ན་ཚོད་གསར་སྐྱེས་ཀྱི་ལྗང་མྱུག །
སྨིན་པའི་ཆར་ཟིམ་གྱིས་བྲན་དུས། །
བརྩེ་འདང་དག་སྣང་གི་ཟེར་མ། །
ཕན་ཚུན་སྙིང་དབུས་སུ་བཅངས་ཡོད། །
འཛུམ་ཞལ་མུ་ཏིག་གི་དོག་པ། །
སེམས་པ་གཉོམ་དུང་གི་གཤིས་ཀ །
མ་བཅོས་མཛེས་སྡུག་གི་ས་བོན། །
ལན་ཆགས་གཤིན་ས་རུ་ཐིམ་བཞག །
བཀྲེས་ལྟོགས་བྱོལ་སོང་གི་རྣམ་པས། །
ཟས་ངོ་རྒྱུ་ངོ་ལ་མ་བལྟས། །
རང་རང་ཡིད་བྱེད་ཀྱི་སྒོ་མོ། །
འཛིན་སྟངས་སྒུལ་ཤུགས་ཀྱིས་རྡུང་འོང་། །
ཉིན་པར་མིག་མདུན་གྱི་འཇའ་རིས། །
མཚར་སྡུག་ཀུན་འདུས་ཉིད་ཡིན་ལ། །
མཚན་ལམ་ཟླ་གསར་གྱི་འོད་སྣང་། །
བསིལ་སྦྱིན་བདེ་སྟེར་རང་ལགས་སོ། །
ལས་འཕྲོ་མེ་ཏོག་གི་གང་བུ། །
སྦྲང་མའི་དབང་ཐང་དུ་བསམ་ནས། །
གསང་ཚིག་སྙིང་གཏམ་གྱི་དབུ་ཁྱུད། །
བསྐོས་པའི་ལས་སྐལ་དེ་འགྲིག་སོང་། །
རྟོག་འགྱུ་ཡིད་ཡུལ་གྱི་འདབ་མ། །
བར་ཆད་ཐོག་སེར་གྱིས་འཇིགས་པས། །
དམ་སྲུང་དར་ཐག་གི་མདུད་པ།
རང་སར་རང་གྲོལ་དུ་གྱུར་སོང་། །
འཕྲེང་ཞེན་ངང་ངུར་དང་མཚོ་མོ། །
དགུན་ཟླ་སོང་རྗེས་སུ་མཇལ་ཡོང་། །
དུང་དུང་རྐང་དྲུག་དང་སེར་ཆེན། །
གྱེས་ཐེངས་ཉག་ཅིག་གིས་ཚར་འགྲོ། །
འཆམ་མཐུན་ནེའུ་གསེང་གི་དགའ་ཚལ། །
ང་གཉིས་རྩེད་དགོད་ཀྱིས་སྐྱོམ་ས། །
དུས་ཚོད་ཙག་རླུང་གིས་ཁྱེར་བས། །
རྗེས་ཤུལ་དམ་དུམ་ལས་མི་རྙེད། །
འཆར་ཡན་ཉིན་སྲིབ་ཀྱི་བློ་ཁ། །
སོ་སོའི་ཕུགས་རེ་ལ་ཕྱོགས་དང་། །
འགྲོགས་འདྲིས་ཡུན་ཐུང་གི་ལོ་ཟླ། །
མིག་ཆུ་ཁྱོར་གང་དུ་སྒོམ་ཆོག །
འཕྲད་པ་སྟེས་དབང་གི་ངང་ཚུལ། །
མཛའ་བ་རང་སྟབས་ཀྱིས་སླེབས་སོང་། །
འདུ་འབྲལ་བསྐོས་ཐང་གི་ལྡོག་རིས། །
སུས་ཀྱང་སུ་ལ་ནི་མ་ཆད། །
དྲན་པའི་མེ་ལོང་གི་ངོས་སུ། །
བྱུང་འདས་གཟུགས་རིས་ཤིག་བསྐྱོན་པས། །
མངར་སྐྱུར་གཏམ་རྒྱུད་ཀྱི་གོ་རིམ། །
བརྗེད་བྱང་ཕྲན་བུ་རུ་སིམ་འདུག །
点赞
收藏
相关推荐
换一批
评论
