སྤྱི་ཟླ་༣པའི་ཚེས་༡༠ཉིན་གྱི་སྔ་དྲོར། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ། གྲོང་ཨུད་ཀྱི་ཧྲུའུ་ཅི་བསོད་ནམས་ཉི་མས་བརྙན་ལམ་ཐོག་ནས་གྲོང་ཁྱེར་ཡོངས་ཀྱི་བརྟན་ལྷིང་སྲུང་སྐྱོང་ལས་དོན་ལ་བཀོད་གཏོང་གནང་སྟེ་འབྲེལ་ཡོད་ལས་དོན་ལ་སླར་ཡང་བཀོད་སྒྲིག་གནང་ཞིང་། ཁོང་གིས། ཉེན་བརྡ་རྒྱུན་གཏོང་དང་དོགས་ཟོན་རྒྱུན་འཇགས། ལས་ཀའི་གཙོ་གནད་འབུར་ཐོན་དང་ལས་དོན་དོན་འཁྱོལ་ལ་དམ་འཛིན་བཅས་བྱས་ཏེ་གྲོང་ཁྱེར་ཡོངས་ཀྱི་སྤྱི་ཚོགས་ཁྱོན་ཡོངས་རྒྱུན་མཐུད་དང་ཞི་མཐུན། བརྟན་ལྷིང་བཅས་ཡོང་རྒྱུར་འགན་ལེན་བྱེད་དགོས་པའི་ནན་བཤད་གནང་བ་རེད།

བསོད་ནམས་ཉི་མས་གྲོང་ཁྱེར་བརྟན་ལྷིང་སྲུང་སྐྱོང་བཀོད་འདོམས་པུའུ་རུ་ཕེབས་ནས་རྫོང་ཆུས་ཁག་གི་བརྟན་ལྷིང་སྲུང་སྐྱོང་བཀོད་འདོམས་པུའུ་ཡི་བརྟན་ལྷིང་སྲུང་སྐྱོང་གི་བྱ་ཐབས་དོན་འཁྱོལ་དང་ལས་རེས་མི་སྣའི་ལས་གནས་དོན་འཁྱོལ་སོགས་ཀྱི་གནས་ཚུལ་བརྙན་ལམ་ཐོག་ནས་སྦྲེལ་མཐུད་གནང་བ་མ་ཟད། བརྟན་ལྷིང་སྲུང་སྐྱོང་གི་འཐབ་ཕྱོགས་དང་པོའི་ལས་བྱེད་ལས་བཟོ་ཚོར་ཐུགས་རྗེ་ཆེ་་ཞུ་ལུགས་མཚོན་པ་དང་སྦྲགས་འཚམས་འདྲི་ཡང་གནང་ནས་ཚང་མས་རང་འགན་ནན་སྒྲུབ་དང་། ལྷག་བསམ་རྣམ་དག་གིས་འགན་འཁྲི་སྒྲུབ་པ། མང་ཚོགས་ཀྱི་དུས་བདེའི་བདེ་སྐྱིད་སྲུང་བ་བཅས་བྱས་ནས་གྲོང་ཁྱེར་ཡོངས་ཀྱི་སྤྱི་ཚོགས་ཁྱོན་ཡོངས་རྒྱུན་མཐུད་དང་ཞི་མཐུན། བརྟན་ལྷིང་བཅས་ལ་སྲུང་སྐྱོང་བྱ་དགོས་རྒྱུའི་ལྕག་སྐུལ་གནང་བ་རེད། 

