ཚེ་ཡི་བརྒྱུད་རིམ་རླུང་ནང་མར་མེ་བཞིན། །
སྐད་ཅིག་ངང་དུ་མི་སྡོད་ཟད་ནས་འགྲོ། །
ཚེ་ཡི་ནོམ་ཆེན་ངལ་མེད་སྩོལ་བའི་མགོན། །
དགེ་རྒན་དྲིན་ཆེན་མུན་སེལ་སྒྲོན་མེ་ཡིན། །
རྒྱུད་ལ་ཡོད་པའི་ཡང་སྙིང་ཡོད་དོ་ཅོག །
དྲིན་ཆེན་ཞིག་གིས་གནང་བ་ཅིས་མ་ཡིན། །
ལས་སྐལ་ནང་ནས་འཕྲད་པའི་སྒྲོན་མེ་སྟེ། །
རྨོངས་མུན་སེལ་བ་རྟག་ཏུ་ང་ཡི་སྐྱབས། །
ཀ་ཁའི་འབྲི་ཀློག་བྱེད་པ་པོ་ཡིས་ཁྲིད། །
རིགས་ལམ་དྲང་པོ་བྱེད་པ་པོ་ཡིས་སློབ། །
གཞུང་གི་སྙིང་པོ་བྱེད་པ་པོ་ཡིས་སྩོལ། །
བྱེད་པོ་མཆོག་སྟེ་དགེ་བའི་བཤེས་གཉེན་ནོ། །
རྣམ་པར་དཔྱོད་པའི་བློ་གྲོས་མཆོག་མངའ་བ། །
རྒྱུས་མེད་ཡུལ་ནས་ཤེས་རབ་ལམ་བསྟན་པ། །
སློབ་བུའི་འོས་འགན་ཁུར་ཆེན་ཁུར་བ་པོ། །
དགེ་རྒན་དམ་པ་ཚེ་འདིའི་རིན་ཆེན་མཆོག །
རྟུལ་ཕོད་བྲལ་བའི་འདུ་ཤེས་མངའ་དུས་དེར། །
དཔྱོད་ཤེས་དབེན་པའི་ལོ་ཟླ་མཐའ་མེད་ལ། །
ཤེས་འཇོན་དཀོན་པའི་མི་ཡུལ་ས་མཐའ་རུ། །
བཤེས་གཉེན་དམ་པའི་ལམ་བསྟན་ཤིན་ཏུ་མཁོ། །
འཇིག་རྟེན་འདི་རུ་ང་རང་རྨོངས་ནས་སྒུར། །
རྨོངས་པའི་མུན་པ་ཤེས་རབ་སྒྲོན་མེས་བསལ། །
སྔོན་གྱི་སྨོན་པས་གཏི་མུག་གཉིད་ལས་སློང་། །
མུན་པ་སེལ་མཁན་དགེ་རྒན་སྒྲོན་མེ་འདྲ། །
གཤིས་ལ་གྲུབ་པའི་རྣམ་དག་སྤྱོད་པ་ཀུན། །
སྒྱུར་བཅོས་ཟབ་གཏོང་ཡང་དག་ལམ་ལ་འདྲེན། །
གཞན་ཕན་ཁུར་ཆེན་ལྕི་བའི་དམ་པ་ཡིས། །
ངལ་མེད་ངང་ནས་སྐྱོང་བ་དྲིན་ཆེན་ཡིན། །
ཉིན་མོའི་ཟས་དང་མཚན་མོའི་གཉིད་ཆག་སྟེ། །
སློབ་བུའི་ཚོགས་ཀྱི་ལམ་སྣེ་དྲངས་པའི་མགོན། །
སྒྲོན་མེ་ཞིག་ལ་དཔེ་རུ་བླངས་ཀྱང་རུང་། །
དཔེ་དེས་ཡོད་ཚད་མཚོན་པ་དཀའ་བར་གྱུར། །
ཆུང་ནས་ད་བར་དགེ་རྒན་སྣ་ཚོགས་འཕྲད། །
རང་གིས་མ་འཇོན་འདི་ལྟར་ལུས་པ་ལས། །
དགེ་རྒན་ཡོངས་ཀྱི་སྐུ་དྲིན་གཞལ་དུ་མེད། །
སྙིང་གི་དབུས་ནས་བཀའ་དྲིན་ལན་བརྒྱ་ཞུ། །
ཚེ་རབས་འདི་ལ་ཐོས་ནོར་སྩོལ་བའི་མགོན། །
ཚེ་རབས་གཏན་དུ་ཡང་ཡང་འཕྲད་པ་ནས། །
ཚེ་ཡི་འདུ་བྱེད་སྔར་ལས་གསལ་བའི་ངང་། །
ཚེ་རིང་ལོ་བརྒྱ་སེམས་གཏིང་སྨོན་ལམ་ཡིན། །
点赞
收藏
相关推荐
换一批
评论
