སྲ་ཞིང་མཁྲེགས་པ་མ་ཡིན་ཡང་། །

མེ་ཏོག་ཀུན་ཀྱི་རྟེན་བྱེད་པའི། །

ཡངས་པའི་ས་ཆེན་ཁྱོད་རང་ངོ་། །

གཤེར་ཞིང་བརླན་པ་མ་ཡིན་ཡང་། །

སྐོམ་པའི་གདུང་བ་སེལ་བྱེད་པའི། །

དྭངས་གཙང་ཆུ་མིག་ཁྱོད་རང་ངོ་། །

ཚ་ཞིང་སྲེག་པ་མ་ཡིན་ཡང་། །

ལྷགས་པའི་འཁྱག་རོམ་འཇུ་བྱེད་པའི། །

དབལ་གྱི་མེ་ཕུང་ཁྱོད་རང་ངོ་། །

ཡང་ཞིང་གཡོ་བ་མ་ཡིན་ཡང་། །

འཐིབས་པའི་སྨུག་པ་དྭངས་བྱེད་པའི། །

རླུང་བུ་བསིལ་བསིལ་ཁྱོད་རང་ངོ་། །

ཐོགས་རེག་བྲལ་བ་མ་ཡིན་ཡང་། །

ཉི་ཟླ་ཟུང་གཅིག་འཚེར་བྱེད་པའི། །

མཐའ་ཡས་ནམ་མཁའ་ཁྱོད་རང་ངོ་། །

མདོར་ན་འབྱུང་ལྔ་མ་ཡིན་ཡང་། །

འབྱུང་ལྔའི་བྱེད་ལས་ཀུན་ཚང་བའི། །

གཟུགས་མེད་འབྱུང་བ་ཁྱོད་རང་ངོ་། །