ཁྲ་ཚོམས་སྐར་མའི་ཚོགས་ཀྱི་གཞས་ཡས་ན། །

འོད་ཀྱི་རང་མདངས་གསལ་བའི་རྒྱུ་སྐར་ཏེ། །

མཚན་གྱི་རྨི་ལམ་སྲུང་བའི་བཅོ་ལྔའི་ཟླ། །

ང་དང་ཀུ་མུད་བར་གྱི་གསང་བ་ཡིན། །

ཞིམ་མངར་དྲི་བསུང་འཐུལ་བའི་སྐྱེས་ཚལ་ན། །

མཛེས་པའི་ཞལ་འདབ་གྲོལ་བའི་མེ་ཏོག་སྟེ། །

ཕྱི་ནང་ཀུན་གྱི་ལོངས་སྤྱོད་པདྨ་དཀར། །

ང་དང་རྐང་དྲུག་བར་གྱི་གསང་བ་ཡིན། །

སྔོ་ལྗང་ལོ་འདབ་རྒྱས་པའི་དཔྱིད་དུས་སུ། །

སྙན་འཇེབས་གཞས་ཆུང་འཐེན་པའི་བྱེ་ཆུང་སྟེ། །

དཔྱིད་ཀྱི་མགྲོན་ཆེན་བསུ་བའི་བྱ་ཁུ་བྱུག །

ང་དང་འཇོལ་མོའི་བར་གྱི་གསང་བ་ཡིན། །

སྤྲིན་དཀར་བང་རིམ་བརྩེགས་པའི་གཡས་ཟུར་གྱི། །

དྲོད་འཇམ་ཟེར་བརྒྱ་འཕྲོས་པའི་འོད་པོ་ཆེ། །

སེར་པོ་གསེར་གྱི་མདོག་ཅན་རྟ་བདུན་པ། །

ང་དང་པདྨའི་བར་གྱི་གསང་བ་ཡིན། །

མཚན་གསུམ་ཟླ་བ་དཀར་པོའི་བསིལ་འོག་ནས། །

སྙིང་གཏམ་ཚིག་གི་རོལ་མོ་བསྒྲགས་པའི་དུས། །

མཛེས་མཛེས་བཞིན་རས་དམུལ་བའི་འཛུམ་ཆུང་མ། །

ང་དང་ཁོ་མོའི་བར་གྱི་གསང་བ་ཡིན། །