚོགས་ཀྱི་བསམ་འཆར་མང་བའི་གནད་དོན་ཁག་གཅིག་ཐག་གཅོད་ནུས་ལྡན་བྱེད་པ་དང་མང་ཚོགས་ཀྱི་ཁེ་ཕན་ལ་ནུས་ཤུགས་ཡོད་རྒུས་སྲུང་སྐྱོང་བྱས་ཏེ་སྤུས་ཚད་མཐོ་བའི་ལྟ་སྐུལ་ལ་བརྟེན་ནས་མི་དམངས་ལ་ཞབས་འདེགས་ཞུ་བའི་དམིགས་ཡུལ་ལག་ལེན་བསྟར་དགོས་པ། འགག་རྩའི་ཉུང་ཤས་མངོན་གསལ་དོད་པོ་ཡོང་བ་བྱས་ཏེ་རིམ་ཁག་འགོ་ཁྲིད་ལས་བྱེད་པས་ཡང་དག་པའི་དབང་ཆའི་ལྟ་བ་དང་སྲིད་སྐྱོང་བྱས་རྗེས་ཀྱི་ལྟ་བ། བྱ་གཞག་གི་ལྟ་བ་བཅས་བརྟན་པོ་འཛུགས་ནས་སྤུས་ཚད་མཐོ་བའི་ལྟ་སྐུལ་ལ་བརྟེན་ནས་ལས་བྱེད་པར་དོ་དམ་ནན་པོ་བྱེད་དགོས་པ། སྐོར་དཔྱོད་ཀྱི་ཟིལ་གནོན་དང་རྩ་ལག་མཉམ་བཅོས། སློབ་གསོ་ཁྲིད་སྟོན་བཅས་ཀྱི་ནུས་པ་འདོན་སྤེལ་བྱ་རྒྱུར་མཐོང་ཆེན་བྱས་ཏེ་རུལ་སུངས་མི་བྱེད་པ་གསུམ་ལ་གཞི་གཅིག་ཏུ་སྐུལ་འདེད་བཏང་ནས་སྤུས་ཚད་མཐོ་བའི་ལྟ་སྐུལ་ལ་བརྟེན་ནས་ཆབ་སྲིད་ཀྱི་ཁོར་ཡུག་བཟང་པོ་ཞིག་གཏོད་དགོས་པ་སྟེ་གཅིག་ནས་བྱེད་སྟངས་ལེགས་བཅོས་དང་བྱ་ཐབས་ལེགས་འགྱུར་བྱས་ནས་སྐོར་དཔྱོད་ལས་དོན་གྱི་དམིཌ་སའི་རང་བཞིན་དང་ཕན་ནུས་རང་བཞིན་ཆེ་རུ་གཏོང་དགོས་པ། སྐོར་དཔྱོད་དང་དག་ཐེར་ལེགས་བཅོས། ཐག་གཅོད་བཅས་ཟུང་འབྲེལ་ནུས་ལྡན་དང་གཞི་གཅིག་ཏུ་སྐུལ་འདེད་བཏང་ནས་སྒྱུར་བཅོས་ཟབ་སྤེལ་དང་སྲིད་ཇུས་འཐུས་ཚང་དུ་གཏོང་བ། ལམ་ལུགས་འཐུས་ཚང་འཛུགས་རྒྱུ་བཅས་ལ་རམ་འདེགས་བྱས་ནས་སྐོར་དཔྱོད་ལས་དོན་གཏིང་ཟབ་སྤེལ་རྒྱུར་སྐུལ་འདེད་གཏོང་དགོས་པ། རེས་སྐོར་འདིའི་སྐོར་དཔྱོད་གཙོ་གནད་ལ་དམིགས་ཏེ་ཏང་གིས་སྲིད་ཁྲིམས་ལས་དོན་ལ་འགོ་ཁྲིད་གཙང་བཙན་བྱ་རྒྱུ་མཐའ་འཁྱོངས་བྱེད་པ། རྒྱལ་ཁབ་ཀྱི་ཆབ་སྲིད་བདེ་འཇགས་དང་སྤྱི་ཚོགས་ཁྱོན་ཡོངས་བརྟན་ལྷིང་ཡོང་བར་སྲུང་སྐྱོང་མཐའ་གཅིག་ཏུ་བྱེད་པ། སྲིད་ཁྲིམས་དཔུང་ཁག་གི་སློབ་གསོ་དག་ཐེར་བྱས་འབྲས་སྲ་བརྟན་དང་རྒྱ་སྐྱེད་གཏོང་བ། ཕྱོགས་ཡོངས་ནས་ཏང་ནན་པོས་སྐྱོང་བ་དང་ཉེན་རྟོག་པ་སྐྱོང་བའི་བླང་བྱ་དོན་འཁྱོལ། ཁྲིམས་བསྟར་ཁྲིམས་འཛིན་གྱི་ཆུ་ཚད་དང་ཁྲིམས་སྐྱོང་ཞབས་ཞུའི་ནུས་པ་ཆེ་རུ་གཏོང་བ། ཁྲིམས་བསྟར་ཁྲིམས་འཛིན་གྱི་འདུ་ཤེས་ལག་ལེན་བསྟར་བ་སོགས་ཀྱི་ཐད་ལ་ལྟ་སྐུལ་གྱིས་ཆབ་སྲིད་ཀྱི་ནོར་འཛོལ་འཚོལ་ཞིབ་དང་ཡོ་བསྲང་བྱས་ཏེ་སྐོར་དཔྱོད་ལས་དོན་ཏན་ཏིག་སྤེལ་རྒྱུར་སྐུལ་འདེད་གཏོང་དགོས། གཉིས་ནས་མཐུན་སྦྱོར་གཞོགས་འདེགས་དང་ལྟ་སྐུལ་གྱི་མཉམ་ཤུགས་གཅིག་འགྲིལ་ཡོང་བ་བྱེད་དགོས་པ། སྐོར་དཔྱོད་བྱེད་ཡུལ་ཏང་རྩ་འཛུགས་དང་འགན་འཁུར་བློ་མཐུན་གཙོ་བོས་རང་རྟོགས་ངང་ལྟ་སྐུལ་དང་ལེན་དང་། རང་འགུལ་ངང་སྐོར་དཔྱོད་ཚོ་ཆུང་གི་ལས་ཀར་རྒྱབ་སྐྱོར་དང་གཞོགས་འདེགས་བྱེད་དགོས། སྐོར་དཔྱོད་ལྟ་སྐུལ་བྱ་རྒྱུ་དེ་སྒྲིག་བཤེར་ལྟ་ཞིབ་དང་རྩ་འཛུགས། རྩིས་བཤེར། བསྡོམས་རྩིས་སོགས་ཚན་པའི་ལྟ་སྐུལ་འབྲེལ་མཐུད་མཐུན་སྦྱོར་བྱེད་རྒྱུར་ཤུགས་སྣོན་བརྒྱབ་སྟེ་མཉམ་འགུལ་འབྲེལ་མཐུད་ཀྱི་ལས་ཀའི་རྣམ་པ་གཏོད་རྒྱུར་ཤུགས་རྒྱག་དགོས། ཐབས་ལམ་མང་པོའི་ཐོག་ནས་ཆེད་ལས་ཤེས་ལྡན་མི་སྣ་གཅིག་སྡུད་བྱེད་པ་དང་སྐོར་དཔྱོད་ཚོ་ཆུང་གི་ལས་བྱེད་པའི་རྒྱུན་གཏན་གྱི་ལྟ་སྐུལ་དོ་དམ་བྱེད་ཤུགས་ཆེ་རུ་བཏང་སྟེ་བྱང་ཚད་མཐོ་ཞིང་ཆེད་ལས་ཅན་གྱི་སྐོར་དཔྱོད་དཔུང་ཁག་འཛུགས་སྐྱོང་བྱེད་དགོས། སྒྲིག་ཁྲིམས་ཀུན་སྤྱོད་ལེགས་སྐྱོང་བྱེད་ཤུགས་ཆེ་རུ་གཏོང་བ་དང་ཏང་གི་སྒྲིག་ཁྲིམས་སློབ་སྦྱོང་སློབ་གསོ་དང་ཟུང་འབྲེལ་གྱིས་ཕྱི་ཚུལ་རིང་ལུགས་དང་དཔོན་ཉམས་རིང་ལུགས་ཀྱི་མངོན་གསལ་དོད་པའི་གནད་དོན་བཅོས་སྒྲིག་ཏན་ཏིག་བྱེད་པ། སྤྱོད་ཚུལ་སྔར་བས་ལེཌ་གཏོང་དང་དོན་འཁྱོལ་ལ་དམ་འཛིན་ནན་པོ་བྱེད་དགོས། སྐོར་དཔྱོད་ཀྱི་མཇུག་འཕྲོའི་ལས་དོན་ཡག་པོ་སྒྲུབ་ནས་ལྟ་སྐུལ་ངོ་མ་དང་བཅོས་སྒྲིག་ཏན་ཏིག་བྱེད་པ། གཅིག་ཤེས་ཀུན་གྲོལ་དང་སྐྱོན་ཆ་སེལ་བ་བཅས་བྱས་ཏེ་བྱ་གཞག་ཁག་གོང་འཕེལ་འགྲོ་རྒྱུར་སྐུལ་འདེད་སྔར་བས་ཡག་པོ་གཏོང་དགོས་པའི་ནན་གསུང་གནང་བ་རེད།

ཝང་ཧྥང་ཧུང་དང་ཀེ་ཆིང་མིན། ཁྲེན་ཀེང་། བེང་དབྱིད་ཧའོ། ལའེ་ཡུང་ཅན། ཆུད་ཡུད་ཞང་། པ་སངས།  སྐལ་བཟང་སྒྲོལ་མ། ཀྲང་སི། ཁྲེན་ཀང་། མུའུ་ཤིན་པིན་བཅས་ཚོགས་འདུར་ཞུགས་ཡོད་ཅིང་། ཀྲུའུ་ཙེ་ཧྭ་ཡིས་ཚོགས་འདུ་གཙོ་སྐྱོང་གནང་བ་རེད། ཚོགས་འདུའི་ཐོག་ཀྲུང་དབྱང་དང་ལྗོངས་ཏང་ཨུད་ཀྱི་སྐོར་གཟིགས་ལས་དོན་གྱི་འབྲེལ་ཡོད་དགོངས་དོན་བརྒྱུད་བསྒྲགས་དང་སློབ་སྦྱོང་བྱས་པ་རེད།

ཚོགས་འདུ་དེ་བརྙན་འཕྲིན་ཁ་པར་ཚོགས་འདུའི་རྣམ་པའི་ཐོག་ནས་འཚོགས་ཤིང་། གྲོང་ཁྱེར་སྒྲིག་ཨུད་ལྟ་ཞིབ་ཨུ་ལྷན་གྱི་འབྲེལ་ཡོད་འགན་འཁུར་བློ་མཐུན་དང་། སྐོར་དཔྱོད་ལས་ཁུངས་ཀྱི་འབྲེལ་ཡོད་མི་སྣ། གྲོང་ཁྱེར་ཐད་གཏོགས་ཚན་པའི་ཏང་ཙུའུ་(ཏང་ཨུད་)ཡི་འགན་འཁུར་བློ་མཐུན་གཙོ་བོ། སྐོར་དཔྱོད་བྱེད་ཡུལ་ཚན་པའི་ཚན་ཁག་གི་ཁོངས་མི་སོགས་ཚོགས་ར་གཙོ་བོའི་ཚོགས་འདུར་ཞུགས་ཡོད་པ་རེད།

 （པ་སངས་ཆུང་བདག་གིས་བསྒྱུར་）