རི་བོ་འདྲ་འདྲའི་དཀྱིལ་ན། །
ཇོ་མོ་གླང་མ་མཐོ་སོང་། །
བུ་མོ་མང་པོའི་ཚོགས་ན། །
གཙང་གི་བུ་མོ་མཛེས་སོང་། །
དཀའ་སྤྱད་སྡུག་རུས་འཁྱོག་པ། །
གངས་དང་ལྷགས་རླུང་ཁྲོད་ཀྱི། །
གངས་ལྷ་མེ་ཏོག་འདྲ་བ། །
ང་ཚོ་གཙང་གི་བུ་མོ། །
ཆུ་མོ་འདྲ་འདྲའི་དབུས་ན། །
ཡར་ཀླུང་གཙང་པོ་རིང་བྱུང་། །
སྨན་ཆུང་འདུས་པའི་ཁྲོམ་ན། །
གཙང་གི་བུ་མོ་མཛེས་པ། །
ངང་རྒྱུད་ཆུ་ལས་རིང་བ། །
ཡར་ཀླུང་གཙང་པོའི་ངོགས་ཀྱི། །
སྐལ་བཟང་མེ་ཏོག་འདྲ་བ། །
ང་ཚོ་གཙང་གི་བུ་མོ། །
དཀར་པོ་འདྲ་འདྲའི་ནང་ནས། །
སྟོན་སྤྲིན་ཁ་དོག་དཀར་སོང་། །
མཛེས་མ་མང་པོའི་ཁྲོད་དུ། །
གཙང་གི་བུ་མོ་མཚར་བ། །
སྤྱོད་ཡོན་གཉིས་ཀ་འཛོམས་པ། །
སྣ་ཚོགས་མེ་ཏོག་སྐྱེད་ཚལ། །
པད་མ་མེ་ཏོག་འདྲ་བ། །
ང་ཚོ་གཙང་གི་བུ་མོ། །
བྱམས་པ་འདྲ་འདྲའི་ཁྲོད་ནས། །
ཨ་མའི་བྱམས་བརྩེ་ཟབ་བྱུང་། །
སྙིང་སྡུག་དུ་མའི་ཚོམས་ནས། །
གཙང་གི་བུ་མོ་བྱམས་པ། །
ཐུགས་གཤིས་མཛེས་པར་བལྟས་ན། །
མཐའ་ཡས་རྩྭ་ཐང་སྟེང་གི །
སྤང་རྒྱན་མེ་ཏོག་འདྲ་བ། །
ང་ཚོ་གཙང་གི་བུ་མོ། །
དེ་ལྟའི་མཛེས་ཆོས་ལྡན་པ། །
ང་ཚོ་གཙང་གི་བུ་མོ། །
ཡིད་འོང་ལྡུམ་རའི་ནང་གི །
སྣ་མིན་མེ་ཏོག་འདྲ་བ། །
点赞
收藏
相关推荐
换一批
评论
