སོང་སོང་རྡོག་པའི་མཐིལ་གྱིས་མི་ནོན་པའི། །

འདི་སྣང་འཁོར་བའི་འགྲུལ་བཞུད་ཤིན་ཏུ་རིང་། །

བསམ་བསམ་སེམས་ཀྱི་ཐོག་ཏུ་མི་འཁེལ་བའི། །

མི་ཚེའི་བཤུལ་ལམ་འདི་ཡང་ཤིན་ཏུ་རིང་། །

བྱས་བྱས་བྱས་པའི་གཏིང་མཐའ་མི་ཆོད་པའི། །

སྨིག་རྒྱུའི་འཇིག་རྟེན་འདི་ཀོ་རབ་ཏུ་མཚར། །

མཚར་མཚར་སྣང་བརྙན་རི་མོ་བཀྲ་བ་ཡི། །

འབྱམས་ཀླས་སེམས་པ་འདི་ཡང་རབ་ཏུ་མཚར། །

མི་རྟག་སྐྱེ་འཆིའི་རླུང་གིས་སྒུལ་བ་ཡི། །

མི་ལུས་ཐོ་ཡོར་ལྟ་བུར་མི་སྐྱིད་དོ། །

ཆགས་སྡང་གངས་ཆར་འདྲེས་མས་བརླན་པ་ཡི། །

བཙུན་གཟུགས་ཕལ་པ་འདི་ཡང་མི་སྐྱིད་དོ། །

ཚེ་སྟོད་སྐྱིད་ཀྱི་དགོད་སྒྲས་ཁེངས་པ་ཡི། །

ལྷན་འཛོམས་དུས་ཀྱི་དགའ་སྟོན་མ་ངེས་སོ། །

ཚེ་སྨད་སྡུག་གི་སྨྲེང་བས་མནར་བ་ཡི། །

ལས་ཀྱི་གྱེས་བྲལ་འདི་ཡང་མ་ངེས་སོ། །

ཆུ་ཟླའི་གཟུགས་ལ་རི་མོ་བྲིས་པ་འདྲའི། །

ཕར་བལྟས་སྣང་བའི་ཆོས་ཀུན་མི་རྟག་གོ །

ཟིན་མེད་ཆར་རྗེས་འཇའ་དང་མཚུངས་པ་ཡི། །

དྲན་འཕྲུལ་བློ་གཤོག་འདི་ཡང་མི་རྟག་གོ །