ཀེ་ལ་ཤ་རིས་བསྐོར་བའི་གངས་ལྗོངས་འདིར། །
ཁེ་གྲགས་དོན་དུ་མི་གཉེར་འཆད་ལ་བརྩོན། །
གེ་སར་བཅུད་ཀྱིས་རྐང་དྲུག་གསོ་བ་ལྟར། །
ངེད་ཅག་མེས་པོའི་རྗེས་རབས་སྐྱོང་ལ་མཁས། །
ཅི་ཡང་མི་ཤེས་རྨོངས་པའི་ཚོགས་རྣམས་ལ། །
ཆིལ་ཆིལ་ཆུ་མོའི་རྒྱུན་ལྟར་བཀའ་སློབ་བསྩལ། །
ཇི་སྲིད་སྲོག་གི་དབུགས་རྒྱུན་མ་ཆད་བར། །
ཉི་མ་ལྟ་བུའི་དྲོ་སྐྱིད་སློབ་མར་སྦྱིན། །
ཏུ་རེ་ལ་སོགས་ཡིག་ངོ་ཤེས་པ་དེ། །
ཐུ་མི་བཀའ་དྲིན་ཅན་གྱི་རྒྱུན་འཛིན་མཁན། །
དུ་མ་ཞིག་གི་ཞབས་ལ་གཏུགས་པ་ལས། །
ནུབ་ལ་ཁད་ཀྱི་རིག་གཞུང་ཅི་འདོད་སྦྱིན། །
པོ་ཏི་མི་ཚེའི་གྲོགས་སུ་བསྟེན་ནས་ནི། །
ཕོ་ཚོད་ཆེན་པོས་རིག་པའི་གཞུང་ལུགས་ཀུན། །
བོད་ཀྱི་རྗེས་རབས་རྣམས་ལ་སྩོལ་བའི་ཆེད། །
མོ་ཟད་རྡོ་ལ་ཐུག་ལྟར་འབད་པས་བསྐྱངས། །
ཙེ་རེར་ཁྱབ་པའི་གྲགས་པ་མི་གཉེར་བར། །
ཚེ་གང་རིག་གཞུང་སྤེལ་བའི་བཤེས་གཉེན་བཟང་། །
རྫེ་མའི་གྲངས་ལས་མང་བའི་སློབ་མ་སོགས། །
ཝེ་ལེར་བསྐྱངས་པའི་ཕན་ཡོན་གྲངས་ལས་འདས། །
ཞི་དུལ་སྤྱོད་པས་སྐལ་ལྡན་སློབ་མ་དག །
ཟི་འཐོམས་མུན་པའི་གནས་ལས་སྒྲོལ་མཛད་པས། །
འི་སྒྲའི་ཧང་སངས་བསྔཌ་བརྗོད་གྲངས་མང་གིས། །
ཡི་གེ་བསླབ་པའི་བཀའ་དྲིན་དངོས་སུ་ཚོར། །
རུ་སྟར་མང་པོ་འདུ་བའི་སློབ་མ་ལ། །
ལུ་ཆུའི་རྒྱུན་བཞིན་ཐབས་མཁས་སྒོ་ནས་ནི། །
ཤུ་རུ་སྒྲོག་ལྟར་སློབ་གསོ་བསྐྱོན་པ་ཡིས། །
སུ་ལུའི་དྲི་ཞིམ་འདྲ་བའི་སློབ་མ་བསྐྱངས། །
ཧོ་ཧོ་ཨ་མཚར་ཀ་ལིའི་ཕྲེང་བ་འདི། །
ཨེ་མ་རིག་གནས་རྒྱུན་འཛིན་སློབ་དཔོན་ལ། །
ཀུ་རེའི་ཚུལ་མིན་ཁ་ཞེ་གཉིས་མེད་ཀྱིས། །
ཨི་ཡིས་བཟི་བའི་འཆལ་གཏམ་མ་ཡིན་ལགས། །
点赞
收藏
相关推荐
换一批
评论
