སྐྱིད་ལ་དབྱར་གྱི་ཟླ་གསུམ། །

གང་ནས་སོང་བ་མ་ཤེས། །

སྡུག་ལ་སྟོན་གྱི་ཙག་རླུང་། །

གློ་བུར་གདོང་དུ་ལྷུང་བྱུང་། །

ཆ་མེད་ཡུལ་དུ་ཕྱིན་པས། །

རྒྱུས་མེད་མི་དང་འཕྲད་བྱུང་། །

བཙན་གྱིས་འཛུམ་པའི་རྣམ་པ། །

མཐོང་ན་ཞེ་མེར་ལངས་ཡོང་། །

སོང་ན་མི་ཚོགས་གསེབ་རེད། །

བསྡད་ན་ཨར་ཁང་ནང་རེད། །

རྙེད་དཀའི་མི་ལུས་རིན་ཆེན། །

ངལ་དུབ་ཁྲོད་ནས་ཟད་སོང་། །

ཕ་ཡུལ་རྒྱབ་ཏུ་བསྐྱུར་བ། །

སུ་དང་གང་གི་དོན་རེད། །

སྙིང་པོ་མེད་པའི་འཚོ་བ། །

འདི་ལྟར་རོལ་རྒྱུ་ལོབ་འདུག །

རྫ་ཆུ་སྔོན་མོའི་འགྲམ་དུ། །

ཟླ་གཅིག་ཟླ་གཉིས་བསྡད་པས། །

གཉེན་དང་ཕུ་ནུའི་བརྩེ་བ། །

ཡང་ཡང་ཞེ་ལ་འཁོར་བྱུང་། །

མི་ནི་རྔམས་སེམས་རླུང་གིས། །

གང་སར་ཁྱེར་བའི་རྡུལ་རེད། །

ད་དུང་ཕོ་རུས་གཟེབ་ལས། །

ཐར་བ་དཀའ་བའི་བྱ་རེད། །

ལུས་ལ་ངུར་སྨྲིག་བཀླུབས་ཀྱང་། །

སེམས་པ་རྒྱུ་ཡིས་བསླུས་པའི། །

ས་མཐའི་འཁྱམས་པོ་ང་རང་། །

སྐྱོ་བའི་མཆི་མ་འཁྲུགས་བྱུང་། །