སྟོན་ཁ། འདི་ལྟར་ལྷིང་ཞིང་འཇགས་དོན།
བྱ་བྱེའུ་དག་སྔར་ནས་ཚང་དུ་ཡིབ་ཟིན་པས་ཡིན་ནམ།
སྤང་ལྗོངས་གདན་དུ་འདིང་ཞིང་འཇའ་ཚོན་གོས་སུ་གྱོན་པའི།
ཟླ་བ་དྲུག་པ་ཡོལ་ཟིན་པས་ཡིན་ནམ།
ད་ནི། ཟླ་བ་བརྒྱད་པའི་ནམ་མཁའ་ཡང་ཁ་རོག་གེར་གནས།
གཡའ་དག་དྲགས་པས་སྤྲིན་པ་ཡུག་གཅིག་ཀྱང་མི་སྣང་།
སྤྲིན་པ་ལང་ལོང་གི་འདུ་རྒོད་མེད་ན།
ཆར་པ་ཟིམ་ཟིམ་ཁྲོད་ནས་མཆོང་རྒྱུག་ཇི་ལྟར་བྱ།
ཁ་བ་ལྷབ་ལྷུབ་ཁྲོད་ནས་རྩེད་འཇོ་ལ་ཇི་ལྟར་རོལ།
སྐར་ཚོགས་ཀྱི་འཇིངས་སུ་འདུར་བའི་ཟླ་བ་ཡང་ཁུ་སིམ་མེར་བསྡད།
དེ་ལྟ་ན་ཡང་། ཐག་རིང་ནས་གནས་དུས་ངེས་མེད་དུ།
ང་ལ་ཆེས་མཛེས་སྡུག་གི་བསླུ་བྲིད་མང་པོ་ཞིག་སྐྱེས་སུ་ཕུལ་ཡོང་།
ཐུག་འཕྲད་མ་བྱུང་བའི་ཟླ་བ་འདི་ལྟར་དཀར་ཞིང་གཙང་དོན།
ད་ལྟའི་ང་དང་ཟླ་བའི་བར་དུ།
རྒྱང་རིང་ཞེས་སྣང་ལ་མ་ངེས་པའི་བར་སྟོང་འདི་ཡོད་པས་ཡིན་ནམ།
བུ་ལོན་གྱི་སྒྲིབ་པ་འདི་ངས་འདག་ཐབས་མི་འདུག་ཨང་།
གལ་ཏེ། ཟླ་བའི་གོ་ལའི་ཐོག་ཏུ་ཕྱིན་ཚེ།
ས་སྒང་འདིའི་ད་ལྟའི་སྟོན་ཁ་བཞིན།
ང་རང་ཉིན་མོར་ཚད་པས་གདུང་ཞིང་།
མཚན་མོར་གྲང་བས་བཙིར་ཡོང་བ་འབའ་ཞིག་ཡིན་ནམ།
སྟོན་ཁ། སྟོན་ཁ།…
དངོས་གནས་ལྷིང་འཇགས་ཡིན་དྲགས་པས།
ནུབ་ཕྱོགས་སུ་བཞུད་ཀྱིན་པའི་ཟླ་བའི་གོམ་སྒྲ་ཁོ་ན་ཐོས་ཡོང་།
ཤར་ཕྱོགས་སུ་འབབ་ཀྱིན་པའི་ཆུ་ཕྲན་གྱི་འོ་དོད་གཅིག་པུ་ཚོར་ཡོང་།
点赞
收藏
相关推荐
换一批
评论
