ཉི་མའི་འོད་ཟེར་འཕྲོས་པའི་དགོང་དྲོའི་མཚམས་སྤྲིན། །
དུངས་ཞེན་མིག་ཁྲའི་ཀེམ་ཀེམ་གཡོ་ཚུལ་མཛེས་པ། །
ལན་ཆགས་ན་བུན་འཁྲིགས་པའི་མི་ཚེ་རིང་མོར། །
ཚོར་སྣང་མགུར་མར་དྲངས་པ་ལས་སྐལ་ཡིན་འདྲ། །
དབྱངས་གསལ་ལྷུ་ལག་སྒྲིག་སའི་རི་སྡེ་ཁྲ་མོར། །
ཞེ་མཐུན་རབ་མདངས་མཛེས་པའི་གཞོན་ནུའི་དཔུང་ཚོཌ། །
ཚོར་བ་དབྱངས་ལ་བསྟིམས་པའི་ལས་ཀྱི་གྲོགས་ཏེ། །
མཛའ་མཐུན་པད་རྫིང་གཅིག་ཏུ་དུས་གཏན་འཛོམས་ཤོག །
ཀུན་རྟོག་རྡུལ་གྱིས་བཞེངས་པའི་ལྡེབས་རིས་ངོས་སུ། །
ཚོར་བའི་གར་མའི་འཛུམ་ཆུང་པིར་གྱིས་བྲིས་པས། །
སེམས་གཞས་དབྱངས་སུ་གྱེར་རོགས་ནགས་ཀྱི་ཁུ་ལོ། །
མ་བསྙེལ་དབྱིངས་ཀྱི་བསྟོད་པ་རིངས་པར་བྱོན་དང་། །
མཐའ་མེད་ལས་ཀྱི་ལམ་བུར་ཞབས་རྗེས་བཏབ་ཅིང་། །
སྣང་བའི་འཇིག་རྟེན་མཛེས་པ་ཡིག་རིས་འཁྱུག་ནས། །
དོན་སྟོང་མིང་ཚིག་གསང་མདུད་མགུལ་དུ་བསྒྲོན་ཏེ། །
ཚེ་ཡི་གར་སྟེགས་དབུས་སུ་ལོ་ན་སོན་དགོས། །
ཞེན་ཆགས་ཆུ་འཛིན་འདུ་བའི་བརྩེ་ཟབ་ཕ་ས། །
རྣམ་ཤེས་སྦྲང་མ་ཁྲ་བོ་འཁོར་བའི་འཁོར་ཁྱིམ། །
ཚིག་གི་དཔལ་བེའུ་རེའུ་མིག་བརྐོས་པའི་གསེབ་ནས། །
ཡིད་འཁྲེང་མིག་ཟུང་ཀེམ་པ་ལན་ཆགས་ལྷག་མ། །
མེ་ཏོག་མུ་ཁྱུད་མཛེས་པའི་རྫིང་བུའི་ངོགས་སུ། །
ཚེས་ཆེན་ཟླ་བའི་འོད་རིས་དཀར་ཞིང་གཙང་ནོར། །
སེམས་ཀྱི་གཏིང་རུམ་དབུས་ཀྱི་མ་སྐྱེས་དྲིན་ཆེན། །
བཅོས་མིན་འཛུམ་དཀར་ཞལ་ཁྱིམ་འདྲ་བས་ཡིན་འདུག །
ཆང་དཀར་མཚོ་མོ་འཁྱིལ་དབུས་ཟླ་བ་འཁྲུངས་དུས། །
རྣམ་རྟོག་འཆར་སྣང་སྒོ་འཕར་ཚོར་རླུང་ཕྱེས་པས། །
དབྱངས་གསལ་དུར་ཁྲོད་ཡངས་པོར་སྙན་ངག་པ་ཡི། །
རྣམ་ཤེས་ཚོར་བའི་གར་གླུ་ཅི་དགར་རོལ་སོང་། །
点赞0
收藏
相关推荐
换一批
评论
