ཨ་མའི་བྱམས་སྐྱོང་མེད་པའི་ཕྲུ་གུས་སྡུག་རེ་མཐོང་། །
ཧ་ཅང་འདོད་པ་ཚིམ་པའི་ཟས་གོས་རེག་པར་དཀའ། །
ཨ་ཕའི་བལྟ་སྐྱོང་མེད་པའི་བུ་ཕྲུག་སྙིང་རེ་རྗེ། །
ཧ་ཅང་སྤྱི་ཚོགས་སྟེང་གིས་འཕྱ་སྨོད་བྱེད་མི་མང་། །
ས་མཆོག་ཁྱད་་ལྡན་ཞིང་དུ་འཁྲུངས་པའི་ཕ་མ་ཚོ། །
ཤ་ཚ་སྙིང་རྗེ་སྒོམ་ནས་བུ་ཕྲུག་བྱམས་ཀྱིས་སྐྱོངས། །
ལ་རྒྱ་ལ་ཡོགས་བསམ་ནས་རྒན་རྒོན་དྲིན་གྱིས་སྐྱོངས། །
རྭ་ཅོ་རྣ་ཅོག་བཞིན་དུ་བཟའ་ཚང་དམ་ཚིག་སྲུང་། །
ཡ་མ་བརླ་མདོག་མ་བྱེད་རང་བློ་ནང་དུ་གཅུན། །
འབ་སྒྲ་སྐྱུར་འགོང་མེད་པར་ཁྱིམ་ཚང་ཁྲིམས་བཞིན་སྐྱོངས། །
ཟ་འཐུང་རོ་བཅུད་དགོས་ན་ཁྱིམ་ཚང་འཆམ་མཐུན་གྱིས། །
ཞྭ་ནག་གཡོག་རེས་ཞོག་ནས་ཚུལ་མཐུན་སྤྱོད་པར་སློབས། །
ཝ་མོ་ཆུ་ཡིས་མྱོས་པའི་རྣམ་ཐར་མི་སྐྱོངས་བར། །
རྫ་ཁོག་གཅིག་གི་ཟས་ལ་ལོངས་སུ་སྤྱོད་ན་དགའ། །
ཚ་འདེད་ཆེ་འདོད་སྤངས་ནས་རང་དོན་འགྲིག་དང་ལྷན། །
ཙག་ཙིག་ལས་ལ་དོན་མེད་རྙོག་གྲ་ཉུང་ན་དགའ། །
མ་ཤེས་ཤེས་མདོག་ཐེ་ཇུས་བྱེད་རྒྱུ་ཕར་ལ་ཞོག །
བ་གླང་ལྟ་བུའི་བསམ་མེད་དྲན་མེད་མི་བྱེད་པར། །
ཕ་མ་བུ་ཕྲུག་དབར་ལ་ཕན་ཚུན་བསམ་ཤེས་ཀྱིས། །
པ་རི་པུ་རི་མེད་པར་རང་ཚུགས་ཟིན་དང་ཀྱེ། །
ན་སོ་དར་ལ་སོན་པའི་ཕྲུ་གུའི་ཕ་མ་ཚོ། །
ད་རང་འཇོན་པོ་རྒོད་པོ་སྤངས་ནས་རང་ཚོད་ཟིན། །
ཐ་ཤལ་མ་རབས་སྤྱོད་པས་མི་ཚེ་མི་ཟད་ཆེད། །
ཏཱ་ཡང་སྒོར་མོའི་ཆེད་དུ་གཡོ་སྒྱུ་མ་འཁྲབ་ཨང་། །
ཉྭ་ལ་འཁྲིལ་བའི་ཕྲུ་གུའི་ཆེད་དུ་བསམ་བློ་ཐོངས་། །
ཇ་ཆང་བག་མེད་ལོངས་སྤྱོད་སྟོན་མོར་མ་གཡེང་པར། །
ཆ་ལུགས་ཚུལ་མཐུན་རང་ཅག་མེས་པོའི་སྲོལ་རྒྱུན་དག །
ཅ་གས་གཅེས་པར་བསྐྱང་རྒྱུ་ཤིན་ཏུ་དོན་གལ་ཆེ། །
ང་དང་ང་རང་འདྲ་བའི་ནར་སོན་ཕ་མ་ཚོ། །
ག་དུས་ག་པར་ཡིན་རུང་དྲན་ཤེས་བརྟན་པོ་ཡིས། །
ཁ་དང་ལག་ལེན་མཐུན་རྒྱུ་དོན་གྱི་མདོ་ཁ་སྟེ། །
ཀ་ཡེ་ན་མཉམ་གྲོགས་ཚོ་མ་བརྗེད་ཡིད་ལ་ཆོངས། །
ཨ་ལོག་སྐྱུར་ལོག་མེད་པའི་དྲང་པོའི་སྙིང་གཏམ་འདིས། །
ཀ་བར་ཕན་ཡང་གདུང་ལ་གནོད་པའི་དཔེ་བཞིན་དུ། །
ཧ་ཅང་སྐྱེ་བོ་མང་པོའི་བློ་ལ་ཕོག་སྲིད་པས། །
ཁ་ནས་ཐོན་སུམ་བཅོ་བརྒྱད་ཐལ་བ་མཐོལ་ལོ་བཤགས། །
ཨ་ཕྲེང་ཚིག་རྐང་བཅུ་གཅིག་རྩོམ་ལུགས་བྲིས་པར་ཐལ། །
点赞0
收藏
相关推荐
换一批
评论
