འཇིག་རྟེན་གྲོང་ནས་ལས་ཀྱི་འབོད་བརྡ་ཐོས། །

དཀར་ནག་ལམ་གྱི་འཇུག་བྱང་ལག་ཏུ་སོན། །

ལས་བསྐོས་རྟ་ལ་རྟོག་པའི་སྲབ་མདའ་བཞག །

སྲིད་པའི་ཐང་ཆེན་གྲོང་ནས་ཡང་ཡང་ཉུལ། །

གནམ་སའི་གཏམ་རྒྱུད་ནང་དུ་རང་ཉིད་བྲིས། །

ལོ་ཟླའི་འགྱུར་ལྡོག་ཁྲོད་ནས་ལང་ཚོ་བསྐྱངས། །

སྒྱུ་མའི་གྲོང་ལ་ཆུ་ཡི་མཁར་ཡང་བརྩིགས། །

སྐྱེ་བ་དུ་མར་རྨི་ལམ་ཡང་ཡང་རྨིས། །

ཤོག་དཀར་ངོས་སུ་ཚོར་བ་སྣ་ཚོགས་ཕབ། །

དགའ་སྐྱོ་འདྲེས་མའི་ཚེག་དང་ཆིག་ཤད་བྲིས། །

འཁྲུལ་བའི་ཟློས་གར་འཁྲབ་སའི་གར་སྟེགས་སྟེང་། །

རྫི་གླུ་ངག་ལ་དྲངས་ནས་ཡང་ཡང་བླངས། །

མི་ཚེ་རླུང་གིས་སྤུར་བའི་བྱ་སྤུ་བཞིན། །

ནང་སེམས་ཡིད་ཐང་ཆད་པའི་དབུགས་རིང་ཐོས། །

གཡེང་ལ་ཁྱེར་བའི་རྣམ་ཤེས་འཁྱམ་པོ་ཞིག །

མི་ཡུལ་ས་མཐའི་གནས་སུ་ཡང་ཡང་འགྲིམས། །

དབེན་ཐང་ཞི་བའི་ལྗོངས་སུ་བརྩེ་བ་འཁྲི། །  

ལོ་འདབ་ཕག་ཏུ་མི་ཚེའི་གླེགས་བམ་བཤམས། །

སྒྱུ་མའི་རྟ་ཁྱུ་འདེད་པའི་རྗེས་ཤུལ་ནས། །

རྟོག་ཡན་རི་ལ་ཤོར་བའི་འཆར་སྣང་མཐོང་། །

རེ་དོགས་ལམ་འཕྲང་རིང་མོ་མཐའ་མ་མཆིས། །

ངལ་དུབ་རྔུལ་ཆུའི་ཐིགས་པ་རྒྱུན་མ་ཆད། །

འཁོར་བའི་གླུ་ཚིག་འབྲི་བའི་སྙན་ངག་པ། །

ཡུད་ཙམ་ཡུན་ཐུང་ཞིག་གི་མགྲོན་པོ་ཡིན། །

དོ་ནུབ་མཚན་མོ་འདི་ཡང་མི་ཚེ་ཡིན། །

མདུན་གྱི་མཐོང་སྣང་འདི་ཡང་མི་ཚེ་ཡིན། །

ཚིག་གི་ཆོ་འཕྲུལ་དེ་དག་མི་ཚེ་ཡིན། །

དབྱངས་ལ་བསྟིམས་པའི་མི་ཚེ་ཐུང་ཐུང་ཡིན། །