ཚིག་ལ་མེ་ཏོག་བཞད་སོང་། ། 

དོན་གྱི་རེ་འབྲས་འབུས་ན། ། 

སྙན་ངག་དབྱངས་ཀྱི་བུ་མོས། །

ཞབས་བྲོ་ལན་གསུམ་བརྒྱབ་ཡོང་། ། 

རྨི་ལམ་ནང་གི་གར་མ། ། 

མི་ཚོགས་དཀྱིལ་ནས་འཛུམ་ན། ། 

རང་སེམས་རིག་པའི་གཞོན་ནུས། །

མགུར་མའི་གླེགས་བམ་བརྩིགས་ཡོང་། ། 

ངག་ནས་བླངས་པའི་དབྱངས་རྟ། ། 

དྲན་པའི་མཐིལ་དུ་བསྙིལ་ན། །  

བརྩེ་འདང་སྤྲིན་དཀར་ཕོན་པོས། ། 

སྨོན་ལམ་དར་དཀར་འབུལ་ཡོང་། ། 

ཁྲུང་ཁྲུང་ལྷོ་རུ་བཞུད་རྗེས། ། 

དབྱངས་ཀྱི་སྨིན་དྲུག་འཆར་སོང་། །

མཚོ་མོའི་ལ་གཞས་ནང་ན། ། 

གཏམ་རྒྱུད་རིང་མོ་བཞག་འདུག །

གཙང་པོའི་རླབས་རྒྱུན་བར་ན། ། 

མཚོ་བྱའི་བརྩེ་འདང་ལྷག་ཡོད། ། 

ཟླ་བས་སྙིང་གཏམ་བརྗོད་ན། ། 

མ་བཅོས་དུང་སེམས་མཚོན་ཡོད། །

སྨོན་འདུན་ཁྱེད་ཀྱིས་ཁྱེར་སོང་། ། 

བསམ་དོན་ལྷུན་གྱིས་འགྲུབ་ན། ། 

ཚིག་གི་བདུད་རྩི་བསིལ་མ། ། 

ང་ཚོས་མཉམ་དུ་བཞེས་ཆོག །

དུས་བཞིའི་འགྱུར་ལྡོག་བར་ནས། ། 

དགའ་སྐྱོའི་ཚོར་འདུ་སྤུངས་ཡོད། ། 

མིག་ཟུང་ཟིམ་ཟིམ་གནང་ན། ། 

ཚོར་གཞས་ཡིད་ཀྱིས་རོལ་ཐུབ། ། 

སྣང་བའི་སྐྱ་རེངས་འཆར་དུས། ། 

ཡིག་འབྲུའི་ཨུཏྤལ་འཁྲུངས་ཡོང་། ། 

འཛུམ་མདངས་སྙིང་ནས་དགོད་ན། ། 

ལས་ཀྱི་ཁ་ཡིག་མཐུན་ཡོང་། །