སྤྲིན་ཁྱུ་འཐོར་རླུང་གིས་གཏོར་ཕྱིན་མི་མངོན་པའི་དབྱིངས་སུ་རྒྱུ།

ཞི་འཇམ་གྱི་ཟླ་བས་དངུལ་དཀར་གྱི་འོད་སྣང་བསྣམས་པར་བྱས།

སྐར་ཚོམ་གཞི་གཅིག་ཏུ་བསྡུས་ཏེ་ཆེམ་ཆེམ་གཡོ།

སྙིང་རྗེ་དང་བྱམས་བརྩེའི་ངང་གིས་ལམ་སྟོན་གྱི་འོད་སྣང་སྦྱིན།

འཁྱག་སིབ་སིབ་ཀྱི་མཚན་མོ་རེ་རེར་ཨ་མས་ང་རང་ལ་རྨི་ལམ་རྨིས་ཚུལ་བརྗོད།

ས་གཞི་ཆེན་མོས་རང་བྱུང་གི་དཀར་གཙང་ན་བཟའ་བཀླུབས་པར་བྱས།

ཙག་རླུང་གི་སོ་རྩེར་འབྱར་བའི་བ་མོས་རྩྭ་ཐང་ལ་དཀྲིས་གསུམ་བརྒྱབ།

དགུན་ཟླ་གསུམ་གྱི་འཁྱག་རོམ་ཉི་ཐིགས་ཀྱིས་གཏོར་ཕྱིན་ཕྱིའི་སྣོད་བཅུད་རིམ་གྱིས་དྲོས།

ལྷག་བསམ་དང་བཅོས་མིན་ངང་གིས་མ་རིག་པའི་མུན་ཁང་སིལ་པོར་བཅོམ།

ནམ་ཟླ་རེ་རེའི་ལྟེབ་ཁུགས་ནས་ཨ་མས་ང་རང་མི་ཡུལ་འགྲིམ་ཚུལ་བསླབས།

ཆར་ཆུའི་རྡོག་སྒྲས་དབྱར་གཞུང་གི་སྣང་བ་དཀྲོགས་པར་བྱས།

བསིལ་ཤ་འཇམ་པོས་བྱིལ་བྱིལ་བྱས་ཏེ་རྒྱང་རིང་གི་མཚམས་སྤྲིན་ལ་དམ་པོར་འཁྱུད།

ལྷོད་འཇགས་ཀྱིས་རྒོངས་ཁའི་གྲིབ་སོ་དལ་གྱིས་བཀུག་རྗེས།

སྨུག་པས་རི་རྩེ་བསྡམས་པའི་འབྲོག་ཐང་གི་ལྷས་འདབས་པང་ནས།

ཨ་མས་ང་ལ་གཏམ་རྒྱུད་ཀྱི་མེ་ཏོག་བསླེས་ནས་གནང་བྱུང་།