འཇའ་རིས་སྣེ་མོར་འཁྱུད་པའི་མཚར་སྣང་བློ་ཁ། །

ཁྲ་ཆིལ་མེ་ཏོག་ཚལ་གྱི་བག་ཡངས་ལོངས་སྤྱོད། །

ཨུ་ཚུགས་ངུད་མོའི་ཕག་གི་ཀ་ར་བུ་རམ། །

མ་མའི་གནའ་གཏམ་ནང་གི་སྒྱུ་མའི་ཡུལ་ལྗོངས། །

འཆར་ཡན་འོད་ཀོར་འཚེར་བའི་བྱིས་དུས་རྨི་ལམ། ། 

ཤེས་བྱའི་འཇུག་ངོགས་རྩེན་པའི་གོམ་སྟབས་ཐོག་མ། །

ཀ་ཁའི་སྦྱོར་ཀློག་སིམ་པའི་དབྱངས་འགྲོས་སྙན་མོ། །

ནང་སེམས་དུང་བས་སྐྱོམ་པའི་ཡིད་འགྱུ་དྭངས་གཙང་། །

བསམ་བློའི་ཞལ་ཁ་འབྱེད་པའི་དུས་ཚིགས་ལྗང་གུ། །

མ་སྨིན་རྒྱང་རིང་ཞོགས་པའི་ལང་ཚོའི་རྨི་ལམ། ། 

གནག་ཕྱུགས་དཀར་ནག་རྩིབ་ཀྱི་རྫི་བོའི་ལས་དབང་། །

རི་ལུང་རྡོག་པས་གཤགས་པའི་སུག་རྗེས་ཧྲལ་ཧྲུལ། །

འདང་བརྩེ་རླུང་གིས་གཏུབས་པའི་ཚིགས་མལ་སྐྱ་བོ། །

སྐྱིད་སྡུག་དབུ་ཁྱུད་རྩོམ་པའི་དུས་ཀྱི་མགོ་རྔ། །

སྤྱི་ཚོགས་གྲུ་གར་ཉུལ་བའི་འཚོ་ཚིས་རྨི་ལམ། ། 

དམར་སེར་ངུར་སྨྲིག་སྡེ་པའི་གྲལ་མཐར་ཚུད་ནས། །

གཞུང་ལུགས་འདི་ཕྱིའི་ཐེམ་སྐས་འཛེག་པར་རྩོམ་གྱིན། །

འཛད་མེད་བཅུ་ཕྲག་རིག་པའི་གནས་ལ་སྙེག་སྟེ། །

གཏན་འདུན་ངེས་ཤེས་རྙེད་པའི་སེམས་རྟེན་དྲོན་མོ། །

མི་ཚེའི་འགྲུལ་ལྡོག་ཁྲོད་ཀྱི་སྐལ་བཟང་རྨི་ལམ། ། 

དབེན་པའི་བཙན་ས་ཟིན་པའི་ཐབས་ཀྱི་སྒྲོམ་བུ། །

ཐོས་བསམ་རིག་པའི་ལྡེ་མིག་དེ་གས་ཕྱེས་ཏེ། །

རྟེན་འབྱུང་སྟོང་ཁམས་སྔོག་པའི་མགྲིན་པའི་གད་རྒྱངས། །

སེམས་ཀྱི་རེ་ཁ་འཛིན་པའི་གཤིས་སུ་གྲུབ་པ། །

སྨོན་སེམས་ཞེ་རུ་ཐོགས་པའི་འབྱུང་འགྱུར་རྨི་ལམ། །