ཆུང་འདྲིས་བྱམས་པ་ཟེར་བ། །

སེམས་ལ་ཐོགས་པའི་མི་རེད། །

ལས་དབང་མཉམ་དུ་མ་བཀོད། །

དྲན་གདུང་གཙག་གིས་གཙེས་བྱུང་། །

གནམ་གྱི་ཟླ་བ་ཡིན་ན། །

སྤྲིན་པ་ཡལ་བར་སྒུག་ཆོག །

སྤང་གི་སེར་ཆེན་ཡིན་ན། །

དབྱར་ཟླ་ཚེས་བར་སྒུག་ཆོག །

ལས་འཕྲོ་མེད་པའི་ཆུང་འདྲིས། །

སྒུག་དང་མ་སྒུག་མེད་ཀྱང་། །

སེམས་པ་ཐོགས་མེད་མི་དེ། །

སེམས་ནས་བསུབ་ཐབས་མི་འདུག །

ཆུང་འདྲིས་ཆུང་འདྲིས་ཟེར་བ། །

གཞན་ལས་ཁ་འབྲས་མཚར་བ། །

ཆུང་ཆུང་བྱིས་པའི་དུས་ནས། །

འདྲིས་ཤིང་འགྲོགས་པའི་མི་རེད། །

བྲིས་པའི་ཡིག་ཆུང་ཡིན་ན། །

དྲི་བཞོན་རླུང་ལ་བསྐུར་ཆོག །

སེམས་ལ་ཟུག་པའི་བརྩེ་བ། །

བསུབ་ཀྱང་སུབ་ཐབས་མི་འདུག །

ཉོས་པའི་གཟི་བྱུར་ཡིན་ན། །

གོང་ཐང་རྒྱུ་ཡིས་འཇལ་ཆོག །

ལས་འཕྲོ་ཟད་པའི་མི་ལ། །

འཕྲད་ཡོང་བསམ་པ་མི་འདུག །

ཆུང་འདྲིས་ཁྱོད་དང་འདྲ་བ། །

མི་ཚོགས་དཀྱིལ་ན་མི་འདུག །

བརྩེ་དུང་ཅན་གྱི་བྱམས་པ། །

ཁྲོམ་ནས་ཉོ་རྒྱུ་མི་འདུག །

ཟླ་འོད་མཚོ་ལ་ཕོག་དུས། །

ཁྱོད་ཞལ་ཡིད་ལ་འཁོར་བྱུང་། །

མལ་སའི་རྨི་ལམ་ནང་ནས། །

ཆུང་འདྲིས་མཇལ་བ་རྨིས་བྱུང་། །

ཁུ་ལོ་ནགས་ནས་གྲགས་དུས། །

བཤད་པའི་སྙིང་གཏམ་དྲན་བྱུང་། །

ཁྱོད་ཀྱིས་བཤད་པའི་སྙིང་གཏམ། །

རི་སྡེའི་ཁ་ལ་གསང་ཡོད། །

ནེའུ་གསིང་མེ་ཏོག་ཚལ་ནས། །

རྐང་དྲུག་བུང་བ་འཁོར་འཁོར། །

ཆུང་འདྲིས་ཁྱོད་ལ་འཁོར་ཡང་། །

ལས་འཕྲོ་མེད་པས་སྐྱོ་བྱུང་། །