དབྱངས་འགྲོས་གསར་པ་ཞིག་ནི་མེད་པར་བྱས། །
གོམ་སྟབས་གསར་པ་ཞིག་ཀྱང་མེད་རྟགས་ཡིན། །
ན་ནིང་བྲིས་པའི་ཟླ་བ་སླར་ཡང་འབྲི། །
ཞེ་སེམས་གདུང་བས་མནར་བཞིན་འདི་ཡང་འབྲི། །
ལན་རེར་སེམས་ཀྱི་མཚོ་མོ་འཁྱིལ་བའི་དབུས། །
ཟླ་བས་ང་ལ་ཁྲེལ་དགོད་བྱེད་ཀྱི་ཡོད། །
ཐེངས་རེར་རྣམ་ཤེས་མཚོན་པའི་དབྱངས་རྟ་དེས། །
བསླུ་བྲིད་བཏང་བའི་རྣམ་འགྱུར་བསྟན་པ་འདྲ། །
བརྗོད་གཞི་གསར་པ་ཞིག་ནི་མ་རྙེད་པས། །
གོ་རྟོགས་འདི་ལ་འཕེལ་རྒྱས་མེད་པས་རེད། །
ས་མཐར་འཁྱམས་པའི་ཤེས་མེད་བུ་ལོ་ངས། །
ད་ནི་ཅི་ཞིག་བྲིས་ན་དགའ་བར་སེམས། །
སྐབས་རེར་རང་སེམས་རང་གིས་མ་མཐོང་བར། །
ཚོར་བའི་མེ་ཏོག་སད་ཀྱིས་ཁྱེར་བ་བཞིན། །
འབྲི་བྱ་ཅི་ཡང་མེད་པས་སྟོང་འདང་བརྒྱབ། །
ཆང་གིས་བཟི་བའི་སྨྱོན་པ་ཞིག་དང་མཚུངས། །
དུང་གཞས་བརྩེ་མགུར་ཡིན་ཁུལ་བྲིས་པ་དག །
ནད་མེད་འཁུན་སྒྲ་ཞིག་ལས་ཡོད་པ་མིན། །
དོན་དངོས་འཚོ་བ་འབྲི་བའི་སྙིང་སྟོབས་མེད། །
ཡིག་འབྲུ་རེ་འགས་མིག་ཆུའི་གཙང་པོ་བསྐྲུན། །
ལས་དབང་དམར་པོ་རེད་ཅེས་གླེང་མྱོང་ཡོད། །
མི་སེམས་ནག་པོ་ཡིན་ཞེས་བཤད་ཀྱང་མྱོང་། །
བཤད་རྒྱུ་ཡོད་ཚད་ཕར་ཆེར་བཤད་ཟིན་པས། །
ད་ནི་ཅི་ཞིག་འབྲི་དགོས་ངས་མ་ཤེས། །
ལོ་སྟོད་བྲིས་པ་སླར་ཡང་འབྲི་འདོད་མེད། །
བླངས་པའི་གཞས་དེ་བསྐྱར་ལེན་བྱ་རྩིས་མེད། །
གཞས་ཚིག་གསར་པ་རེ་ནི་མེད་པར་བྱས། །
འཁོར་བའི་གླུ་བ་ང་རང་ཧད་ཀྱིས་ལུས། །
ཁ་སྣ་མིག་གསུམ་མཛེས་ཉམས་ཡག་ཚུལ་དེ། །
ན་ནིང་ཟླ་བ་གསུམ་ལ་བསྐྱར་འབྲི་བྱས། །
དབྱངས་ཅན་ལྷ་མོའི་ཟུར་མིག་འཕེན་འདུག་ཅེས། །
རྟོག་བཏགས་སྤྲོས་པའི་གཏམ་དེ་གླེང་ཟིན་ཡོད། །
མི་ཚེའི་བདེ་སྡུག་གཞན་གྱིས་གླེང་བཞིན་ཡོད། །
དུས་བཞིའི་འགྱུར་ལྡོག་ངས་ཀྱང་བཤད་མྱོང་ཡོད། །
སེམས་ཚོར་རྙིང་པ་དེ་དག་མ་ཡིན་པའི། །
དབྱངས་འགྲོས་ཤིག་གི་བརྗོད་གཞི་རྙེད་པར་ཤོག །
བཙན་གྱིས་བསྒྲིགས་པའི་ངོ་བསྟོད་བསྔགས་པའི་ཚིག །
ཟོལ་གྱིས་གླེང་བའི་བརྩེ་མགུར་རྫུན་མའི་རིགས། །
དེ་རིང་ཡང་བསྐྱར་འབྲི་འདོད་མ་བྱུང་བས། །
དབྱངས་ཅན་ཁྱེད་ཀྱིས་བརྗོད་གཞི་གསར་པ་གནོངས། །
点赞
收藏
相关推荐
换一批
评论
