ལྷགས་རླུང་དལ་གྱིས་རྒྱུ་ཞིང་།

ལོ་འདབ་ས་རུ་ལྷུང་བའི་སྐབས་དེར། 

ང་གཉིས་ཀྱང་ཀྱག་ཀྱོག་གི་ལམ་ཁ་དེ་ནས། 

གོམ་མཚམས་མ་བཞག་པར་སོང་བ་དྲན་ནམ། 

ཁྱོད་ཀྱིས་སྒེག་པའི་འཛུམ་ཞལ་ངོམས་ཞོར། 

སྙིང་གཏམ་གྱི་ཚིག་འབྲུ་རེ་རེས། 

ངའི་སེམས་པ་གཏིང་ནས་བཟི་སྟེ། 

བརྗོད་མི་ཚར་བའི་སེམས་གཏམ་ཁྱོད་ལ་བཤད་པ་དྲན་ནམ།

དཀར་ཞིང་འཇམ་པའི་ཁྱོད་ཀྱི་ལག་ཟུང་གི་སོར་མོ་དེར། 

ངས་དངུལ་དཀར་གྱི་མཛུབ་དཀྲིས་ཤིག་གིས་བརྒྱན་ཞོར།

ང་གཉིས་ཀྱིས་མ་བཅོས་ཡིད་ཀྱི་ཟབ་ས་དེ་ནས། 

འགྱུར་མེད་ཀྱི་མནའ་ཚིག་ཅིག་བཞག་པ་དྲན་ནམ། 

ཁྱོད་ཀྱི་ཕྱི་ཐག་དང་བརྩེ་བས་ཁེངས་པའི་མིག་ཟུང་གིས། 

ཤིན་ཏུ་གཉོམ་ཆུང་གིས་ང་ལ་ལྟ་ཞོར་མཆི་མ་ས་ལ་ལྷུང་དུས།

ངས་ཁྱོད་ཀྱི་མགོ་བོ་བྲང་ཁར་གླན་ཏེ།

ང་གཉིས་ཀྱི་འདས་མ་ད་གསུམ་གླེང་བ་དྲན་ནམ།