ཞི་བསིལ་དབྱངས་ཀྱི་བདུད་རྩིའི་མཆོད་ཁ་རུ། །
སྙན་ཚིག་ནོར་བུའི་དཀྱིལ་འཁོར་བཀོད་པ་ན། །
རབ་སྙན་ངག་གི་དྭངས་མའི་སྐྱེད་ཚལ་དུ། །
རང་བྱུང་ཁམས་འདི་སྒེག་པའི་བུ་མོར་སྤྲུལ། །
གསལ་སྟོང་ཟླ་མེད་ཉི་ཟླའི་ཟེ་བ་རུ། །
ངོ་མཚར་ཆར་སྤྲིན་དྭངས་མས་བཀང་བ་ན། །
རིག་བྱེད་ཚངས་པའི་སྲས་ཀྱི་སྒེའུ་ཁུང་དུ། །
རང་བྱུང་ཁམས་འདི་མཛེས་མའི་གཟུགས་སུ་བསྡུས། །
མཐའ་མེད་ས་གཞིའི་ཐང་གཞུང་ཡངས་པོ་རུ། །
ཕྱོགས་ཀུན་ཀུ་མུད་འཛུམ་པར་དགོད་པ་ན། །
ངོ་མཚར་གཏམ་གྱི་པད་མོའི་ཁང་བཟང་དུ། །
རང་བྱུང་ཁམས་འདི་མཛེས་པའི་བརྒྱན་དུ་སྤྲས། །
སྣོད་བཅུད་སྒེག་དཔལ་མཉམ་པའི་རི་གྲོང་དུ། །
མེ་ཏོག་སྣ་བརྒྱའི་དྲི་བསུང་འཐུལ་བ་ན། །
སྙན་ངག་མཁན་གྱི་པིར་རྩེ་རྣོན་པོ་རུ། །
རང་བྱུང་ཁམས་འདི་ཚོར་བའི་མངལ་དུ་སྦྲུམ། །
མདངས་འཛིན་གཡུ་ཡི་མེ་ལོང་འཁྱིལ་བ་རུ། །
ཉམས་ལྡན་གར་མས་མགྲིན་པ་ངོམས་པ་ན། །
དབྱངས་ཅན་གཟུགས་སྐུ་མངོན་པའི་ལྡིང་ཁང་དུ། །
རང་བྱུང་ཁམས་འདི་གསེར་གྱི་སྡུ་གུར་བརྫུས། །
ཆར་སྤྲིན་ཕུང་པོ་སྡེབ་པའི་མཁའ་དབྱིངས་སུ། །
ཆོས་ཉིད་འོད་ཀྱི་གུར་ཁང་ཕུབ་པ་ན། །
ཚངས་སྲས་བཞད་པའི་དབྱངས་ཀྱི་ནགས་ཚལ་དུ། །
རང་བྱུང་ཁམས་འདི་ངག་གི་གཞོན་ནུར་སྤྲུལ། །
ས་གསུམ་དཔལ་གྱིས་བརྒྱན་པའི་གངས་ཀྱི་ཡུལ། །
ཡིད་འཕྲོག་ཀུན་གསལ་ཟླ་འོད་འཕྲོས་པ་ན། །
ཉི་མའི་གཉེན་གྱི་གཏམ་གྱི་སྐྱེད་ཚལ་དུ། །
རང་བྱུང་ཁམས་འདི་མཛེས་སྡུག་སྟོང་གིས་སྙེམ། །
བརྩེ་ཆེན་ཟླ་ཟེར་འཛུམ་པའི་སྡོང་ལོ་རུ། །
བྱམས་ཆེན་ཨ་མའི་མིག་ཟུང་ཤར་བ་ན། །
ངག་རིག་རྒྱུད་མངས་པི་ཝང་དཀྲོལ་བ་རུ། །
རང་བྱུང་ཁམས་འདི་ཁུ་བྱུག་མགྲིན་དུ་བསུས། །
འདོད་དགུ་ལྷུན་གྲུབ་རྒྱལ་བའི་ས་ཆེན་དུ། །
ཀུན་རྟོག་མཚོ་མོའི་རླབས་རིས་འཕྱུར་བ་ན། །
ཚངས་དབྱངས་སྙན་པར་འཛུམ་པའི་དོ་ར་རུ། །
རང་བྱུང་ཁམས་འདི་ཚོར་བའི་ལོངས་སྤྱོད་གྱུར། །
点赞
收藏
相关推荐
换一批
评论
