ལྷད་མེད་ཀྱི་བརྩེ་འདང་དང་།
འགྱུར་མེད་ཀྱི་མཛའ་གཅུགས།
མདང་དགོང་། གྲང་རླུང་གི་བཙན་རྒོད་མེད་དུས།
ཁྱེད་ཉིད་དལ་མ་ལྷོད་ཀྱིས་ཕེབས་བྱུང་།
སེར་ལྡན་དགའ་མས་དགའ་བ་འབུམ་གྱིས་ཕྱུག་ཅིང་།
ལྷག་བསམ་ཟོལ་མེད་ཀྱི་འཛུམ་མདངས་འཕྱུར།
ཨེ་མ། དངོས་ནས་ལྷད་མེད་ཀྱི་དན་རྟགས་དང་།
འགྱུར་མེད་ཀྱི་དཔང་པོ་ཞིག་ཅི་ལ་མིན།
ཀྱེ་ཀྱེ། དབྱིག་འཛིན་སྒེག་མོ་དང་ཁ་བའི་ཕོ་གཞོན།
ཁྱེད་གཉིས་ཀྱིས་དེང་སང་གི་གསར་གྲོགས་ལྟར།
ཉིན་རེ་ལ་ཐུག་འཕྲད་རེ་བྱེད་ཅིང་།
འཕྲད་ཐེངས་རེར་རྩོད་འཛིང་རེ་མི་བྱེད་ལ།
གཡོ་ཟོལ་གྱིས་མཆེ་བ་སྦས་ནས།
དགའ་མདོག་གིས་སྒྱུ་གར་ཡང་མི་འཁྲབ།
ཁྱེད་གཉིས་ཀྱིས་ཉུང་མཐར་ཡང་།
ལོ་འཁོར་རེར་མཇལ་འཕྲད་རེ་བྱེད་ཅིང་།
དེ་ཡི་དུས་སུ།
ཆེས་དྭངས་གཙང་གི་བརྩེ་བ་ཞིག་ཕན་ཚུན་ལ་སྤྲད་ནས།
མི་འགྱུར་རྟག་བརྟན་གྱི་བརྩེ་དུང་ལ་བདེན་དཔང་བྱས།
དེ་བྱིངས་ཀྱི་དུས་ཚོད་ནང་དུ།
ཁ་བས་ལྷག་བསམ་གྱི་རང་གཤིས་གསོ་ཞིང་།
འཛིན་མས་ཕྱོགས་ལྷུང་གི་མེ་ལྕེ་གསོད་བཞིན་ཡོད།
ད་དུང་། ཕྱོགས་གཉིས་ཀས།
དམ་བཅའ་ཡི་བརྐོས་རིས་སྲུང་ནས།
འབག་བཙོག་གི་དྲི་མ་མེད་པའི་བརྩེ་དུང་གླེང་གིན་ཡོད།
དེ་རིང་། ཡིད་འོང་གི་མཛའ་གཅུགས་ལ་སྨོན་ཞིང་།
རྣམ་དག་གི་ཞེ་འདང་ལ་མོས་པའི་ཚ་ཟེར་ཅན་ཡང་།
འཛུམ་བརྒྱ་རབ་ཏུ་གྲོལ་ཞིང་།
འོད་ཟེར་ཕྱོགས་བཅུར་ཁྱབ་པས།
ས་གཞི་དྲོད་ཀྱིས་ཁེངས་ནས་འདུག
དེ་ནི་ཁྱེད་གཉིས་ལ་དབང་བའི་རྟེན་འབྲེལ་ཡིན་ལ།
འགྲོ་དྲུག་ལ་མཁོ་བའི་བདེ་བ་ཞིག་དེ་བས་ཡིན་ངེས།
འོན་ཀྱང་། དེང་གི་དུས་སྐབས་ལ།
དེ་འདྲའི་བརྩེ་དུང་མངལ་ལ།
དེ་བས་ཡིན་རྟོན་རུང་བའི་སྐྱེ་བོ་ཅི་ཙམ་ཡོད།
ངས་སོམ་ཉིའི་དྲི་རྟགས་མགོ་ལ་གོན་ནས།
སོར་མོའི་གྱི་ལིང་དལ་གྱིས་ཁ་བཀག་དགོས་བྱུང་།
点赞0
收藏
相关推荐
换一批
评论