བསོད་ནམས་ཉི་མས། མིག་སྔའི་བརྟན་ལྷིང་སྲུང་སྐྱོང་གི་ལས་དོན་ཡག་པོ་བསྒྲུབ་རྒྱུ་ནི་ཆབ་སྲིད་ཀྱི་ལས་འགན་གལ་ཆེན་ཞིག་རེད། གྲོང་ཁྱེར་ཡོངས་ཀྱི་རིམ་ཁག་སྡེ་ཚན་ཁག་གིས་ཆབ་སྲིད་ཀྱི་ཚུགས་གནས་མཐོ་རུ་བཏང་ནས་ཏང་དང་རྒྱལ་ཁབ་ཀྱི་ལས་ཀའི་ཁྱོན་ཡོངས་ཀྱི་མཐོ་ཚད་ཐོག་ལངས་ཏེ་སྤྱི་ཚོགས་བརྟན་ལྷིང་སྲུང་སྐྱོང་སྐོར་གྱི་ཏང་ཀྲུང་དབྱང་གི་ཐབས་ཇུས་བཀོད་སྒྲིག་ཁག་ལག་བསྟར་དོན་འཁྱོལ་གཏིང་ཟབ་དང་། རང་སྐྱོང་ལྗོངས་ཏང་ཨུད་དང་རང་སྐྱོང་ལྗོངས་བརྟན་ལྷིང་སྲུང་སྐྱོང་བཀོད་འདོམས་པུའུ་ཡི་ལས་ཀའི་བླང་བྱ་ལག་བསྟར་དོན་འཁྱོལ་མཐའ་གཅིག་ཏུ་བྱས་ནས་དུས་དང་རྣམ་པ་ཀུན་ཏུ་བརྟན་ལྷིང་སྲུང་སྐྱོང་གི་རྩ་བ་དེ་དམ་པོར་བཟུང་བ་དང་། ལས་ཀའི་བླང་བྱ་དང་བྱ་ཐབས་ཁག་དོན་འཁྱོལ་ཡག་པོ་བྱས་ནས་སྤྱི་ཚོགས་ཁྱོན་ཡོངས་བརྟན་ལྷིང་དང་གོ་རིམ་ལྡན་ཞིང་མི་དམངས་མང་ཚོགས་བདེ་སྡོད་ལས་བརྩོན་ཡོང་བའི་འགན་ལེན་བྱེད་དགོས། ཉེན་བརྡ་རྒྱུན་གཏོང་དང་དོགས་ཟོན་རྒྱུན་འཇགས་ཐུབ་པ་བྱས་ནས་མིག་སྔའི་བརྟན་ལྷིང་སྲུང་སྐྱོང་ལས་དོན་གྱི་དུས་བབ་ལས་འགན་ཁོང་དུ་ཡང་དག་ཆུད་པ་བྱེད་པ། སྔ་ཕྱི་བར་གསུམ་དུ་རྒྱུན་རྣམ་ཅན་དང་ཁྲིམས་སྐྱོང་ཅན་གྱི་འདུ་ཤེས་ཐོག་ནས་བརྟན་ལྷིང་སྲུང་སྐྱོང་གི་ལས་དོན་རྒྱུན་གཏན་ངང་གཞི་རིམ་དུ་སྤེལ་དགོས། འགལ་ཟླ་དང་རྩོད་གཞི་གྲལ་བཤེར་དང་འདུམ་འགྲིག་གཏིང་ཟབ་བྱས་ཏེ་འབྱུང་རྩ་ནས་སྔོན་འགོག་དང་དོ་དམ་ནན་པོ། ཚོད་འཛིན་ནན་པོ། གནས་ཚུལ་ཉེན་ཟོན་སྔོན་བརྡ་གཏོང་བ་སོགས་ཀྱི་ལས་ཀའི་བྱ་ཐབས་ལ་ཤུགས་སྣོན་བརྒྱབ་ནས་འགལ་ཟླ་དང་རྩོད་གཞི་གཞི་རིམ་དུ་སེལ་བ་དང་འབྱུང་རྩ་ནས་མེད་པ་བཟོ་དགོས། ལས་ཀའི་འགན་འཁྲི་ནན་དུ་གཏོང་བ་དང་ལས་ཀའི་སྒྲིག་ལམ་ནན་དུ་གཏོང་བ། སྤྱོད་ཚུལ་ལེགས་སུ་གཏོང་བ་དང་དོན་འཁྱོལ་ལ་དམ་འཛིན་ནན་པོ་བྱེད་པ་བཅས་ཀྱིས་བསམ་པའི་ཉམས་འགྱུར་བཟང་པོ་དང་ལས་ཀའི་སྤྱོད་ཚུལ་ཏན་ཏིག་ཐོག་ནས་བརྟན་ལྷིང་སྲུང་སྐྱོང་གི་ལས་ཀའི་བྱ་ཐབས་ཁག་དོན་འཁྱོལ་དང་ཕན་འབྲས་ཐོན་རྒྱུར་སྐུལ་འདེད་གཏོང་བ། ས་སྲུང་གི་འགན་འཁྲི་ཡོད་པ་དང་ས་སྲུང་གི་འགན་འཁྲི་འཁུར་བ། ས་སྲུང་གི་འགན་འཁྲི་སྒྲུབ་པ་བཅས་བྱས་ནས་བདེ་འཇགས་དང་བརྟན་ལྷིང་གི་སྤྱི་ཚོགས་ཁོར་ཡུག་ཅིག་ཧུར་ཐག་གཏོད་དགོས་ཞེས་ནན་གསུང་གནང་བ་རེད།

ཀེ་ཆིང་མིན་དང་མུའུ་ཤིང་པིན། ཡེ་ཧའེ་ཐའོ་བཅས་ཞུགས་ཡོད་པ་རེད།  

 (པ་སངས་ཆུང་བདག་གིས་བསྒྱུར་)