དཔྱིད་དཔལ་ལགས།
ཁྱོད་རང་།
དྲོད་འཇམ་གྱི་རླུང་བུ་ཞིག་ཁྱེར་ནས་ཡོང་འཆར་མ་ཡིན་ནམ།
ཅིའི་ཕྱིར་ངའི་ལག་པ་ད་དུང་གྲང་འཁྱག་གིས་བཟུང་བ་རེད།
ཡང་ན་ཁྱོད་ཀྱིས།
ལང་ཚོའི་མཆོད་པ་བཤམས་ནས།
སྔོ་བསངས་ཀྱི་ནམ་མཁར་དགུ་ཚིགས་ཀྱི་ཁ་བཏགས་ཤིག་འཐེན་ནས།
ལྗང་མྱུག་གི་ལོ་མ་མཐའ་དག་ཡལ་གར་བཏགས་ཤིང་།
རྩྭ་ཐང་གི་ཕང་བར་ནེའུ་ལྗང་གི་གདན་ཆས་བརྡལ་ཏེ།
གཞན་གསོས་བུ་མོ་དང་ལྷན་དུ། ཡུལ་ལྗོངས་འདིར།
དགྱེས་འཛོམས་ཀྱི་མཛའ་གཞས་གཏོང་དགོས་པས།
ཁྱོད་རང་ད་དུང་ཁ་བ་དང་བུ་ཡུག་གི་ཁྲོད་དུ་གཟིམས་པ་གང་ལགས།
དཔྱིད་ཀྱི་དཔལ་མོ་ཨ།
འཁྱག་རོམ་ཞུ་རྗེས་སུ། ཁྱོད་ཀྱིས།
བྱམས་བརྩེ་ཡིས་བྲན་པའི་འཇམ་མཉེན་གྱི་ལག་ཟུང་དེས།
རི་ཀླུང་དག་བྱིལ་བྱིལ་གཏོང་བཞིན་ཡོང་བ་མིན་ནམ།
ཅིའི་ཕྱིར།
ངའི་མགོ་བོ་དང་སེམས་པ་ད་དུང་གྲང་ངར་གྱིས་བཟིར་བ་ལགས།
ངས་ཁྱོད་ལ་ལེ་བདའ་བྱེད་པ་མིན་ཏེ།
ཁ་ཆར་འདྲེས་མའི་ཉིན་མཚན་འདི་དག
ང་ལ་ཁྱོད་ཀྱི་བརྩེ་དུང་གི་འོ་སྦྱོར་ཤིན་ཏུ་མཁོ།
ཁེར་རྐྱང་དུ་ལུས་པའི་འཚོ་བའི་སྲིབ་ངོས་འདིར།
ཁྱོད་ཀྱི་མཛའ་གཞས་དང་དྲོད་ཁོལ་དེ་ངས་གཏན་དུ་སྒུག་བཞིན་ཡོད་པས།
ཁྱོད་ཉིད་གང་དུ་ཡོད་ཨང་།
点赞0
收藏
相关推荐
换一批
评论
