ལན་བུ་རྒྱ་ལྕང་ལོ་མར། །

མེ་ཏོག་ཕྲ་རྒྱན་བཏབ་ཡོད། །

པད་མའི་ཞལ་ཁྱིམ་ངོས་སུ། །

འཛུམ་དཀར་རི་མོ་མཛེས་པ། །

ལང་ཚོའི་དམན་ཤར་མཛེས་མར། །

ཁྲེལ་གཞུང་ཉི་ཟླ་རང་འཁོར། །

མ་ལོ་སྙིང་ལ་ཉེ་བ། །

ཕ་ཁྱིམ་ནང་གི་གཅེས་ལོ། །

དར་མའི་ལང་ཚོ་སྨིན་པས། །

མི་འདོད་གནས་ལ་བསྐྱལ་སོང་། །

ཕྱིར་མིག་ཡུལ་ལ་ཐོགས་ནས། །

མིག་ཆུས་མཁུར་ཚོས་བངས་སོང་། །

ས་མཐའི་ཉིན་ཞག་རིང་མོར། །

ཡུལ་ལ་ཞེ་འཁྲེང་རྒྱས་སོང་། །

དར་རྒུད་ལས་འཕྲོ་ནང་གི །

ས་མཐའི་ཡུལ་གྱི་མགྲོན་པོ། །

ཁྱིམ་གཞིས་གཡང་ར་གྲུ་བཞིར། ། 

བཙན་རྒྱུད་བུ་ཕྲུག་བཙས་ཡོད། །

གནག་སྣུམ་སྐྲ་ཡི་ལན་བུ། །

མཛེས་པའི་སྐྲ་ལོས་བརྒྱན་སོང་། །

རི་ཀླུང་ལྷས་འདབས་ཁྲོད་ན། །

མི་ཚེའི་གཏམ་རྒྱུད་བྲིས་ཡོད། །

ཨ་མ་དྲན་པའི་བུ་མོ། །

སེམས་ཀྱི་སྲུང་མ་ཡིན་ནོ། །