ཨེ་མ་དེ་རིང་ལྷ་ལམ་ཡངས་པོའི་མཁར། །

ཆུ་འཛིན་རྣམས་ཀྱིས་དགའ་བའི་གར་དུ་རྩེན། །

དབྱར་སྐྱེས་རྔ་ལ་དབྱུ་གུས་བསྣུན་པར་བྱེད། །

ཐོས་འཛིན་ཡུལ་དུ་སྙན་པའི་རང་སྒྲ་གྲགས། །

འཆི་མེད་བུ་མོས་བདུད་རྩི་གྲུ་ཆར་འབེབས། །

ནེའུ་གསིང་སྔོ་ལྗང་གཡུ་ལོ་ཐགས་སུ་བཀྲ། །

གཞུ་རིས་འཇའ་ཚོན་རི་མོ་རྣམ་པར་མཛེས། །

མཐོང་བ་ཙམ་གྱིས་ཡིད་ལ་དགའ་བ་སྟེར། །

མཐོ་ཞིང་བརྗིད་པའི་རི་རབ་ལྷུན་པོའི་ཞོལ། །

རྩྭ་དང་རྩི་ཤིང་འདར་འདར་གཡོ་བའི་གསེང་། །

བག་ཡངས་ངང་གནས་རི་དྭགས་ཤ་བའི་ཚོགས། །

ཕན་ཚུན་སྤྲོ་བའི་གར་གྱི་སྟངས་ཀ་འཛིན། །

མཛེས་པའི་དངོས་པོ་གཅིག་ཏུ་སྤུངས་པའི་དཔལ། །

ཡིད་ལ་གང་དྲན་རེ་བ་རྫོགས་ནུས་ཤིང་། །

བདེ་སྐྱིད་ཕུན་ཚོགས་དཔལ་ལ་འདྲེན་ནུས་པའི། །

དབྱར་གྱི་དུས་ནི་འདོད་དགུ་འཇོ་བའི་ནོར། །

གང་དུ་གནས་ཀྱང་སྐྱིད་ཀྱི་ཚོར་བ་དང་། །

འབོལ་གདན་ལ་སོགས་གཅིག་ཀྱང་མི་དགོས་པར། །

རང་སྣང་གང་དྲན་བསྡད་པས་ཆོག་པ་ཞིག །

དབྱར་གྱི་དུས་ནི་ཅི་འདྲའི་དགའ་བ་ཨང་། །