རྒྱང་རིང་ནས་ཕ་ཡུལ་དྲན་དུས།

ཉམས་ཐག་པའི་སེམས་པ་འདི།

གྲང་མོའི་རྡོ་དང་སྐྱུར་མོའི་རོ་དེ་ཡིན།

ལུས་སེམས་འདི་ཕ་ཡུལ་ལ་གླན་དུས།

ཚོར་བ་འདི་སྤྲིན་དཀར་དང་འཇའ་ཚོན།

ཐ་ན་རྩྭ་ཐང་དང་མེ་ཏོག

ད་དུང་དེ་དག་ལས་ཀྱང་མཛེས་པ་ཞིག་ཡིན་ངེས།

ཕ་ཡུལ་ནི་མཚོན་ཆ་ངར་མ་ཞིག་སྟེ།

རྡོ་འདྲ་བའི་སྙིང་ཤར་གས་ཁ་བཏབ་མཁན།

འོན་ཏེ། རྣམ་ཤེས་ཁེར་བུད་ཅིག་ལ་བྱིལ་བྱིལ་བྱེད་མཁན།

ཕ་ཡུལ་ཁོ་ན་ལས་མ་འདས་པས།

ཕ་ཡུལ་ནི་རྒྱབ་རི་སྨུག་པོ་དེའོ།

ཡུན་རིང་ཕ་ཡུལ་དང་འགྲོགས་པའི་ཡུལ་མི་ཚོས།

ཕ་ཡུལ་ནི་འཁྱོལ་དཀའ་བའི་དུས་ཚོད་གཅིག་ཏུ་སྒོམ་སྲིད་དེ།

ལན་གཅིག་ཕ་ཡུལ་དུ་ལོག་པའི་མི་ངས།

ཕ་ཡུལ་གྱི་ཉིན་མཚན་ཧ་ཅང་ཐུང་བར་མཐོང་ཡོད།

ཕ་ཡུལ།

ཐོན་ཐོན་པའི་མཐའ་མར།

སེམས་ཀྱི་ལོག་མལ།

དྲན་པའི་འཁོར་ཕྱོགས།

ཕྱི་ནང་ཨ་སློག་གིས་བཙལ་རུང་།

འཚོལ་རྙེད་ཐུབ་རྒྱུ་ཁྱོད་ཁོ་ན་ལས་མི་འདུག