སྔོ་བསངས་ནམ་མཁའ་གཡུ་ཡི་མེ་ལོང་ངོས། །
མཚམས་སྤྲིན་དམར་པོའི་འོད་མདངས་རྣམ་པར་བཀྲ། །
ནུབ་རིའི་ཕྱོགས་སུ་སྙེག་པའི་མཁའ་ནོར་གྱི། །
འོད་ཀྱི་སྐུད་པ་འཁོར་བའི་གྲོང་ནས་ཆོད། །
བསིལ་འཇམ་རླུང་བུ་རྒྱུ་བའི་འཁོར་ཕྱོགས་ཀྱིས། །
རྩྭ་ལྗང་ལོ་མས་བདག་ལ་བྱིལ་བྱིལ་བྱས། །
དལ་འབབ་ཆུ་བོའི་བཞུར་སྒྲ་ལྷང་ལྷང་ཁྲོད། །
སྔར་བཞིན་བསྐྱོད་པའི་བྱ་ཁྱུ་ཚང་དུ་ལོག །
གྲོང་ནས་འཕྱུར་བའི་དུ་ཞགས་བར་སྣང་བསྒྲིབས། །
ཕྱུགས་ཟོག་ཁྱུ་རེ་རང་ཁྱིམ་ཕྱོགས་སུ་རྒྱུ། །
བྲེལ་བས་བཞུད་པའི་འགྲུལ་པ་རིམ་གྱིས་ཉུང་། །
ས་སྲོད་སྣང་བ་དལ་གྱིས་མདུན་དུ་སླེབས། །
རྒྱང་ན་འགྱིང་བའི་ལྷུན་པོའི་དབུ་རྩེ་རུ། །
ཉི་ཟེར་ལྷག་མས་ཡང་ཡང་འཁྱུད་པ་དང་། །
ཕྱོགས་སུ་རྐྱོང་བའི་ལམ་འགྲམ་ལྗོན་པའི་ཚོགས། །
དྲི་བཞོན་རླུང་བུའི་གར་དུ་ལྡེམ་ལྡེམ་གཡོ། །
གཅིག་པུར་སྲང་ལམ་ཉུལ་བའི་ཁོ་བོ་ནི། །
གོས་ཀྱི་སྣེ་མོ་ལྷབ་ལྷུབ་སྐྱོད་བཞིན་དུ། །
ལྗོན་པའི་ཁྲོད་ན་ཟུག་པའི་ལམ་བུ་བརྒྱུད། །
དབེན་ཞིང་ཉམས་དགའི་ལྗོངས་སུ་སླར་ཡང་བཞུད། །
ཡུལ་འདིའི་བྱིའུ་ཁྱུས་ཟང་ཟིང་སྐད་སྙན་འབྱིན། །
གསོམ་ཤུག་ལོ་མའི་དྲི་བསུང་ཕྱོགས་ཀུན་འཐུལ། །
འདུ་འཛིའི་བྱ་བ་སྟོངས་པའི་དབེན་གནས་འདི། །
བདག་ཉིད་རབ་ཏུ་དགྱེས་པའི་ཞིང་མཆོག་ལགས། །
དལ་བུར་མཚན་སྨག་ཡོལ་བས་བསྒྲིབས་པ་ཡིས། །
གླིང་མདའི་སྣང་བ་སྔར་ལས་ལྷིང་ཞིང་འཇགས། །
རིམ་གྱིས་འཚེར་བའི་མཁའ་དབྱིངས་སྐར་མའི་ཚོགས། །
ཤར་གྱི་ཐིག་ལེ་མཉམ་དུ་ཡུལ་འདིར་བསླེབས། །
ཟླ་འོད་གླན་པའི་སྔས་མགོ་སྔར་ལས་འཇམ། །
དགོང་ཁའི་བསེར་མོས་མེ་ཏོག་དྲི་བསུང་ཀུན། །
སྒེའུ་ཁུང་ཕྱོགས་སུ་བསྐྱོད་པ་སྣ་ལམ་སིམ། །
ཨེ་མ་ཡུལ་འདིའི་ངོ་མཚར་བརྗོད་མི་ལང་། །
འཇིག་རྟེན་བྱ་གཞག་གཡོ་བའི་ན་བུན་བཞིན། །
སེམས་ཀྱི་གཏོད་སོ་དག་ཀྱང་སྤུ་ཙམ་དབེན་གྱུར་ཏེ། །
དོན་མེད་སྟོང་བས་བསླུ་བྲིད་མི་འདོད་པས། །
བཅོས་མིན་ངེས་འབྱུང་ཞིག་ཀྱང་གཏིང་ནས་སྐྱེས། །
འདི་ལྟར་སྐྱིད་ལ་སྡུག་གི་འཆར་ཡན་གྱིས། །
ཁོ་བོ་ཞི་འཇམ་རྨི་ལམ་ལྗོངས་སུ་ཁྲིད། །
དེ་རུ་ཅི་དགའ་སྣང་བའི་རོལ་རྩེད་ཀྱིས། །
ཡང་གཅིག་རྫོགས་ལྡན་གསར་པའི་དུས་སྟོན་རོལ། །
点赞
收藏
相关推荐
换一批
评论
