སྙན་ངག
ཕྱག་ཟུང་སོར་མོའི་སྒྱུ་རྩལ་ཀློང་ནས་དབྱངས་ཀྱི་འཆར་སྒོ་ལྡེམ་སེ་ལྡེམ་སེ། །
ཁ་དང་ངག་གི་འདེགས་འཇོག་ཁྲོད་ནས་དྲི་ཟའི་མེ་ཏོག་མཛེས་སེ་མཛེས་སེ། །
ཡིད་དབུས་སེམས་ཀྱི་རྩེད་འཇོ་སྤྲིན་དཀར་ལྷ་ལམ་གཞུང་དུ་དྭངས་སེ་དྭངས་སེ། །
ང་དང་སྙན་ངག་ལོ་ཟླའི་བར་ནས་རོགས་ཀྱི་སེམས་པ་མཐུན་སེ་མཐུན་སེ། །
སེམས།
བརྩེ་བའི་འོད་སྣང་མི་འགྱུར་གཤིས་ཀྱི་མཁའ་གཞུང་དྲན་འདང་ཆེ་ཞིང་ཆེ་ཞིང་། །
དུང་བའི་འཛུམ་བག་རིན་བྲལ་མེ་ལོང་དགུ་ཚིགས་ཀློང་དུ་འཐིམ་ཞིང་འཐིམ་ཞིང་། །
བརྩེ་དུང་སེམས་ཀྱི་ཞལ་རས་ལང་ཚོ་མཛེས་པའི་ཉིན་བྱེད་ལྡེམ་ཞིང་ལྡེམ་ཞིང་། །
ཕྲ་ཆུང་དམར་པོའི་དྲོད་ཁོལ་ཡོད་དོ་འགྱུར་མེད་གཤིས་སུ་བརྟན་ཞིང་བརྟན་ཞིང་། །
སྲས་མོ།
སྒེག་ཉམས་སྟོང་གི་སྒྱུ་རྩལ་རི་མོས་སེམས་ཀྱི་བག་ཆགས་གཡོ་འོག་བཀུག་བཀུག །
ཁ་འཇམ་སྙན་རྩོམ་དབྱངས་ཀྱི་ཁུགས་པས་ལུས་ཀྱི་བ་སྤུ་ཤུགས་ཀྱིས་ལངས་ལངས། །
རྣམ་རྟོག་དག་པ་གངས་རིའི་ཚོན་གྱི་དྲན་གཞུང་བརྟན་པོ་བྲག་ལ་བཏེགས་བཏེགས། །
ས་གསུམ་མི་ཡིས་འགྲན་ཟླ་དབེན་པའི་ང་ཡི་ཡིད་འཕྲོག་ཟླ་ལྟར་མཛེས་མཛེས། །
点赞0
收藏
相关推荐
换一批
评论
