རྩི་ཤིང་མེ་ཏོག་འདི་སྤང་ཁའི་རྒྱན་རེད། །

རྟ་ནོར་ལུག་གསུམ་དེ་སྡེ་པའི་སྲོག་རེད། །

རི་སྡེ་ཁྲ་མོ་འདི་སྐྱེ་སའི་ཡུལ་ཡིན། །

སྐྱེ་ས་འཚར་ས་འདི་བརྗེད་མེད་དྲན་ཡོད། །

སྦྲ་ནག་གྲུ་བཞི་འདི་འཚོ་སའི་གཞིས་ཡིན། །

དཀར་པོའི་འོ་ཞོ་ནི་འཚོ་བའི་རྟེན་ཡིན། །

དབྱངས་གསལ་སོ་བཞི་དེ་སྡེ་པའི་རྒྱན་ཡིན། །

འབྲོག་སྡེ་ཕྱུག་མོ་འདི་ལོག་སའི་ཡུལ་ཡིན། །

ཟང་ཟིང་འར་འུར་གྱི་འདུ་འཛི་མེད་ཅིང་། །

ལྷོད་ཡངས་བག་ཕེབས་ཀྱི་འཚོ་བས་ཕྱུག་པའི། །

རི་མཐོ་ས་གཙང་གི་དབུས་སུ་བཞེངས་འདྲའི། །

ཁོར་ར་ཁོར་ཡུག་འདི་ང་ཡི་རྩེད་ར། །

དབྱངས་གསལ་སོ་བཞི་ཡི་འགྱུར་ཁུག་ངོམས་ཤིང་། །

རང་རེའི་མེས་པོ་ཡི་ཆ་ལུགས་བསྐྱངས་ཏེ། །

ཁྲེལ་གཞུང་ཕྱི་ཐག་གི་ཀློང་ནས་འགྱིང་པའི། །

གངས་རིའི་མཛངས་མ་ཡང་འདི་ན་ཡོད་དོ། །

གངས་ཀྱི་འདབས་རོལ་དུ་ལང་ཚོ་རྒས་ཤིང་། །

ཕུ་ནུ་གཉེན་ཉེ་ལ་བརྩེ་འདང་ཟབ་པའི། །

སྐྲ་དཀར་ཞེ་དཀར་གྱིས་བརྒྱན་པའི་བགྲེས་སོང་། །

རང་སྡེ་ཕྱུག་མོ་འདིའི་རྒྱན་ཆ་ཡིན་ནོ། །

སྣ་ཚོགས་རི་མོ་ཡི་འཇའ་རིས་མིན་ཞིང་། །

སྒྱུ་མ་མཁན་པོ་ཡིས་སྤྲུལ་པར་མིན་པའི། །

རང་བྱུང་ཁོར་ཡུག་འདིའི་ཉམས་དགའི་མཛེས་སྡུག །

སེམས་པ་དམར་པོ་འདི་འཁྲེང་བའི་རྒྱུ་རེད། །